ଅର୍ଗସ ବ୍ୟୁରୋ: କୋଲକାତା ଡାକ୍ତରୀ ଛାତ୍ରୀ ଦୁଷ୍କର୍ମ ଓ ହତ୍ୟା ଘଟଣାକୁ ନେଇ ସାରା ଦେଶରେ ଆକ୍ରୋଶର ନିଆଁ । ଏହି ଆକ୍ରୋଷ ମମତା ସରକାରଙ୍କ ଅହଂକାର ବିରୋଧରେ । ମହାମହିମ ରାଷ୍ଟ୍ରପତି ଏହି ଘଟଣାକୁ ନେଇ କ୍ଷୋଭ ପ୍ରକାଶ କରିଥିଲେ । ରାଷ୍ଟ୍ରପତି କହିଥିଲେ ବାସ ବହୁତ ହୋଇଗଲା । ଦୋଷୀ ବିରୋଧରେ କାର୍ଯ୍ୟାନୁଷ୍ଠାନର ସମୟ ଆସିଛି । ଏବେ ଓଡିଶା  ରାଜ୍ୟପାଳ ପ୍ରକାଶ କଲେ କ୍ଷୋଭ । ମମତାଙ୍କ ବୟାନକୁ ନେଇ ଓଡ଼ିଶା ରାଜ୍ୟପାଳ ରଘୁବର ଦାସ କହିଛନ୍ତି, ସାମ୍ବିଧାନିକ ପଦରେ ଥିବା ବ୍ୟକ୍ତିଙ୍କ ଏଭଳି ବୟାନ୍ ଦେଶର ଏକତା ଓ ଅଖଣ୍ଡତା ଉପରେ ପ୍ରଶ୍ନ ସୃଷ୍ଟି କରୁଛି । ଏଭଳି ବୟାନ୍ ଦ୍ବାରା ସମାଜ ଭାଙ୍ଗିବାକୁ ଚେଷ୍ଟା କରୁଥିବା ବ୍ୟକ୍ତିଙ୍କୁ ବଳ ମିଳିବ ।

ହସ୍ପିଟାଲ ଭିତରେ ଜଣେ ଡାକ୍ତରଙ୍କୁ ଦୁଷ୍କର୍ମ ଓ ଜଘନ୍ୟ ହତ୍ୟାକାଣ୍ଡ ମେଡିକାଲ୍ ଓ ସ୍ଥାନୀୟ ପ୍ରଶାସନର ଦାୟିତ୍ବ ହୀନତାକୁ ଦର୍ଶାଉଛି । ଓଡ଼ିଶାର ଦୁଇଟି ଡେଲିକେସନ୍ ଟିମ୍ ଏନେଇ ଆଜି ମୋତେ ଏକ ସ୍ମାରକ ପତ୍ର ଦେଇଛନ୍ତି । କଠୋର କାର୍ଯ୍ୟାନୁଷ୍ଠାନ ନେଇ ଏହି ପତ୍ରକୁ ମୁଁ ପଶ୍ଚିମବଙ୍ଗ ରାଜ୍ୟପାଳଙ୍କ ନିକଟକୁ ପଠାଇବି । ନାରୀ ଶକ୍ତିକୁ ମା ଦୁର୍ଗା, କାଳୀ ଓ ସରସ୍ବତୀଙ୍କ ରୂପରେ ପୂଜା କରାଯାଉଛି । କିନ୍ତୁ ଏଭଳି ନାରୀଶକ୍ତି ଉପରେ ଯେଉଁ ବିଭତ୍ସ ଘଟଣା ଘଟିଛି, ତାହା ଆମ ସମସ୍ତଙ୍କ ପାଇଁ ଚିନ୍ତାଜନକ ବିଷୟ । ଏହା କୌଣସି ରାଜନୈତିକ ବିଷୟ ହେବା କଥା ନୁହେଁ । ସାରା ଦେଶର ରାଜନୈତିକ ଦଳ ଏହାକୁ ନେଇ ଚିନ୍ତା କରିବା ଦରକାର। 
ସେପଟେ ପଶ୍ଚିମବଙ୍ଗର ସାମ୍ପ୍ରତିକ ସ୍ଥିତି ନେଇ ଗୃହ ମନ୍ତ୍ରୀ ଅମିତ ଶାହାଙ୍କୁ ଅବଗତ କରାଇଛନ୍ତି ପଶ୍ଚିମବଙ୍ଗ ରାଜ୍ୟପାଳ । ରାଜ୍ୟରେ ବିଗିଡିଥିବା ଆଇନ ଶୃଙ୍ଖଳା ପରିସ୍ଥିତି ନେଇ ଗୃହ ମନ୍ତ୍ରୀଙ୍କ ସହିତ ତାଙ୍କ ବାସଭବନରେ ଆଲୋଚନା କରିଛନ୍ତି । ପଶ୍ଚିମବଙ୍ଗରେ ମହିଳା ଡାକ୍ତରୀ ଛାତ୍ରୀଙ୍କୁ ଦୁଷ୍କର୍ମ ଓ ହତ୍ୟା ଘଟଣା ପରେ

ବର୍ତ୍ତମାନର ସମୟରେ କେଉଁ ଅବସ୍ଥା ଦେଇ ଗତି କରୁଛି ପଶ୍ଚିମବଙ୍ଗ ସେନେଇ ଟିକିନିଖି ସୂଚନା ଦେଇଛନ୍ତି ପଶ୍ଚିମବଙ୍ଗ ରାଜ୍ୟପାଳ ।ଏବେ ନଜର ପକାନ୍ତୁ ମମତାଙ୍କ ବୟାନ ଉପରେ । ଯାହାକୁ ନେଇ ସାରା ଦେଶରେ ତୀବ୍ର ବିରୋଧ ଓ ଆକ୍ରୋଶ ଦେଖିବାକୁ ମିଳିଛି । ଜଘନ୍ୟ ଦୁଷ୍କର୍ମ ଓ ହତ୍ୟା ଘଟଣା ପରେ ପିଡିତାଙ୍କ ମା କହିଥିଲେ , ମମତାଙ୍କର  ପିଲା ନାହିଁ । ସେ ଜଣେ ମାର ଦୁଃଖକୁ ସହଜରେ ବୁଝିପାରିବେ ନାହିଁ ।

କୋଲକତା ଲଜ୍ଜାକୁ ନେଇ ସାରା ଦେଶରେ ପ୍ରତିବାଦର ସ୍ବର । ଏତିକି ବେଳେ ଆସିଥିଲା ପଶ୍ଚିମବଂଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦୋମୁହାଁ ଚରିତ୍ର । ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ବଦଳରେ ସାରା ଦେଶରେ ହିଂସା ସୃଷ୍ଟି ପାଇଁ  ଦେଇଥିଲେ ଧମକ। ଟିଏମସିର ଛାତ୍ର ସଂଗଠନକୁ ଉତ୍ତେଜକ ଭାଷଣ ମାଧ୍ୟମରେ ଉସୁକାଇଥିଲେ ମମତା ବାନାର୍ଜୀ । ଆସାମ, ବିହାର, ଝାଡ଼ଖଣ୍ଡ, ଓଡ଼ିଶା ଓ ଦିଲ୍ଲୀରେ ନିଆଁ ଜଳିବ ବୋଲି ଦେଇଥିଲେ ଧମକ। ମମତାଙ୍କ ହିଂସା ସୃଷ୍ଟିକାରୀ ଭାଷଣକୁ ନେଇ ସାରା ଦେଶରେ ଆକ୍ରୋଷର ନିଆଁ ଜଳୁଛି । ଏପରି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପୁଣି ଚିଠି ଲେଖିଛନ୍ତି ମମତା । ଦୁଷ୍କର୍ମ ଓ ହତ୍ୟା ପାଇଁ କଠୋର ଆଇନ ଆଣିବାକୁ ଅନୁରୋଧ କରିଛନ୍ତି। 

ଅଧିକ ପଢ଼ନ୍ତୁ ଭାରତ ଖବର