ବିଳାସପୂର୍ଣ୍ଣ ଘରେ ରହିବାକୁ ବା କାହାରିକୁ ଭଲ ନଲାଗେ । ଭଲରେ ରହିବାକୁ ଭଲରେ ଚଳିବାକୁ ସମସ୍ତେ ଇଚ୍ଛା କରନ୍ତି । ହେଲେ ଯେତେବେଳେ ଲକ୍ସରୀ ଘର କଥା ପଡେ ସବୁବେଳେ ଡିମାଣ୍ଡରେ ଥାଏ ମୁମ୍ବାଇର ସି ଫେସିଂ ହାଉସ୍ । ଯାହାକୁ କିଣିବାକୁ ବଲିଉଡ ସେଲିବ୍ରିଟିଠୁ ଆରମ୍ଭ କରି ବଡ ବଡ ବିଜନେସ ମ୍ୟାନ୍ ଅପେକ୍ଷା କରି ଚାହିଁଥାନ୍ତି ।

ସେହିପରି ବେଙ୍ଗାଲୁରୁର ଟେକ୍ ସେଣ୍ଟ୍ରିକ୍ ବଡ ବଡ କୋଠାକୁ ନେଇ ମଧ୍ୟ ଲୋକଙ୍କ ମଧ୍ୟରେ ଅହେତୁକ ଦୁର୍ବଳତା ଥାଏ । ଗୁରୁଗ୍ରାମ, ନଏଡା ଭଳି ସହରରେ ରହିବାକୁ ଅଧିକ ପସନ୍ଦ କରନ୍ତି ଲୋକେ । କିନ୍ତୁ ଏହି ଟ୍ରେଣ୍ଡ୍ ରେ କିଛି ପରିବର୍ତ୍ତନ ଆସିଛି । ମୁମ୍ବାଇ କି ବେଙ୍ଗାଲୁରୁ ନୁହେଁ ଦିଲ୍ଲୀରେ ଘର କିଣି ରହିବାକୁ ବେଶୀ ପସନ୍ଦ କରୁଛନ୍ତି ବଡବଡିଆ । ବଢିଛି ଘର ମୂଲ୍ୟ । ବଢିଛି ଡିମାଣ୍ଡ୍ ।

ନାଇଟ୍ ଫ୍ରାଙ୍କଙ୍କ ପ୍ରାଇମ୍ ଗ୍ଲୋବାଲ୍ ସିଟିଜ୍ ଇଣ୍ଡେକ୍ସ 2024 ତ୍ରୈମାସିକ ରିପୋର୍ଟ ଅନୁଯାୟୀ, ନୂଆଦିଲ୍ଲୀ ପ୍ରମୁଖ ଆବାସିକ ମୂଲ୍ୟରେ 6.7% ବୃଦ୍ଧି ରେକର୍ଡ କରି ବିଶ୍ୱ ସ୍ତରରେ ଷଷ୍ଠ ସ୍ଥାନରେ ରହିଛି । ଆଉ ଏ ସବୁ ଏଥିପାଇଁ ହୋଇଛି କାରଣ ଏହି ପ୍ରିମିୟମ୍ ଘର କିଣୁଥିବା କ୍ରେତାମାନଙ୍କ ଲାଇଫ୍ ଷ୍ଟାଇଲ୍ ରେ ଉନ୍ନତି ଏବଂ ସହରର ଇକୋନୋମିକ ବାଲାନ୍ସରେ ଏକ ସ୍ଥିରତା ଆସିଛି । ଯେଉଁଥିପାଇଁ ଘର ମୂଲ୍ୟ ବଢିବା ସହ ଏଠି ଘର କିଣି ରହିବାକୁ ଅଧିକ ପସନ୍ଦ କରୁଛନ୍ତି ବଡବଡିଆ ।

ଭାରତର ସବୁଠାରୁ ମହଙ୍ଗା ରିଅଲ୍ ଇଷ୍ଟେଟ୍ ବଜାର ହେଉଛି ମୁମ୍ବାଇ । ଯାହା ଏବେ ବିଶ୍ୱ ସ୍ତରରେ ସପ୍ତମ ସ୍ଥାନରେ ରହିଛି । ନୂଆଦିଲ୍ଲୀ ଷଷ୍ଠ ସ୍ଥାନରେ ରହିଥିବାବେଳେ ମୁମ୍ବାଇ ସପ୍ତମ ସ୍ଥାନରେ ରହିବାକୁ ନେଇ ଏବେ ଚର୍ଚ୍ଚା ଚାଲିଛି ।

ଏହି ରାଙ୍କ ଅନୁଯାୟୀ ସବୁଠୁ ପ୍ରଥମେ ରହିଛି ସିଓଲ, ପରେ ଦୁବାଇ, ଟୋକିଓ, ନାଇରୋବି, ଷଷ୍ଠ ସ୍ଥାନରେ ନୂଆଦିଲ୍ଲୀ, ସପ୍ତମରେ ମୁମ୍ବାଇ ରହିଛି ।