କଥାରେ ଅଛି ଇଚ୍ଛା ଥିଲେ ଉପାୟ ଆପେ ଆପେ ଆସେ । ଟଙ୍କା ରୋଜଗାର କରିବା ପାଇଁ କେବଳ ପାଠ ପଢ଼ି ଚାକିରି କରିବା ନୁହେଁ ,ଏଥିପାଇଁ ଅନେକ ମାଧ୍ୟମ ରହିଛି । ଯାହା ଏହି ଗାଁର ଲୋକ ମାନେ ଶିଖାଇଦେଛନ୍ତି । ବର୍ତ୍ତମାନ ସମୟରେ ରୋଜଗାରର ଏକ ଉତ୍ତମ ମାଧ୍ୟମ ପାଲଟିଛି ୟୁଟ୍ୟୁବ । ଭିଡିଓ, ଫଟୋ ଓ ରିଲ୍ସ ପୋଷ୍ଟ କରି ଲୋକେ ମୋଟା ଅଙ୍କର ରୋଜଗାର କରୁଛନ୍ତି । ଆଉ ସବୁଠାରୁ ବଡ଼ କଥା ହେଲା ୟୁଟ୍ୟୁବରେ ଟଙ୍କା ରୋଜଗାର କରିବା ପାଇଁ କୌଣସି ପ୍ରକାର ଯୋଗ୍ୟତା କିମ୍ବା ବୟସ ସୀମାର ଆବଶ୍ୟକତା ନାହିଁ ।

ଛତିଶଗଡ଼ ରାୟପୁରର ତୁଳସୀ ଗାଁ ଯାହାକୁ ୟୁଟ୍ୟୁବର କ୍ୟାପିଟାଲ ବୋଲି କୁହାଯାଏ । ଏହି ଗାଁରେ ୪୦୦୦ ଲୋକ ବାସ କରୁଥିବା ବେଳେ ସେଥିମଧ୍ୟରୁ ୧୦୦୦ ଜଣ ୟୁଟ୍ୟୁବର୍ । ସେମାନେ ପ୍ରତ୍ୟେକ ଦିନ ୟୁଟ୍ୟୁବରେ କଣ୍ଟେଣ୍ଟ ଅପଲୋଡ୍ କରନ୍ତି । ସେଠାକାର ଲୋକମାନେ ମିଶି ୟୁଟ୍ୟୁବରୁ ଏତେ ଟଙ୍କା ରୋଜଗାର କରୁଛନ୍ତି ଯେ ଏବେ ଗାଁର ଅର୍ଥନୀତି ବଦଳି ଯାଇଛି।

ଏକ ରିପୋର୍ଟ ଅନୁଯାୟୀ ୟୁଟ୍ୟୁବ ପାଇଁ ଏଠାରେ ବହୁତ ପରିବର୍ତ୍ତନ ହୋଇଛି । ଏଠାରେ ପିଲା ଠାରୁ ବୁଢ଼ା ଯାଏ ସମସ୍ତେ ଦିନସାରା ୟୁଟ୍ୟୁବ୍ ସହିତ ଜଡ଼ିତ। କିଛି ଲୋକ ନିଜର ପ୍ରଡକ୍ସନ ସେଟ ମଧ୍ୟ ତିଆରି କରିଛନ୍ତି । ସେଠାକାର ଲୋକେମାନେ ଏଥିରୁ ମୋଟା ଅଙ୍କର ଟଙ୍କା ରୋଜଗାର କରି ଲାଭବାନ ହୋଇପାରିଛନ୍ତି । କେତେକ କେବଳ ମୋବାଇଲ୍ ଏବଂ ଟ୍ରାଇପୋଡ ସହିତ ଭିଡିଓ କରନ୍ତି । ସେଥି ଲାଗି ଏହି ଗାଁକୁ ଭାରତର “ୟୁଟ୍ୟୁବ୍ ଗାଁ” ଭାବରେ ମାନ୍ୟତା ଦିଆଯାଉଛି ।
ତୁଲସୀ ଗ୍ରାମର ଦୁଇ ବନ୍ଧୁ ୨୦୧୮ ମସିହାରେ ଏକ ୟୁଟ୍ୟୁବ୍ ଚ୍ୟାନେଲ ଆରମ୍ଭ କରିଥିଲେ । ଯାହାର ନାଁ ଥିଲା ଛତିଶଗଡ଼ିଆ ୟୁଟ୍ୟୁବ୍ ଚ୍ୟାନେଲ୍ । କିଛି ନୂଆ କରିବା ଆଶାରେ ସେମାନେ ଚ୍ୟାନେଲ ଆରମ୍ଭ କରିଥିଲେ ଆଉ ତାଙ୍କର କଣ୍ଟେଣ୍ଟ ଲୋକଙ୍କୁ ଅଳ୍ପ ଦିନ ଭିତରେ ଖୁବ ପସନ୍ଦ ଆସିଥିଲା । ଯାହା ଭାଇରାଲ ହୋଇ ମିଲିୟନ ଭିୟୁ ମିଳିଥିଲା । କମେଡି ସହିତ ସମାଜକୁ ବାର୍ତ୍ତା ଦେଉଥିବା ଭଳି ଭିଡିଓ କରି ସେମାନେ ଅଳ୍ପ ଦିନ ମଧ୍ୟରେ ଫେମସ ହୋଇଯାଇଥିଲେ । ହେଲେ କଣ୍ଟେଣ୍ଟ ତିଆରି କରିବା ପାଇଁ ଉଭୟ ଖୁବ ପରିଶ୍ରମ କରୁଥିଲେ । ଆଉ ସେହି ପରିଶ୍ରମର ଫଳସ୍ୱରୂପ ୟୁଟ୍ୟୁବରୁ ମାସିକ ପେମେଣ୍ଟ ମଧ୍ୟ ଆସିବାରେ ଲାଗିଥିଲା । ତାଙ୍କର ଏହି ସଫଳତା ତୁଳସୀ ଗାଁର ଅନ୍ୟ ବାସିନ୍ଦାଙ୍କ ପାଇଁ ପ୍ରେରଣା ପାଲଟିଗଲା ।

୨୦୨୩ ମସିହାରେ ରାଜ୍ୟ ସରକାର ଏହି ଗ୍ରାମରେ ଏକ ଅତ୍ୟାଧୁନିକ ଷ୍ଟୁଡିଓ ପ୍ରତିଷ୍ଠା କରିଥିଲେ। ଏହି ଗାଁର ଶହ ଶହ ଯୁବକମାନଙ୍କ ପାଇଁ ୟୁଟ୍ୟୁବ ଜୀବିକା ନିର୍ବାହର ମାଧ୍ୟମ ହେଲା । ଏବେ ଏହି ଗାଁର ୧୦୦୦ରୁ ଅଧିକ ଲୋକ ୟୁଟ୍ୟୁବର ଆଉ ଏଥିରୁ ଭଲ ରୋଜଗାର କରି ପରିବାର ଚଳାଇବା ସହ ସମାଜକୁ ଏକ ବଡ଼ ବାର୍ତ୍ତା ଦେଉଛନ୍ତି ।