ମାଓ ବିରୋଧୀ ଅଭିଯାନରେ ସୁରକ୍ଷାବାହିନୀକୁ ମିଳିଛି ବଡ଼ ସଫଳତା । ଛତିଶଗଡ଼ ନାରାୟଣପୁର ଜିଲ୍ଲା ଅବୁଝମାଡ଼ ଜଙ୍ଗଲରେ ହୋଇଛି ବଡ଼ ଧରଣର ମାଓ ଏନ୍‌କାଉଣ୍ଟର । ଏଥିରେ 27 ଜଣ ମାଓବାଦୀ ନିପାତ ହୋଇଛନ୍ତି । ଏମାନଙ୍କ ମଧ୍ୟରେ ଅଛି ମାଓବାଦୀ ସିପିଆଇ ମାଓ ସଂଗଠନର ସାଧାରଣ ସମ୍ପାଦକ ନାମ୍ବାଲା କେଶବ ରାଓ ଓରଫ ବାସବରାଜ୍ । ବହୁ ଜଘନ୍ୟ ମାଓ ଆକ୍ରମଣ ଘଟଣାର ମାଷ୍ଟରମାଇଣ୍ଡ, NIAର ମୋଷ୍ଟ ୱାଣ୍ଟେଡ୍ । ଯାହାକୁ ଧରାଇ ଦେବା ପାଇଁ ଘୋଷଣା ହୋଇଥିଲା ଦେଢ଼ କୋଟି ଟଙ୍କାର ପୁରସ୍କାର । ବାସବରାଜ ଥିଲା ମାଓ ସଂଗଠନର ଶୀର୍ଷ ନେତା, ନକ୍ସଲ ଅଭିଯାନର ଅନ୍ୟତମ ମେରୁଦଣ୍ଡ ।

ଲକ୍ସଲ ବିରୋଧୀ ଲଢ଼େଇର ତିନି ଦଶନ୍ଧିର ଇତିହାସରେ ପ୍ରଥମ ଥର ଜଣେ ମହାସଚିବ ରାଙ୍କର ନେତାକୁ ନିପାତ କରିଛନ୍ତି ସୁରକ୍ଷା ବାହିନୀ। ଏହି ଉଲ୍ଲେଖନୀୟ ସଫଳତା ପାଇଁ ସୁରକ୍ଷା ବାହିନୀଙ୍କୁ ପ୍ରଶଂସା କରିଛନ୍ତି ପ୍ରଧାନମନ୍ତ୍ରୀ । ମୋଦି କହିଛନ୍ତି ମାଓବାଦକୁ ସମୂଳେ ନାଶ କରିବାକୁ ବଦ୍ଧ ପରିକର ଆମ ସରକାର। ନକ୍ସଲ ନିପାତ ଲଢ଼େଇରେ ଏହାକୁ ଏକ ମାଇଲ୍ ଖୁଣ୍ଟ ବୋଲି କହିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ। ଛତିଶଗଡ଼ର ନାରାୟଣପୁର, ଦନ୍ତେୱାଡା, ବିଜାପୁର ଓ କୋଣ୍ଡାଗାଁରେ ବ୍ୟାପ୍ତ ଅବୁଝମାଡ଼ ଜଙ୍ଗଲରେ କେନ୍ଦ୍ରୀୟ ସୁରକ୍ଷା ବାହିନୀ, DRG ଯବାନ ଓ ଛତିଶଗଡ଼ ପୋଲିସର ମିଳିତ ଅପରେସନରେ ଏହି ବଡ଼ ସଫଳତା ମିଳିଥିବାବେଳେ ଏନକାଉଣ୍ଟର ସ୍ଥଳରୁ ak47 ସମେତ ବହୁ ଗୁଳିଗୋଳା, ଅତ୍ୟାଧୁନିକ ଅସ୍ତ୍ରଶସ୍ତ୍ର ଜବତ ହୋଇଛି।

କେନ୍ଦ୍ର ଗୃହମନ୍ତ୍ରୀ ଅମିତ୍ ଶାହ ଆହୁରି କହିଛନ୍ତି ଛତିଶଗଡ଼, ତେଲେଙ୍ଗାନା ଓ ମହାରାଷ୍ଟ୍ରରେ ଚାଲିଥିବା ଅପରେସନ ବ୍ଲାକ୍ ଫରେଷ୍ଟରେ 54 ଜଣ ନକ୍ସଲ ଗିରଫ ହୋଇଥିବାବେଳେ 84 ଜଣ ମାଓବାଦୀ ଆତ୍ମସମର୍ପଣ କରିଛନ୍ତି। ଅମିତ୍ ଶାହ ପୁଣି କରିଛନ୍ତି ଦୃଢ଼ୋକ୍ତି 2026 ମାର୍ଚ୍ଚ 31 ସୁଦ୍ଧା ଦେଶରୁ ମୂଳୋତ୍ପାଟନ ହେବ ମାଓବାଦ।

Argus News | argus news | -Argusnews Home: Odisha Latest News, Breaking News, Trending News, Live TV and more