HanumanTemple / ମନ୍ଦିର ଚୁରମାର, କିନ୍ତୁ ଆସ୍ଥାନରୁ ଉଠିଲେନି ହନୁମାନ... ଭକ୍ତଙ୍କ ଭିଡ଼

ହନୁମାନ ମନ୍ଦିର ପୂରା ଭାଙ୍ଗିରୁଜି ଚୁରମାର ହୋଇଗଲା । କିନ୍ତୁ ପ୍ରଭୁ ହନୁମାନ ତାଙ୍କ ଆସ୍ଥାନରୁ ଉଠୁ ନାହାଁନ୍ତି । ଯେତେ ଚେଷ୍ଟା କଲେ ବି ହନୁମାନଙ୍କୁ କେହି ହଲେଇ ପାରୁ ନାହାଁନ୍ତି । କିଏ କୁରାଢ଼ିରେ ଖୋଳୁଥିଲା ତ କିଏ ସାବଳରେ ଆଘାତ ଦେଉଥିଲା । ମେସିନ୍‌ ଲଗାଇ ବି ଖୋଳାଗଲା । କିନ୍ତୁ ପ୍ରଭୁ ହନୁମାନ ହଲୁ ନାହାଁନ୍ତି । ଖୋଳି ଖୋଳି ଲୋକେ ହାଲିଆ ହୋଇଗଲେଣି ।

ଖୋଳି ଖୋଳି ଖାଲ ହୋଇଗଲାଣି ପ୍ରଭୁଙ୍କର ଚାରି ପାର୍ଶ୍ଵ । ତଥାପି ସେମିତି ବଶି ରହିଛନ୍ତି ପ୍ରଭୁ ହନୁମାନ । ତାଙ୍କୁ କେହି ବି ସେଠାରୁ ଉଠାଇ ପାରୁ ନାହାଁନ୍ତି । ସେ ହେଉଛନ୍ତି ସବୁଠାରୁ ଶକ୍ତିଶାଳି ପବନ ଦେବଙ୍କ ପୁତ୍ର ହନୁମାନ । ତାଙ୍କର ଲାଞ୍ଜକୁ ବି ମନ୍ଦ ଉଦ୍ଦେଶ୍ୟ ରଖୁଥିବା ଲୋକ ଉଠାଇବା ଅସମ୍ଭବ । ଆଉ ଏ ତ ସ୍ଵୟଂ ହନୁମାନ । ତାଙ୍କୁ ବା କେମିତି ଉଠାଇ ପାରିବେ । ସେଥିପାଇଁ ପୁରା ପ୍ରଶାସନ ଲାଗିଛି ଉଠାଇବା ପାଇଁ ତଥାପି ଉଠାଇ ପାରୁ ନାହିଁ ।

ହନୁମାନଙ୍କ ମନ୍ଦିରକୁ ପୁରା ଭାଙ୍ଗି ଦିଆଯାଇଛି । ହନୁମାନଙ୍କୁ ସେଠାରୁ ଉଠାଇବା ପାଇଁ ଖୋଳା ଚାଲିଛି । ଯିଏ ଯେମିତି ପାରୁଛି ଖୋଳି ଚାଲିଛି । କିନ୍ତୁ ତିଳେମାତ୍ର ବି ହଲୁ ନାହାଁନ୍ତି ପ୍ରଭୁ ହନୁମାନ । ସେମିତି ପ୍ରଭୁ ରାମଙ୍କ ଧ୍ୟାନରେ ପୁରା ମଗ୍ନ । ଯଦି ଦେଖିବା ଏ ହେଉଛନ୍ତି ଉଜୈନ୍‌ର ଖଡ଼େ ହନୁମାନ । ଏହି ମନ୍ଦିରର ଆୟୁଷ ହେବ ୧୭୦ ବର୍ଷରୁ ଅଧିକ । ଏହି ମନ୍ଦିରରେ ରହିଛନ୍ତି ସାକ୍ଷାତ ପ୍ରଭୁ ହନୁମାନ ।

ତେବେ ଉଜୈନ୍‌ରେ ୨୦୨୮ ସିଂହସ୍ଥ କୁମ୍ଭ ମେଳା ପାଇଁ ପ୍ରସ୍ତୁତି ଆରମ୍ଭ ହୋଇଛି । ଆଉ ସେଥିପାଇଁ ରାସ୍ତାକୁ ଚଉଡ଼ା କରିବାକୁ ଯାଇ ଏହି ଖଡ଼େ ହନୁମାନ ମନ୍ଦିରକୁ ରାସ୍ତାରୁ ହଟାଇବା କାର୍ଯ୍ୟ ଆରମ୍ଭ ହୋଇଛି । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ମନ୍ଦିର ପୂରା ଭାଙ୍ଗିଗଲାଣି । କିନ୍ତୁ ପ୍ରଶାସନ ଏବଂ ଇଞ୍ଜିନିୟର ମାନେ ୪୦ ଘଣ୍ଟା ହେଲାଣି ଯେତେ ଚେଷ୍ଟା କଲେ ବି ହନୁମାନ ଉଠୁ ନାହାଁନ୍ତି । ଭକ୍ତ ମାନେ ଏହାକୁ ଚମତ୍କାର ବୋଲି କହୁଛନ୍ତି । ଏମିତି ଚମତ୍କାର ଦେଖିବାକୁ ହନୁମାନଙ୍କ ପାଖରେ ଗଦା ହେଉଛନ୍ତି ହଜାର ହଜାର ଭକ୍ତ ।

ସେପଟେ ପ୍ରଶାସନକୁ ପ୍ରତ୍ନତତ୍ତ୍ୱ ବିଭାଗର ବିଶେଷଜ୍ଞମାନ ଚେତାବନୀ ଦେଇଛନ୍ତି । କହିଛନ୍ତି କି ଏହି ପ୍ରାଚୀନ ପ୍ରତିମାକୁ ହଲାଇବା କିମ୍ବା ବାହାର କରିବାର ଯେକୌଣସି ପ୍ରଚେଷ୍ଟା ଦ୍ୱାରା ଏଥିରେ ଗଭୀର ଫାଟ ଆସିପାରେ । ଏହାର ଅର୍ଥ ସ୍ପଷ୍ଟ ଯେ ମନ୍ଦିରର ବାହ୍ୟ ଢାଞ୍ଚା କିମ୍ବା ଅଂଶକୁ ହଟାଯାଇପାରିବ, କିନ୍ତୁ ପ୍ରାୟ ୧୭୦ ବର୍ଷ ପୁରୁଣା ଏହି ଚମତ୍କାରୀ ହନୁମାନଙ୍କ ପ୍ରତିମାକୁ କୌଣସି କ୍ଷତି ନ ପହଞ୍ଚାଇ ହଟାଇବା ପ୍ରଶାସନ ପାଇଁ ଅସମ୍ଭବପ୍ରାୟ ସାବ୍ୟସ୍ତ ହେଉଛି। ଯାହାପରେ ଏହି କାର୍ଯ୍ୟକୁ ଏବେ ବନ୍ଦ କରିଦିଆଯାଇଛି ।