ଆଜି ସକାଳେ ମୁଁ ମୋର ବାପାଙ୍କୁ ହରାଇଲି । ମୋ ମାଆ ମତେ ସକାଳୁ ୨୦ଟି କଲ କରିଛନ୍ତି, କିନ୍ତୁ ମୁଁ ଗତକାଲି ବିଳମ୍ବିତ ରାତିଯାଏଁ କାମ କରିଥିବାରୁ କଲ ଉଠାଇପାରିନଥିଲି । ଆଉ ଶେଷରେ ସକାଳ ୮ଟାରେ ହିଁ ମୁଁ କଲ ଉଠାଇ ଏପରି ଖବର ପାଇଲି । ଆଉ ବିଳମ୍ବ ନକରି ସାଙ୍ଗେସାଙ୍ଗେ ସବୁଠୁ ଦ୍ରୁତ ବିମାନରେ ଟିକେଟ ବୁକ୍ କରିବାକୁ ଚେଷ୍ଟା କଲି । କିନ୍ତୁ ତାହା ରାତି ୭ଟାରେ ଘରେ ପହଞ୍ଚାଇପାରିବ । ଏବେ ଆଉ ଏକ ବିମାନ ପାଇଁ ଅପେକ୍ଷା କରିଛି । ବାପାଙ୍କ ସହ ଶେଷଥର ବି ଠିକରେ କଥା ହୋଇପାରିଲିନି , ବହୁତ ଚାହୁଁଥିଲି କି ତାଙ୍କୁ ଅଧିକ ସମୟ ଦେବି, କିନ୍ତୁ ପାରିଲିନି.....

କୋହଭରା ହୃଦୟରେ ନିଜ ମନର କଷ୍ଟକୁ ଶେୟାର କରିଛନ୍ତି ସଫ୍ଟୱେୟାର ଇଞ୍ଜିନିୟର ବିବେକ ନସ୍କର । ନିଜ ବାପାଙ୍କୁ ହରାଇ ଭାଙ୍ଗି ପଡିଥିବା ବେଳେ ଛଳଛଳ ଆଖିରେ ଗୋଟି ଗୋଟି କରି ନିଜ ମନର ଅକୁହା କଥାକୁ ସେ ସୋସିଆଲ ମିଡିଆରେ ସମସ୍ତଙ୍କ ସହ ଶେୟାର କରିଛନ୍ତି । ଶେଷ ମୁହୁର୍ତ୍ତରେ ବି ବାପାଙ୍କ ସହ କଥା ନହୋଇପାରିବାର କଷ୍ଟ ଯେ କେତେ ଅଧିକ ଥିଲା, ତାହା ବର୍ଣ୍ଣନା କରିଛନ୍ତି ବିବେକ ।

'x' ଆକାଉଣ୍ଟରେ ସିନିୟର ସଫ୍ଟୱେୟାର ଇଞ୍ଜିନିୟର ଏପରି ଲେଖି ଶେୟାର କରିଛନ୍ତି । ନିଜ କାମରେ ସେ ଏତେ ବ୍ୟସ୍ତ ରହିଯାଇଥିଲେ ଯେ ନିଜ ବାପାଙ୍କ ସହ ଶେଷ କଥା ମଧ୍ୟ ହୋଇପାରିଲେନି, ଆଉ ତାଙ୍କ ବାପା ଚାଲିଗଲେ । ନିଜ ପୋଷ୍ଟରେ ସେ ଭାବବିହ୍ଵଳ ହୋଇ ଲେଖିଛନ୍ତି, "ଏବେ ଏୟରପୋର୍ଟରେ ମୁଁ ଦ୍ଵିତୀୟ ବିମାନ ପାଇଁ ଅପେକ୍ଷା କରିଛି । ମୋ ମୁଣ୍ଡରେ ହଜାର ପ୍ରକାରର ଚିନ୍ତା ଚାଲିଛି । ଯାହାକୁ ମୁଁ ନିଜ ନିୟନ୍ତ୍ରଣରେ ରଖିପାରୁନି । ମୁଁ ଶେଷଥର ପାଇଁ ବାପାଙ୍କ ସହ ଠିକରେ କଥା ହୋଇ ପାରିନଥିଲି । ତା ପୂର୍ବରୁ ଯେବେ କଥା ହୋଇଥିଲି, ସେତେବେଳେ କୌଣସି କଥା ନେଇ ଆମଭିତରେ ମତଭେଦ ଚାଲିଥିଲା । ପରେ ତାଙ୍କୁ କଲ କରିବି ଭାବିଥିଲି । ମତେ ତାଙ୍କୁ ଟିକେ ଅଧିକ ସମୟ ଦେବାର ଥିଲା । କିନ୍ତୁ ମୁଁ ଦେଇ ପାରିଲିନି । ଆମେ ପରସ୍ପରକୁ ଖୁବ ଭଲପାଉ । ସେ ସବୁବେଳେ ମୋ ମାଆଙ୍କୁ କୁହନ୍ତି, ମୋ ଉପରେ ସେ ଗର୍ବ କରନ୍ତି, କିନ୍ତୁ ମୋ ପାଇଁ ନୁହେଁ । ମୁଁ, ଇମୋସନାଲ ନୁହେଁ, କିନ୍ତୁ ମୁଁ ଏହି ପୋଷ୍ଟ ଗୋଟେ ଗଭିର ଦୁଃଖର ସହ ଲୁହଭରା ଆଖିରେ ଲେଖୁଛି । ଏଥିପାଇଁ ଲେଖୁଛି କି, ମୁଁ ଶେଷଥର ପାଇଁ ବାପାଙ୍କୁ ଦେଖା କରିବା ପାଇଁ ପ୍ରସ୍ତୁତ ରହିପାରିବି ।"

ଅଧିକ ପଢନ୍ତୁ : ଜୀବିତ ଅବସ୍ଥାରେ କୋକେଇରେ ଶୋଇଥିଲେ, ନିଜେ କଲେ ନିଜ ଶବ ସଂସ୍କାର

ଏହି ସମ୍ପୁର୍ଣ୍ଣ କାହାଣୀ ୟୁଜର୍ସ ମାନଙ୍କୁ ମଧ୍ୟ ଖୁବ ଭାବୁକ କରିଦେଇଛି । ସମସ୍ତେ ଏହି ପୋଷ୍ଟରେ ନିଜ ନିଜର ମତ ଦେଇଛନ୍ତି । କିଛିଜଣ ମଧ୍ୟ ନିଜ ନିଜର ଏହିପରି ଥିବା କିଛି ଅନୁଭୂତିକୁ ଶେୟାର କରିଛନ୍ତି ।

ତେବେ ଏହି ଭିଡିଓ ଦ୍ଵାରା ଆମେ ଜଣାଇଦେବାକୁ ଚାହୁଁଛୁ କି, ଜୀବନରେ ଯେତେ ବ୍ୟସ୍ତ ଥିଲେ ମଧ୍ୟ ନିଜର ବାପାମାଆଙ୍କୁ କେବେ ଅବହେଳା କରନ୍ତୁ ନାହିଁ । କାରଣ ତାଙ୍କର ଉପସ୍ଥିତି ଆମ ଜୀବନର ଅଧା ଯାଏଁ ହିଁ ରହିଥାଏ । ଆଉ ସେହି ସ୍ଵଳ୍ପ ସମୟରେ ତାଙ୍କୁ ନିଜର ପୁରା ସମୟ ଦେବାକୁ ଚେଷ୍ଟା କରନ୍ତୁ । ନହେଲେ ତାଙ୍କର ଶେଷ କଲକୁ ଅଣଦେଖା କରିଦେଇ ଜୀବନ ସାରା ଅନୁତାପ କରିବା ଛଡା କୌଣସି ରାସ୍ତା ନଥିବ ।