Argus News - ଭୟଙ୍କର ତ୍ରୁଟି, ଗୋଟିଏ ଭୋଟରର ୧୦ ବାପା ! ତାହାଲେ ଏମିତି ଜିତୁଥିଲେ ମମତା..?

ପଶ୍ଚିମବଙ୍ଗରୁ ସାମ୍ନାକୁ ଆସିଲା ଏକ ଅଜବ ଘଟଣା । ଭୋଟର ତାଲିକାରେ ମହାଘୋଟାଲା ସାମ୍ନାକୁ ଆସିଛି । ପଶ୍ଚିମବଙ୍ଗରେ ଚାଲିଥିବା SIR ପ୍ରକ୍ରିୟା ବେଳେ ଏହି ତଥ୍ୟ ସାମ୍ନାକୁ ଆସିଛି । ଏହି ତଥ୍ୟ କେବଳ ନିର୍ବାଚନ କମିଶନଙ୍କୁ ନୁହେଁ ବରଂ ସୁପ୍ରିମକୋର୍ଟକୁ ମଧ୍ୟ ଆଶ୍ଚର୍ଯ୍ୟ କରିଛି। ନିର୍ବାଚନ କମିଶନ ସୋମବାର ସୁପ୍ରିମକୋର୍ଟକୁ ମଧ୍ୟ ଏହି ସୂଚନା ଦେଇଛନ୍ତି । ତେବେ ଖବରଟି ହେଲା, ରାଜ୍ୟର ବିଭିନ୍ନ ବିଧାନସଭା ମଣ୍ଡଳିର ଶହ ଶହ ଭୋଟରଙ୍କର ବାପାଙ୍କ ନାଁ ସମାନ । ଅର୍ଥାତ୍‌ ସିଧା ସିଧା କହିବାକୁ ଗଲେ ଜଣେ ପିତାଙ୍କ ନାଁରେ, ଏକାଧିକ ନକଲି ସନ୍ତାନ ସୃଷ୍ଟି କରାଯାଇଛି । ଆଉ ସେମାନଙ୍କୁ ଭୋଟର ଭାବେ ମଧ୍ୟ ଗଣତି କରାଯାଉଛି ।

ନିର୍ବାଚନ କମିଶନ ସୁପ୍ରିମକୋର୍ଟରେ ଏକ ସତ୍ୟପାଠ ଦାଖଲ କରି କହିଛନ୍ତି ଯେ ୨୦୨୫ ଭୋଟର ତାଲିକାରେ, ଆସାନସୋଲ ଜିଲ୍ଲାର ବାରାବଣି ବିଧାନସଭା ନିର୍ବାଚନ ମଣ୍ଡଳି (ନମ୍ବର ୨୮୩) ରେ ୩୮୯ ଭୋଟରଙ୍କ ପିତା ଭାବରେ ଜଣେ ବ୍ୟକ୍ତିଙ୍କୁ ତାଲିକାଭୁକ୍ତ କରାଯାଇଛି। ଏହି ସମୟରେ, ହାଓଡା ଜିଲାର ବାଲି ବିଧାନସଭା ନିର୍ବାଚନ ମଣ୍ଡଳୀ (ନମ୍ବର ୧୬୯) ରେ ୩୧୦ ଭୋଟରଙ୍କ ପିତା ଭାବରେ ଆଉ ଜଣେ ବ୍ୟକ୍ତିଙ୍କୁ ତାଲିକାଭୁକ୍ତ କରାଯାଇଛି।

ତେବେ ନିର୍ବାଚନ କମିଶନଙ୍କ ତଥ୍ୟ ଅନୁଯାୟୀ, ଏହା ଏକମାତ୍ର ମାମଲା ନୁହେଁ। ରାଜ୍ୟରେ ସାତ ଜଣ ବ୍ୟକ୍ତି ଅଛନ୍ତି ଯେଉଁମାନେ ୧୦୦ରୁ ଅଧିକ ଭୋଟରଙ୍କ ମାତାପିତା ଭାବରେ ପଞ୍ଜୀକୃତ ହୋଇଛନ୍ତି। ଦଶ ଜଣ ବ୍ୟକ୍ତି ୫୦ କିମ୍ବା ତା’ଠାରୁ ଅଧିକ ଭୋଟରଙ୍କ ମାତାପିତା ଭାବରେ ତାଲିକାଭୁକ୍ତ, ଅନ୍ୟ ୧୦ ଜଣ ୪୦ରୁ ଅଧିକ ମତଦାତାଙ୍କ ମାତାପିତା ଭାବରେ ପଞ୍ଜୀକୃତ, ୧୪ ଜଣ ୩୦ରୁ ଅଧିକ ମାତାପିତା ଭାବରେ ପଞ୍ଜୀକୃତ ଏବଂ ୫୦ ଜଣ ୨୦ରୁ ଅଧିକ ମତଦାତାଙ୍କ ମାତାପିତା ଭାବରେ ପଞ୍ଜୀକୃତ। ଏହା ବ୍ୟତୀତ, ୮,୬୮୨ ବ୍ୟକ୍ତି ୧୦ରୁ ଅଧିକ ମତଦାତାଙ୍କ ମାତାପିତା ଭାବରେ ପଞ୍ଜୀକୃତ, ୨ ଲକ୍ଷ ୦୬ ହଜାର ୫୬ ଜଣ ୬ରୁ ଅଧିକ ମାତାପିତା ଭାବରେ ପଞ୍ଜୀକୃତ ଏବଂ ୪ ଲକ୍ଷ ୫୯ ହଜାର ୫୪ ଜଣ ୫ରୁ ଅଧିକ ମତଦାତାଙ୍କ ମାତାପିତା ଭାବରେ ପଞ୍ଜୀକୃତ।

ମୁଖ୍ୟ ବିଚାରପତି ସୂର୍ଯ୍ୟକାନ୍ତ, ବିଚାରପତି ଦୀପଙ୍କର ଦତ୍ତ ଏବଂ ବିଚାରପତି ଜୟମାଲ୍ୟ ବାଗଚୀଙ୍କୁ ନେଇ ଗଠିତ ଖଣ୍ଡପୀଠ ସମ୍ମୁଖରେ ନିର୍ବାଚନ କମିଶନଙ୍କ ପକ୍ଷରୁ ଉପସ୍ଥିତ ବରିଷ୍ଠ ଓକିଲ ରାକେଶ ଦ୍ୱିବେଦୀ କହିଛନ୍ତି ଯେ ଏପରି ଭୁଲ ସୂଚନା ‘ତାର୍କିକ ବିସଙ୍ଗତି’ ବା Logical discrepancy ବର୍ଗରେ ପଡ଼େ, ଯାହା ସଂଶୋଧନ ଆବଶ୍ୟକ କରେ। ସେ କହିଛନ୍ତି ଯେ ଏପରି କ୍ଷେତ୍ରରେ, ସମ୍ପୃକ୍ତ ଭୋଟର ମାନଙ୍କୁ ନୋଟିସ ଜାରି କରାଯାଇଛି ଏବଂ ସଠିକ ରେକର୍ଡ ହେବା ନିଶ୍ଚିତ କରିବା ଭୋଟରଙ୍କ ଦାୟିତ୍ୱ ।

ଜାତୀୟ ପରିବାର ସ୍ବାସ୍ଥ୍ୟ ସର୍ଭେ (NFHS) ୨୦୧୯-୨୦୨୧ କୁ ଉଦ୍ଧୃତ କରି, ନିର୍ବାଚନ କମିଶନ କହିଛନ୍ତି ଯେ ଭାରତରେ ହାରାହାରି ପରିବାର ଆକାର ୪.୪, ଅର୍ଥାତ ଏକ ପରିବାରରେ ସାଧାରଣତଃ ୨-୩ ପିଲା ଥାଆନ୍ତି। ଏପରି ପରିସ୍ଥିତିରେ, ୫୦ କିମ୍ବା ତା’ଠାରୁ ଅଧିକ ମତଦାତାଙ୍କୁ ଗୋଟିଏ ବ୍ୟକ୍ତିଙ୍କ ସହିତ ଯୋଡ଼ାଯିବା ସ୍ବାଭାବିକ ନୁହେଁ ଏବଂ ଏଥିପାଇଁ ତଦନ୍ତ ଆବଶ୍ୟକ।

ତେବେ ଏହାରି ଭିତରେ ଆଉ ଏକ ଭୟଙ୍କର ତଥ୍ୟ ମଧ୍ୟ ସାମ୍ନାକୁ ଆସିଛି । କମିଶନ ସ୍ପଷ୍ଟ କରିଛି ଯେ ଜଣେ ଭୋଟରଙ୍କ ୬ କିମ୍ବା ତା’ଠାରୁ ଅଧିକ ମାତାପିତା ରହିଥିବା ଜଣାପଡିଛି । ସେଗୁଡ଼ିକୁ ଅଧିକ ଗମ୍ଭୀରତାର ସହ ଯାଞ୍ଚ କରାଯାଉଛି। ଏଥିରେ କୌଣସି ଜାଲିଆତି କିମ୍ବା ଭୁଲ ମ୍ୟାପିଂ ଆଶଙ୍କା କରି ଯାଞ୍ଚ କରିବା ପାଇଁ ନିର୍ବାଚନ ପଞ୍ଜିକରଣ ଅଧିକାରୀମାନେ ଏପରି ଭୋଟରମାନଙ୍କୁ ନୋଟିସ ଜାରି କରୁଛନ୍ତି।

ଏହା ବ୍ୟତୀତ, ‘ତାର୍କିକ ବିସଙ୍ଗତି’ ଅଧୀନରେ ନୋଟିସ ଜାରି କରିବା ପାଇଁ ଆହୁରି ଚାରୋଟି କାରଣ ମଧ୍ୟ ସାମ୍ନାକୁ ଆସିଛି। ଏଥିରେ ୨୦୨୫ଭୋଟର ତାଲିକାରେ ୨୦୦୨ SIR ତାଲିକା ସହିତ ମେଳ ଖାଉନଥିବା ନାମ, ଭୋଟର ଏବଂ ତାଙ୍କ ମାତାପିତାଙ୍କ ମଧ୍ୟରେ ୧୫ ବର୍ଷରୁ କମ ବୟସ ପାର୍ଥକ୍ୟ, ୫୦ ବର୍ଷରୁ ଅଧିକ ବୟସ ପାର୍ଥକ୍ୟ, କିମ୍ବା ଭୋଟର ଏବଂ ତାଙ୍କ ଜେଜେ ଜେଜେମାଆଙ୍କ ମଧ୍ୟରେ ୪୦ ବର୍ଷରୁ କମ ବୟସ ପାର୍ଥକ୍ୟ ଅନ୍ତର୍ଭୁକ୍ତ।