ଲକ୍ଷ୍ନୌ: କ୍ୟାବିନେଟ୍ ମନ୍ତ୍ରୀଙ୍କ କାରକୁ କ୍ରେନ୍ ଲଗାଇ ଉଠାଇ ନେଲା ଟ୍ରାଫିକ୍ ପୋଲିସ । ସମସ୍ତଙ୍କୁ ଚକିତ କଲା ଭଳି ଏ ଘଟଣା ଘଟିଛି ଉତ୍ତରପ୍ରଦେଶ ବିଧାନସଭା ପରିସରରେ । ମନ୍ତ୍ରୀଙ୍କ କାରକୁ ପୋଲିସ କ୍ରେନ୍‌ରେ ନେବା ବେଳର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେବାରେ ଲାଗିଛି ।

ସୂଚନା ଅନୁସାରେ, ୟୁପି ସରକାରଙ୍କ କ୍ୟାବିନେଟ୍ ମନ୍ତ୍ରୀ ସଞ୍ଜୟ ନିଷାଦଙ୍କ ଫର୍ଚ୍ୟୁନର ଗାଡ଼ିଟି ଲକ୍ଷ୍ନୌ ସ୍ଥିତ ବିଧାନସଭାର ନୋ ପାର୍କିଂ ଜୋନ୍‌ରେ ଛିଡ଼ା ହୋଇଥିଲା । ଏହି ଘଟଣା ଗୁରୁବାରର । ବିଧାନସଭା ଚାଲିଥିବା ବେଳେ ଟ୍ରାଫିକ୍ ପୋଲିସ ଗାଡ଼ି ଉଠାଇ ନେଇଥିଲା । କୁହାଯାଉଛି, ନୋ ପାର୍କିଂ ଜୋନ୍‌ରେ ଗାଡ଼ି ଛିଡ଼ା କରିଥିବାରୁ ସେଠାରେ ଜାମ ହୋଇଥିଲା । ଆଉ ପୋଲିସ ସ୍ଥିତି ନିୟନ୍ତ୍ରଣ କରିବାକୁ କ୍ରେନ୍‌ରେ ଗାଡ଼ି ଉଠାଇ ନେଇଥିଲା । ଏହି ସମୟରେ କ୍ୟାବିନେଟ୍ ମନ୍ତ୍ରୀ ସଞ୍ଜୟ ନିଷାଦ ବିଧାନସଭାରେ ଉପସ୍ଥିତ ଥିଲେ ।

ମନ୍ତ୍ରୀଙ୍କ ଗାଡ଼ି ଭୁଲ୍ ସ୍ଥାନରେ ପାର୍କିଂ ଯୋଗୁଁ ଅନ୍ୟମାନଙ୍କୁ ଅସୁବିଧାର ସମ୍ମୁଖିନ ହେବାକୁ ପଡ଼ିଥିଲା, ଫଳରେ ଭିଡ଼ ବଢ଼ିଥିଲା । ଆଉ ପୋଲିସ ବିଳମ୍ବ ନ କରି କ୍ରେନ୍ ଡାକି ସେହି ସ୍ଥାନରୁ ଗାଡ଼ିକୁ ହଟାଇ ନେଇଥିଲା । ଆଉ ସେହି ସମୟରେ କେହି ଭିଡିଓ କରି ସୋସିଆଲ୍ ମିଡିଆରେ ଅପଲୋଡ୍ କରିବାରୁ ତାହା ଭାଇରାଲ୍ ହେବାରେ ଲାଗିଛି ।

ସଞ୍ଜୟ ନିଷାଦ ୟୁପି ସରକାରରେ ମତ୍ସ୍ୟ ପାଳନ ମନ୍ତ୍ରୀ ଅଛନ୍ତି । ସେ ୨୦୨୨ ମାର୍ଚ୍ଚ ୨୫ରେ କ୍ୟାବିନେଟ୍ ମନ୍ତ୍ରୀ ପଦର ଶପଥ ନେଇଥିଲେ । ତେବେ ପୋଲିସର ଏହି କାର୍ଯ୍ୟାନୁଷ୍ଠାନରୁ ବାର୍ତ୍ତା ଦିଆଯାଇଛି, ସେ ବଡ଼ ନେତା ହୁଅନ୍ତୁ କି ଅନ୍ୟ କେହି ନିୟମ ପାଳନ ସମସ୍ତଙ୍କ ପାଇଁ ସମାନ । ପୋଲିସର ଏହି ପଦକ୍ଷେପକୁ ସୋସିଆଲ୍ ମିଡିଆରେ ବି ଲୋକେ ବେଶ୍ ତାରିଫ୍ କରୁଛନ୍ତି ।