୨୦ ମିନିଟ୍‌ରେ ଆତ୍ମହତ୍ୟାରୁ ମହିଳାଙ୍କୁ ରୋକିଲା ପୋଲିସ, IP ଟ୍ରେସ୍‌ରୁ ମିଳିଲା ସଫଳତା

ଲକ୍ଷ୍ନୌ: ସୋସିଆଲ୍ ମିଡିଆରେ ଅବସାଦ ଭିଡିଓ । ଭିଡିଓ ପୋଷ୍ଟର ୨୦ ମିନିଟରେ ପହଞ୍ଚିଲା ପୋଲିସ । ଅଳ୍ପକେ ବଞ୍ଚିଗଲା ମହିଳାଙ୍କ ଜୀବନ । ଭିଡିଓର ଆଇପି ଆଡ୍ରେସ୍ ଟ୍ରେସ୍‌ରୁ ଉତ୍ତରପ୍ରଦେଶ ପୋଲିସକୁ ସଫଳତା ମିଳିଛି । ଆତ୍ମହତ୍ୟା କରିବାକୁ ଯାଉଥିବା ମହିଳାଙ୍କୁ ବଞ୍ଚାଇ ଦେଇଛି ପୋଲିସର ତ୍ଵରିତ ପଦକ୍ଷେପ ।

ସୂଚନା ଅନୁସାରେ, ଅବସାଦଗ୍ରସ୍ତ ମହିଳା ଜଣଙ୍କ ସୋସିଆଲ୍ ମିଡିଆରେ ଏକ ଭିଡିଓ ପୋଷ୍ଟ କରିଥିଲେ । ଆଉ ଉକ୍ତ ଭିଡିଓ ସୋସିଆଲ୍ ମିଡିଆରେ ଭାଇରାଲ୍ ହେବା ମାତ୍ରେ ଆସିଥିଲା ପୋଲିସର ନଜରକୁ । ସକାଳ ୮ଟାରେ ଭିଡିଓଟି ଆସିଥିଲା, ଯେଉଁଥିରେ ମହିଳା ଜଣଙ୍କ ସ୍ଵାମୀ ଅନ୍ୟମାନଙ୍କ ତାଙ୍କ ଜୀବନରେ ଅଶାନ୍ତି ପାଇଁ ଦାୟୀ କରିଥିଲେ । ଆଉ ତାଙ୍କ ମୃତ୍ୟୁ ପାଇଁ କାହାରିକୁ ଦାୟୀ କରାଯିବ ନାହିଁ ବୋଲି କହିଥିଲେ ।

ପୋଲିସ ନଜରକୁ ଭିଡିଓ ଆସିବା ମାତ୍ରେ ଆରମ୍ଭ ହୋଇଥିଲା ଆଇପି ଆଡ୍ରେସ୍ ଟ୍ରେସ୍ । ଆଉ ପୋଲିସ ଜାଣିବାକୁ ପାଇଥିଲା ମହିଳା ଜଣଙ୍କ ନୋଏଡା ସେକ୍ଟର-୨୮ରେ ରହୁଛନ୍ତି । ତୁରନ୍ତ ସେକ୍ଟର-୨୦ର ପୋଲିସ ଟିମ୍ ବାହାରି ପଡ଼ିଥିଲା । ଆଉ ସକାଳ ୮ଟା ୨୦ରେ ମହିଳା ଆତ୍ମହତ୍ୟା ଉଦ୍ୟମ କରୁଥିବା ବେଳେ ଉଦ୍ଧାର କରିବାରେ ସଫଳ ହୋଇଥିଲା ପୋଲିସ । ମହିଳାଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲରେ ଭର୍ତ୍ତି କରିଥିଲା ।

ମହିଳା ଜଣଙ୍କ ଏବେ ବିପଦ ମୁକ୍ତ ଏବଂ ଅବସାଦରେ ଥିବା ଡାକ୍ତର କହିଛନ୍ତି । ପୋଲିସ ଅନୁସାରେ, ମହିଳା ଜଣଙ୍କ ବୟସ ୩୦ ହେବ । ସେ ଏକ ପ୍ରତିଷ୍ଠିତ ଗଣମାଧ୍ୟମରେ କାର୍ଯ୍ୟ କରନ୍ତି । ୨୦୨୦ରେ ସେ ବିବାହ କରିଥିବା ବେଳେ ଏକାଧିକ ମାସ ହେଲା ସ୍ଵାମୀଙ୍କ ଠାରୁ ଅଲଗା ରହୁଛନ୍ତି । ଏହା ହିଁ ତାଙ୍କ ଅବସାଦର କାରଣ । ଏବେ ମହିଳାଙ୍କ କାଉନସେଲିଂ କରାଯିବା ସହ ଅବସାଦରୁ ମୁକ୍ତ ହେବା ଲାଗି ମାନସିକ ସହାୟତା ଦିଆଯାଉଛି ।

୨୦୨୨ ମସିହାରେ ଉତ୍ତରପ୍ରଦେଶ ପୋଲିସ ଫେସବୁକ୍ ଓ ଇନଷ୍ଟାଗ୍ରମରେ ଆତ୍ମହତ୍ୟା ସମ୍ପର୍କିତ ପୋଷ୍ଟର ଆଲର୍ଟ ପାଇବା ଲାଗି ମେଟା ସହ ସହଭାଗୀତା କରିଥିଲେ । ଆଉ ଏହି ସହଭାଗୀତା ଏବେ ଉତ୍ତରପ୍ରଦେଶ ପୋଲିସକୁ ସଫଳତା ଦେଇଛି ।