ରାସ୍ତା, ଘାଟ ସବୁ ଏକାକାର । ଜଳମଗ୍ନ ଘରଦ୍ବାର, ମନ୍ଦିର, ଥାନା, ସ୍କୁଲ । ବିପଦ ସଂକେତ ଡେଇଁଛି ଗଙ୍ଗା ଓ ଜମୁନାର ଜଳସ୍ତର । ହଜାର ହଜାର ଲୋକ ଘର ଛାଡ଼ିବାକୁ ବାଧ୍ୟ ହୋଇଛନ୍ତି । ରାସ୍ତାରେ ଲହଡ଼ି ଭାଙ୍ଗୁଛି ପାଣି । ମଣିକର୍ଣ୍ଣିକା, ଦଶାଶ୍ବମେଧ, ଅସୀ ଘାଟ ଓ ୮୪ ଘାଟ ବୁଡ଼ି ରହିଛି । ବାବା ବିଶ୍ବନାଥ ମନ୍ଦିର ଗଙ୍ଗା ଦ୍ବାରରେ ମାତ୍ର ୧୪ଟି ସିଡି ତଳେ ରହିଛି ଜଳସ୍ତର । ବାରାଣସୀରେ ଗଙ୍ଗା ଜଳସ୍ତର ବିପଦ ସଂକେତ ୭୦.୨୬ ମିଟର ଥିବାବେଳେ ୭୧.୩୧ ମିଟର ଉଚ୍ଚରେ ପ୍ରବାହିତ ହେଉଛି ଜଳ । ହଜାରେରୁ ଅଧିକ ପରିବାର ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ ହୋଇଛନ୍ତି । ଉଦ୍ଧାର କାର୍ଯ୍ୟରେ NDRF ଓ SDRF ଟିମ୍ ନିୟୋଜିତ ହୋଇଥିବାବେଳେ ୧୪ଟି ରିଲିଫ୍ କ୍ୟାମ୍ପ କରାଯାଇଛି । ପ୍ରଶାସନ ପକ୍ଷରୁ ସ୍ଥିତି ଉପରେ ସଜାଗ ନଜର ରଖାଯାଇଛି ।

ସହରର ତଳୁଆ ଅଞ୍ଚଳରେ ଥିବା ଅନେକ ଘର ବନ୍ୟାପାଣିରେ ବୁଡ଼ି ରହିଥିବାବେଳେ ବାରାଣସୀ ସହର ଜଳଘେରରେ ରହିଛି । ଉପର ମୁଣ୍ଡରେ ପ୍ରବଳ ବର୍ଷା ପରେ କେନ, ବେତୱା ଓ ଚମ୍ପଲ ନଦୀ ବନ୍ଧରୁ ପ୍ରାୟ ୧୦ ଲକ୍ଷ କ୍ୟୁସେକ ପାଣି ଛଡ଼ାଯିବା ପରେ ବେହାଲ ହୋଇଛି ସ୍ଥିତି ।
ବାରାଣସୀରେ ଲଗାଣ ବର୍ଷା ପରେ ବନ୍ୟା ସ୍ଥିତି ଗମ୍ଭୀର ହୋଇଥିବାବେଳେ ପାଣିପାଗ କେନ୍ଦ୍ର ପକ୍ଷରୁ ଜାରି ହୋଇଛି ଆଲର୍ଟ । ଶ୍ରୀନଗର, ଭୁବନେଶ୍ବର, କୋଲକାତା, ଦିଲ୍ଲୀ, କୋଲକାତାରେ ମଧ୍ୟ ପ୍ରବଳ ବର୍ଷା ଲାଗି ରହିଛି ।

ଆସାମ, ମେଘାଳୟ ସମେତ ପୂରା ଉତ୍ତର ଭାରତରେ ପ୍ରବଳ ବର୍ଷା ହେବା ନେଇ IMD ପକ୍ଷରୁ ସତର୍କ ସୂଚନା ଜାରି ହୋଇଛି । ଅରୁଣାଚଳ ପ୍ରଦେଶ, ବିହାର, ମଧ୍ୟ ପ୍ରଦେଶ, କେରଳ, ତାମିଲନାଡୁ, ପୁଦୁଚେରୀରେ ଲଗାଣ ବର୍ଷା ଯୋଗୁଁ ବ୍ୟାକ ଫସଲ ହାନୀ ହୋଇଛି । ଖୁବଶୀଘ୍ର କ୍ଷୟକ୍ଷତି ଆକଳନ ସହ ଚାଷୀଙ୍କୁ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି କେନ୍ଦ୍ର କୃଷିମନ୍ତ୍ରୀ ଶିବରାଜ ସିଂହ ଚୌହାନ ।

ବାରାଣସୀରେ ୧୯୭୮ ବନ୍ୟା ରେକର୍ଡ ଭାଙ୍ଗିବା ଆଶଙ୍କା କରିଛନ୍ତି ସ୍ଥାନୀୟ ବାସିନ୍ଦା । ସହରରେ ବିଭିନ୍ନ ସ୍ଥାନରେ ଲୋକଙ୍କ ଘରେ ଲହଡ଼ି ମାରୁଛି ପାଣି । ଘର ଭିତରେ ଲୋକେ ଗଙ୍ଗା ମାତାଙ୍କ ପୂଜା କରୁଥିବା ଦୃଶ୍ୟ ସାମ୍ନାକୁ ଆସିଛି ।