Vijay Fan Meet / ଲଣ୍ଡନରେ ବିଜୟଙ୍କ ଫ୍ୟାନ୍ ମିଟ୍‌ରେ ବ୍ରେକ୍, ଭିଡ଼କୁ ନେଇ ସୁରକ୍ଷା ଚିନ୍ତା

ଲଣ୍ଡନରେ ଦେଖାଗଲା ବିଜୟଙ୍କ ଜବରଦସ୍ତ କ୍ରେଜ୍... ଗୋଟିଏ ଝଲକ ପାଇଁ ‘ଦ ଶାର୍ଡ’ ବାହାରେ ଘଣ୍ଟା ଘଣ୍ଟା ଧରି ଅପେକ୍ଷା କଲେ ଶହ ଶହ ପ୍ରଶଂସକ । ଭିଡ଼ ଏତେ ବଢ଼ିଗଲା ଯେ ସୁରକ୍ଷାକୁ ନେଇ ଚିନ୍ତା ପ୍ରକାଶ କଲା ଲଣ୍ଡନ ପୋଲିସ୍, ଆଉ ଶେଷ ମୁହୂର୍ତ୍ତରେ ବାତିଲ ହେଲା ଫ୍ୟାନ୍‌ ମିଟ୍ । ତଥାପି ଲଣ୍ଡନ ରାସ୍ତାରେ ବିଜୟଙ୍କୁ ନେଇ ଦେଖାଯାଇଥିବା ଏହି ଉତ୍ସାହ ଏବେ ସୋସିଆଲ୍ ମିଡିଆରେ ଚର୍ଚ୍ଚାରେ ।

ତାମିଲନାଡୁ ମୁଖ୍ୟମନ୍ତ୍ରୀ ସି. ଜୋସେଫ ବିଜୟଙ୍କ ପ୍ରତି ଥିବା କ୍ରେଜ୍ କେବଳ ଦକ୍ଷିଣ ଭାରତରେ ସୀମିତ ନୁହେଁ । ଲଣ୍ଡନର ପ୍ରସିଦ୍ଧ ‘ଦ ଶାର୍ଡ’ ବାହାରେ ତାଙ୍କୁ ଦେଖିବା ପାଇଁ ଶହ ଶହ ପ୍ରଶଂସକଙ୍କ ଭିଡ଼ ଏହାର ପ୍ରମାଣ ଦେଇଛି । ବିଜୟଙ୍କ ଗୋଟିଏ ଝଲକ ପାଇବା ପାଇଁ ଅନେକ ପ୍ରଶଂସକ ଘଣ୍ଟା ଘଣ୍ଟା ଧରି ଅପେକ୍ଷା କରିଥିଲେ ।

ତେବେ ଭିଡ଼ ବଢ଼ିବା ପରେ ଲଣ୍ଡନର ମେଟ୍ରୋପଲିଟନ୍ ପୋଲିସ୍ ସୁରକ୍ଷା ନେଇ ଚିନ୍ତା ପ୍ରକାଶ କରିଥିଲା । ଆବଶ୍ୟକ ଅନୁମତି ନ ମିଳିବା ଏବଂ ଜନସୁରକ୍ଷାକୁ ଦୃଷ୍ଟିରେ ରଖି ଶେଷ ମୁହୂର୍ତ୍ତରେ ବିଜୟଙ୍କ ପ୍ରଶଂସକଙ୍କ ସହ ଭେଟ କାର୍ଯ୍ୟକ୍ରମ ବାତିଲ କରାଯାଇଥିଲା । ଆୟୋଜକଙ୍କ ପକ୍ଷରୁ ଲାଉଡସ୍ପିକରରେ ଏନେଇ ଘୋଷଣା କରାଯିବା ପରେ ଦୀର୍ଘ ସମୟ ଧରି ଅପେକ୍ଷା କରିଥିବା ପ୍ରଶଂସକମାନେ ନିରାଶ ହୋଇଥିଲେ ।

ବିଜୟ ତାମିଲନାଡୁକୁ ନୂଆ ପୁଞ୍ଜିନିବେଶ ଆଣିବା ଉଦ୍ଦେଶ୍ୟରେ ଏକ ସରକାରୀ ପ୍ରତିନିଧିମଣ୍ଡଳ ସହ ବ୍ରିଟେନ୍ ଗସ୍ତରେ ଯାଇଥିଲେ । ତାଙ୍କ ଗସ୍ତ ସମୟରେ ଲଣ୍ଡନରେ ପ୍ରାୟ ୧୨,୩୦୦ କୋଟି ଟଙ୍କାର ପୁଞ୍ଜିନିବେଶ ପ୍ରତିଶ୍ରୁତି ସମ୍ପର୍କିତ ବିଭିନ୍ନ ଏମଓୟୁ ସ୍ୱାକ୍ଷର ହୋଇଥିବା ରିପୋର୍ଟ କରାଯାଇଛି । ଏହି ପ୍ରକଳ୍ପଗୁଡ଼ିକ ମାଧ୍ୟମରେ ରାଜ୍ୟରେ ୯,୪୦୦ରୁ ଅଧିକ ଉଚ୍ଚମୂଲ୍ୟର ନିଯୁକ୍ତି ସୁଯୋଗ ସୃଷ୍ଟି ହେବା ଆଶା କରାଯାଉଛି ।

ଏହି ପୁଞ୍ଜିନିବେଶ ଅଭିଯାନ ତାମିଲନାଡୁକୁ ଉନ୍ନତ ମାନୁଫାକ୍ଚରିଂ ଏବଂ ଟେକ୍ନୋଲୋଜି କ୍ଷେତ୍ରରେ ଏସିଆର ଏକ ପ୍ରମୁଖ କେନ୍ଦ୍ର ଭାବେ ଗଢ଼ି ତୋଳିବା ଦିଗରେ ଉଦ୍ଦିଷ୍ଟ ବୋଲି ରାଜ୍ୟ ପକ୍ଷରୁ କୁହାଯାଇଛି । ବିଜୟଙ୍କ ବ୍ରିଟେନ୍ ଗସ୍ତ ବୁଧବାର ଶେଷ ହେବା ସହ ସେ ଭାରତ ଫେରିବା କାର୍ଯ୍ୟକ୍ରମ ରହିଛି ।