ମଧ୍ୟପ୍ରାଚ୍ୟରେ ଯୁଦ୍ଧ, ଚାରିଆଡ଼େ ହାହାକାର ! ସାରା ବିଶ୍ୱରେ ଏବେ LPG ବା ରନ୍ଧନ ଗ୍ୟାସ୍‌ର ଉତ୍କଟ ସଙ୍କଟ । ହେଲେ ଏହି ବଡ଼ ସମସ୍ୟାର ସମାଧାନ ବାହାର କରିଛି ଭାରତ । ଆମ ଦେଶର ପ୍ରତିଷ୍ଠିତ ଶିକ୍ଷାନୁଷ୍ଠାନ IIT ବମ୍ବେ ଏମିତି ଏକ ଚମତ୍କାର କରିଛି, ଯାହା ଏବେ ସାରା ଦୁନିଆ ପାଇଁ ଚର୍ଚ୍ଚାର ବିଷୟ ପାଲଟିଛି । ଆପଣ ଜାଣିଲେ ଆଶ୍ଚର୍ଯ୍ୟ ହେବେ, ଯେଉଁ ଶୁଖିଲା ପତ୍ରକୁ ଆମେ ଅଳିଆ ଭାବି ଫିଙ୍ଗିଦେଉ କିମ୍ବା ଜାଳିଦେଉ, ସେହି ପତ୍ର ଏବେ ରୋଷେଇ ଗ୍ୟାସ୍‌ର ବିକଳ୍ପ ସାଜିଛି । ବଞ୍ଚାଉଛି ଲକ୍ଷ ଲକ୍ଷ ଟଙ୍କା ଏବଂ ପ୍ରଦୂଷଣରୁ ଦେଉଛି ମୁକ୍ତି ।

ବର୍ତ୍ତମାନ ସମୟରେ ରୋଷେଇ ଗ୍ୟାସ୍‌ର ଦର ଆକାଶଛୁଆଁ ହେଉଥିବା ବେଳେ, ଏହାର ଅଭାବ ସମସ୍ତଙ୍କ ଚିନ୍ତା ବଢ଼ାଇ ଦେଇଛି । ଏହି ସଂକଟ ସମୟରେ IIT ବମ୍ବେର ବୈଜ୍ଞାନିକମାନେ ପ୍ରସ୍ତୁତ କରିଛନ୍ତି ଏକ ସ୍ୱଦେଶୀ ଜ୍ଞାନକୌଶଳ । ଏହାର ନାଁ ହେଉଛି ‘ବାୟୋମାସ୍ ଗ୍ୟାସିଫିକେସନ୍’। ଏହି ଟେକ୍ନୋଲୋଜି ସାହାଯ୍ୟରେ ଶୁଖିଲା ପତ୍ରରୁ ଏମିତି ଗ୍ୟାସ୍ ତିଆରି କରାଯାଉଛି, ଯାହା ସିଧାସଳଖ ବଡ଼ ବଡ଼ କ୍ୟାଣ୍ଟିନ୍‌ରେ ରୋଷେଇ ପାଇଁ ବ୍ୟବହାର ହେଉଛି ।

୨୦୧୪ରୁ ୨୦୨୬ର ସଫଳ କାହାଣୀ
ପ୍ରଫେସର ସଞ୍ଜୟ ମହାଜନୀଙ୍କ ନେତୃତ୍ୱରେ ଆରମ୍ଭ ହେଲା ପ୍ରୋଜେକ୍ଟ । କ୍ୟାମ୍ପସରେ ଜମା ହେଉଥିଲା କୁଢ଼ କୁଢ଼ ଶୁଖିଲା ପତ୍ର । ଏହାର ସଠିକ୍ ବ୍ୟବହାରର ଥିଲା ବଡ଼ ଲକ୍ଷ୍ୟ, ପ୍ରଥମେ ପ୍ରଥମେ ଏଥିରୁ ବହୁତ ଧୂଆଁ ବାହାରିଲା । ରୋଷେଇଆମାନେ ଏହାକୁ ବିରୋଧ କଲେ । କିନ୍ତୁ ବୈଜ୍ଞାନିକମାନେ ହାର୍ ମାନିଲେ ନାହିଁ । ୨୦୧୭ରେ ଏହି ପ୍ରୋଜେକ୍ଟରେ ସାମିଲ ହେଲେ ପ୍ରଫେସର ସନ୍ଦୀପ କୁମାର... ସେ ଏହାର ବର୍ଣ୍ଣର୍ ଡିଜାଇନ୍‌କୁ ଅଧିକ ଉନ୍ନତ କଲେ । ଆଜି ଏହି ସିଷ୍ଟମ ସଫଳତାର ସହ IIT କ୍ୟାମ୍ପସର ଷ୍ଟାଫ୍ କ୍ୟାଣ୍ଟିନ୍‌ରେ ଚାଲୁଛି । ଯେଉଁ ରୋଷେଇଆମାନେ ପୂର୍ବରୁ ବିରୋଧ କରୁଥିଲେ, ଏବେ ସେମାନେ ଏହି ନୂଆ ଚୁଲାରେ ଖୁବ୍ ଆରାମରେ ଶୀଘ୍ର ରୋଷେଇ କରିପାରୁଛନ୍ତି ।

ଏହି ଟେକ୍ନୋଲୋଜିର ବଡ଼ ଫାଇଦା
ଏହି ବିଶେଷ ପ୍ରକଳ୍ପ ଦ୍ୱାରା ଅନେକ ବଡ଼ ଫାଇଦା ମିଳୁଛି । କ୍ୟାଣ୍ଟିନ୍‌ରେ LPGର ବ୍ୟବହାର ପ୍ରାୟ ୪୦% କମିଯାଇଛି । ଏହାର ନିର୍ଗମନ ସ୍ତର ୨୦ PPMରୁ ମଧ୍ୟ କମ୍ । ଯାହା ପରିବେଶ ପାଇଁ ସମ୍ପୂର୍ଣ୍ଣ ସୁରକ୍ଷିତ । ବାର୍ଷିକ ପ୍ରାୟ ୮ ଟନ୍ ଅଙ୍ଗାରକାମ୍ଳ ନିର୍ଗମନ କମିଛି ।

IIT ବମ୍ବେ ଏହି ଟେକ୍ନୋଲୋଜିର ଲାଇସେନ୍ସ Infixen Energy Pvt. Ltd. ନାମକ ଏକ କମ୍ପାନୀକୁ ଦେଇଛି । ଏବେ ଏହାକୁ ବଡ଼ ବଡ଼ ହଷ୍ଟେଲରେ ଲଗାଇବାକୁ ପ୍ରସ୍ତୁତି ଚାଲିଛି । ଯଦି ଏହା ସମ୍ପୂର୍ଣ୍ଣ ଭାବେ ଲାଗୁ ହୁଏ, ତେବେ ବାର୍ଷିକ ପ୍ରାୟ ୫୦ ଲକ୍ଷ ଟଙ୍କା ବଞ୍ଚିବ । ୯୦ ଟନ୍ ଏଲ୍‌ପିଜି ଗ୍ୟାସ୍ ବଞ୍ଚାଯାଇ ପାରିବ । ୩୦୦ ଟନ୍ ଅଙ୍ଗାରକାମ୍ଳ ବାୟୁମଣ୍ଡଳକୁ ଯିବାରୁ ରକ୍ଷା ପାଇବ।

ଆଇଆଇଟି ବମ୍ବେର ଏହି ପ୍ରୟାସ ପ୍ରମାଣ କରିଛି ଯେ ଯଦି ଆମ ପାଖରେ ସଠିକ୍ ଜ୍ଞାନକୌଶଳ ଥାଏ, ତେବେ ଆମେ ବର୍ଜ୍ୟବସ୍ତୁରୁ ବି ଶକ୍ତି ଉତ୍ପନ୍ନ କରିପାରିବା । ଏହି ମଡେଲ୍ ଆଗାମୀ ଦିନରେ ସାରା ବିଶ୍ୱକୁ ଶକ୍ତି ସଙ୍କଟରୁ ମୁକ୍ତି ଦେବାରେ ଏକ ବଡ଼ ଦିଶା ଦେଖାଇବ । ଆଶା କରାଯାଉଛି ଏହି ଟେକ୍ନୋଲୋଜି ଖୁବ୍ ଶୀଘ୍ର ଆମ ଦେଶର ଅନ୍ୟ ସ୍ଥାନରେ ମଧ୍ୟ ଉପଯୋଗ ହେବ ଏବଂ ଏଲ୍‌ପିଜି ମହଙ୍ଗା ମାଡ଼ରୁ ସାଧାରଣ ଲୋକଙ୍କୁ ଆଶ୍ୱସ୍ତି ମିଳିବ।