ପଶ୍ଚିମବଙ୍ଗ ନିର୍ବାଚନ ମଇଦାନରେ ଓଡ଼ିଆ ନେତାଙ୍କ ଦମ୍‌ଦାର ପ୍ରଚାର । ଆସନ୍ତା ୨୩ ତାରିଖରେ ବଙ୍ଗଳାରେ ପ୍ରଥମ ପର୍ଯ୍ୟାୟ ମତଦାନ ହେବାକୁ ଥିବା ବେଳେ, ବିଜେପି ପାଇଁ ଭୋଟ୍ ମାଗୁଛନ୍ତି ଓଡ଼ିଶାର ମନ୍ତ୍ରୀ ଓ ବିଧାୟକ । ଖଡ଼ଗପୁରରୁ ନନ୍ଦିଗ୍ରାମ ପର୍ଯ୍ୟନ୍ତ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସମେତ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଓ ଅନ୍ୟାନ୍ୟ ବିଧାୟକମାନେ ଟିଏମସି ସରକାର ବିରୋଧରେ ହୁଙ୍କାର ଭରିଛନ୍ତି । ମମତା ସରକାରଙ୍କ ଦୁର୍ନୀତି ଓ ଅନୁପ୍ରବେଶକାରୀଙ୍କ ଗୁଣ୍ଡାରାଜକୁ ମୁଦ୍ଦା କରି ବେଙ୍ଗଲରେ ପରିବର୍ତ୍ତନର ସଙ୍କେତ ଦେଇଛନ୍ତି ଓଡ଼ିଆ ନେତା ।

ପଶ୍ଚିମବଙ୍ଗ ପ୍ରଚାର ମଇଦାନରେ ଓଡ଼ିଆ ମନ୍ତ୍ରୀ ଓ ବିଧାୟକ । ଖଡଗପୁର ବିଧାନସଭା ମଣ୍ଡଳୀରେ ଜୋରଦାର୍ ପ୍ରଚାର । ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଓ ବଡ଼ସାହି ବିଧାୟକ ସନାତନ ବିଜୁଳିଙ୍କ TMCକୁ ଆଟାକ୍ । କହିଲେ, ଏଥର ପଶ୍ଚିମଙ୍ଗରେ ନିଶ୍ଚିତ ହେବ ପରିବର୍ତ୍ତନ । ସେପଟେ ଦିଲୀପ ଘୋଷଙ୍କ ଅର୍ଗସକୁ ଏକ୍ସକ୍ଲୁସିଭ୍ ପ୍ରତିକ୍ରିୟା । ଅନୁଶାସନ ବଦଳରେ ଅନୁପ୍ରବେଶକାରୀଙ୍କ ରାଜ ନେଇ ମମତାଙ୍କୁ କଲେ ନିଶାନା ।

ଆସନ୍ତା ୨୩ ତାରିଖରେ ପଶ୍ଚିମବଙ୍ଗରେ ହେବାକୁ ଯାଉଛି ପ୍ରଥମ ପର୍ଯ୍ୟାୟ ମତଦାନ । ରାଜ୍ୟର ୧୫୨ ଜଣ ପ୍ରାର୍ଥୀଙ୍କର ହେବ ଭାଗ୍ୟ ପରୀକ୍ଷା । ଉଠୁଛି ପଡ଼ୁଛି ପ୍ରଚାର ମଇଦାନ। ମତଦାତାଙ୍କୁ ନିଜ ଆଡ଼କୁ ଆକର୍ଷିତ କରିବାକୁ ବିଭିନ୍ନ ଦଳ ଲଗାଇଛନ୍ତି ଜି ଜାନ୍ । ମମତା ସରକାରଙ୍କ ଦୁର୍ନୀତି, ଅନୁପ୍ରବେଶକାରୀଙ୍କ ଗୁଣ୍ଡାରାଜ, ସ୍ବାସ୍ଥ୍ୟ, ଶିକ୍ଷା ଆଦିକୁ ମୁଦ୍ଦା କରି ବିଜେପି ପ୍ରଚାର ମଇଦାନରେ ମମତା ଦିଦିଙ୍କୁ ନିଶାନା କରିଛି ।

ଗୋଟିଏ ଲକ୍ଷ୍ୟ, ବଙ୍ଗାଲରେ ଏଥର ମମତା ସରକାରକୁ ଗାଦିଚ୍ୟୁତ କରି ସବକା ସାଥ୍ ଓ ସବକା ବିକାଶ ସହ ବିଜେପି ସରକାର ଗଢିବା । ଆଉ ଏହାକୁ ନିଶ୍ଚିତ କରିବାକୁ ବଙ୍ଗଳା ନେତାଙ୍କ ସହ ମଇଦାନରେ ଝାଳ ବୁହାଉଛନ୍ତି ଓଡ଼ିଆ ନେତା ଓ ମନ୍ତ୍ରୀ । ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ଓ ବଡ଼ସାହି ବିଧାୟକ ସନାତନ ବିଜୁଳି ଖଡଗପୁର ବିଧାନସଭା ମଣ୍ଡଳୀରେ ଜୋରଦାର ପ୍ରଚାର କରିଛନ୍ତି । କହିଛନ୍ତି, ଏଥର ପରିବର୍ତ୍ତନ ନିଶ୍ଚିତ ହେବା ସହ ମୋଦିଙ୍କ ବିକାଶଧାରାରେ ସାମିଲ ହେବ ପୁରା ବେଙ୍ଗଲ।
ସେପଟେ ବେଙ୍ଗଲରେ ଚାଲିଥିବା ଗୁଣ୍ଡାରାଜକୁ ନେଇ ଅର୍ଗସକୁ EXCLUSIVE ପ୍ରତିକ୍ରିୟା ଦେଇଛନ୍ତି ଖଡ଼ଗପୁର ସଦର ନିର୍ବାଚନ ମଣ୍ଡଳୀର ପ୍ରାର୍ଥୀ ଦିଲୀପ ଘୋଷ ।

 କହିଛନ୍ତି, ଅନୁଶାସନ ବଦଳରେ ପଶ୍ଚିମବଙ୍ଗରେ ଚାଲିଛି ଅନୁପ୍ରବେଶକାରୀଙ୍କ ରାଜ । ଦୀର୍ଘ ଦିନ ଧରି ଶାସନ କ୍ଷମତାରେ ରହି କେବଳ ଅନୁପ୍ରବେଶକାରୀଙ୍କ ସଂଖ୍ୟା ବଢ଼ାଇଛନ୍ତି ମମତା ସରକାର । ଆଉ SIR କାରଣରୁ ୯୧ ଲକ୍ଷ ଭୋଟରଙ୍କ ନାଁ କଟିବା ପରେ ଏବେ ଟିଏମ୍ସି ଦଳର ସୁପ୍ରିମୋଙ୍କ ପାଇଁ ଏହା ବୁମେରାଂ ହୋଇଛି ।
ପଶ୍ଚିମବଙ୍ଗ ନନ୍ଦିଗ୍ରାମରେ ନିର୍ବାଚନୀ ସାଧାରଣ ସଭା କରିବା ସହ ଲୋକଙ୍କ ସହ ଆଲୋଚନା କରିଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ତାଙ୍କ ସହ ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ ଓ ବାଲେଶ୍ଵର ସଦର ବିଧାୟକ ମାନସ ଦତ୍ତ ବି ସାମିଲ୍ ହୋଇଥିଲେ । ଆସନ୍ତା ୨୩ ଓ ୨୯ରେ ଦୁଇଟି ପର୍ଯ୍ୟାୟରେ ପଶ୍ଚିମବଙ୍ଗରେ ପଡ଼ିବ ଭୋଟ୍ । ମେ ୪ ତାରିଖ ଭୋଟ ଗଣତି ପରେ ପ୍ରକାଶ ପାଇବ ଫଳାଫଳ ।