ମେସିଙ୍କ ଭାରତ ଗସ୍ତ ସାରା ବିଶ୍ୱ ଦେଖିଲା । ସାରା ଦେଶରେ ଏହାକୁ ନେଇ ଚର୍ଚ୍ଚା ଚାଲିଲା । ଆଉ ମେସିଙ୍କ ପାଇଁ ପଶ୍ଚିମବଙ୍ଗର ଏକ ଷ୍ଟାଡିୟମରେ ଯାହା ଘଟିଲା, ତା' ଉପରେ ବି ସାରା ଦେଶର ନଜର ରହିଲା । ଏହି ବିଶୃଙ୍ଖଳା କାଳ କାଳ ପାଇଁ ଲୋକଙ୍କ ମନରେ ରହିଯିବ । ତେବେ ଏହାରି ଭିତରେ ଆଉ ଏକ ବଡ଼ ଘଟଣା ଘଟିଯାଇଛି । ଆଉ ତାହା ହେଲା ପଶ୍ଚିମବଙ୍ଗରେ ଆୟୋଜିତ ମେସି କାର୍ଯ୍ୟକ୍ରମରେ ଯେଉଁ ବିଭ୍ରାଟ ଘଟିଲା, ସେଥିପାଇଁ ଜଣେ ମନ୍ତ୍ରୀଙ୍କ ପଦ ଗଲା ।

ପଶ୍ଚିମବଙ୍ଗର କ୍ରୀଡ଼ାମନ୍ତ୍ରୀ ଅରୁପ ବିଶ୍ବାସ ଏଥିପାଇଁ ଇସ୍ତଫା ଦେବାକୁ ବାଧ୍ୟ ହୋଇଛନ୍ତି । ମମତାଙ୍କ ସରକାର ତାଙ୍କୁ ମନ୍ତ୍ରୀ ପଦରୁ ଇସ୍ତଫା ଦେବା ପାଇଁ ଚାପ ପକାଇଲେ । ଯାହାଫଳରେ ସେ ଇସ୍ତଫା ଦେବାକୁ ବାଧ୍ୟ ହେଲେ । ଖାଲି ସେତିକି ନୁହେଁ ଏହି ଘଟଣା ପାଇଁ ବେଙ୍ଗଲ ପୋଲିସ ମହାନିର୍ଦ୍ଦେଶକଙ୍କୁ ସୋ କଜ୍‌ ନୋଟିସ ମଧ୍ୟ ଦିଆଯାଇଛି । ବିଧାନନଗର ପୋଲିସ କମିଶନରଙ୍କୁ ମଧ୍ୟ ଅଫିସିଆଲି କୈଫତ ମାଗିଛନ୍ତି ସରକାର ।

ଉଭୟଙ୍କୁ ୨୪ ଘଣ୍ଟା ମଧ୍ୟରେ ରିପୋର୍ଟ କରିବାକୁ ନିର୍ଦ୍ଦେଶ ଦେଇଛନ୍ତି ମମତା ସରକାର । ସେହିଭଳି ବିଧାନନଗର ଡିସିପିଙ୍କୁ ମଧ୍ୟ ଏହି ଘଟଣା ପାଇଁ ସସ୍‌ପେଣ୍ଡ କରାଯାଇଛି । ଆଉ ବିଭାଗୀୟ ତଦନ୍ତ ମଧ୍ୟ ଆରମ୍ଭ ହୋଇଛି । ମେସିଙ୍କ ପଶ୍ଚିମବଙ୍ଗ ଗସ୍ତ ବେଳେ ଯାହା ଘଟିଲା, ତାହା ଭାରତର ସମ୍ମାନ ପ୍ରତି ଆଞ୍ଚ ବୋଲି କହିଲେ ଭୁଲ ହେବନି । କାରଣ ବିଶ୍ୱର ଜଣେ ବଡ଼ ଖେଳାଳି ଭାରତକୁ ଅତିଥି ଭାବେ ଆସିଥିଲେ । ଏଥିପାଇଁ ପ୍ରାୟ ଦେଢ଼ ଶହ କୋଟି ଖର୍ଚ୍ଚ ହୋଇଥିଲା ବୋଲି ମଧ୍ୟ କୁହାଯାଉଛି । ହେଲେ ସେଠାରେ ଷ୍ଟାଡିୟମରେ ଦର୍ଶକମାନେ ଚେୟାର ଭାଙ୍ଗିଲେ, ହୋର୍ଡିଂ ଚିରିଲେ, ପାଣି ବୋତଲ ମାରିଲେ, ପଡ଼ିଆ ମଧ୍ୟକୁ ପ୍ରବେଶ କରି ହଙ୍ଗାମା କଲେ, ଷ୍ଟାଡିୟମକୁ ଛିନ୍‌ଛତ୍ର କଲେ । ଯାହା ଫଳରେ ଅତିଥିଙ୍କ ଆଗରେ ଲଜ୍ଜିତ ହେଲା ପଶ୍ଚିମବଙ୍ଗ ଓ ଭାରତ ।

ମେସିଙ୍କୁ ଦେଖିବା ପାଇଁ ୫ ହଜାରରୁ ଆରମ୍ଭ କରି ୨୫ ହଜାର ପର୍ଯ୍ୟନ୍ତ ଖର୍ଚ୍ଚ କରି ଟିକେଟ କିଣିଥିଲେ ଦର୍ଶକ । ହେଲେ ମେସିଙ୍କର ଝଲକ୍‌ ଟିକେ ବି ପାଇଲେନି । କେତେବେଳେ ମେସି ପଡ଼ିଆକୁ ଆସିଲେ ଆଉ କେତେବେଳେ ଚାଲିଗଲେ ତାହା ଦର୍ଶକ ଜାଣିପାରିଲେନି । କାରଣ ମେସିଙ୍କ ଚାରିପଟେ ଘେରି ରହିଥିଲେ, ରାଜନେତା ଓ ଅନ୍ୟ ବ୍ୟକ୍ତିମାନେ । ଯେଉଁଥିପାଇଁ ଚିହିଁକି ଉଠିଥିଲେ ଦର୍ଶକ । ଆଉ ଷ୍ଟାଡିୟମରେ କରିଥିଲେ ହଙ୍ଗାମା ।