Fish Safety Alert / ନେପାଳ ବନ୍ୟାରେ ଭାସିଯାଇଥିବା ମାଛ ଖାଇବାକୁ ବିହାର ସରକାର କାହିଁକି ମନା କରୁଛନ୍ତି ?

ବିହାରରେ ବନ୍ୟା ପରିସ୍ଥିତି ମଧ୍ୟରେ ସ୍ୱାସ୍ଥ୍ୟ ସୁରକ୍ଷାକୁ ନେଇ ସରକାରଙ୍କ ପକ୍ଷରୁ ହେଲ୍ଥ ଆଡଭାଇଜରି ଜାରି କରାଯାଇଛି । ବନ୍ୟା ପାଣିରୁ ଧରାଯାଇଥିବା ମାଛ ନଧରିବା, ନକିଣିବା, ନବିକିବା ଏବଂ ନଖାଇବାକୁ ଲୋକଙ୍କୁ ପରାମର୍ଶ ଦିଆଯାଇଛି । ବିଶେଷକରି ମାଛର ପ୍ରଜାତି କିମ୍ବା ଏହା କେଉଁଠାରୁ ଆସିଛି ତାହା ଜଣାନଥିଲେ ଖାଇବାରୁ ଦୂରେଇ ରହିବାକୁ କୁହାଯାଇଛି ।

ନେପାଳରେ ହଠାତ୍ ବନ୍ୟା ଆସିବା ପରେ ତ୍ରିଶୁଳୀ ନଦୀର ଜଳସ୍ତର ବଢ଼ିଥିବା ବେଳେ ଗଣ୍ଡକ ଓ କୋସି ନଦୀ ପ୍ରଣାଳୀ ଦେଇ ବିହାରକୁ ଜଳ ପ୍ରବାହ ବଢ଼ିଛି । ବନ୍ୟା ପାଣିରେ ଅଜଣା ପ୍ରଜାତିର ମାଛ ଦେଖାଯାଉଥିବା ନେଇ ମଧ୍ୟ ଲୋକେ ସୂଚନା ଦେଇଛନ୍ତି ।

ପଶୁ ଓ ମତ୍ସ୍ୟ ସମ୍ପଦ ବିଭାଗ ଅନୁସାରେ ବନ୍ୟା ପାଣିରେ ନର୍ଦ୍ଦମା ପାଣି, ବ୍ୟାକ୍ଟେରିଆ, ଭାଇରସ୍ ଓ ବିଭିନ୍ନ ରୋଗ ସୃଷ୍ଟିକାରୀ ଜୀବାଣୁ ରହିପାରେ । ପୋଖରୀ, ନଦୀ ଓ ଜଳାଶୟରୁ ଭାସିଆସୁଥିବା ମାଛ ଅଳିଆ ଆବର୍ଜନା, ନର୍ଦ୍ଦମା, ମୃତ ପଶୁ ଏବଂ ବିଭିନ୍ନ ପ୍ରଦୂଷକ ସଂସ୍ପର୍ଶରେ ଆସିଥାଇପାରେ ।

ଏଭଳି ମାଛ ଖାଇବା ପରେ ବାନ୍ତି, ଝାଡ଼ା, ପେଟ ଯନ୍ତ୍ରଣା, ମୁଣ୍ଡ ବୁଲାଇବା କିମ୍ବା ଶ୍ୱାସକଷ୍ଟ ଭଳି ଲକ୍ଷଣ ଦେଖାଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ କୁହାଯାଇଛି । ଅଜଣା ପ୍ରଜାତିର ମାଛ ଦେଖିଲେ ସ୍ଥାନୀୟ ମତ୍ସ୍ୟ ଅଧିକାରୀ କିମ୍ବା ଜିଲ୍ଲା ପ୍ରଶାସନକୁ ଜଣାଇବାକୁ ମଧ୍ୟ ପରାମର୍ଶ ରହିଛି ।

ବନ୍ୟା ପରେ ବଢ଼ିପାରେ ରୋଗ ଆଶଙ୍କା
ଗଣ୍ଡକ ଓ କୋସି ନଦୀର ବନ୍ୟାଜଳ ସହ ମାଟି, ଆବର୍ଜନା, ଗଛର ଗଣ୍ଡି ଓ ମୃତ ମାଛ ଭାସିଆସୁଛି । ଦୂଷିତ ବନ୍ୟାପାଣି କୂଅ ଓ ନଳକୂପରେ ପଶିଲେ ଡାଇରିଆ, ହଇଜା, ଟାଇଫଏଡ୍ ଏବଂ ହେପାଟାଇଟିସ୍-ଏ ଓ ଇ ଭଳି ରୋଗର ଆଶଙ୍କା ବଢ଼ିପାରେ । ଅନ୍ୟପଟେ ଜମା ପାଣି ଯୋଗୁଁ ଡେଙ୍ଗୁ, ମ୍ୟାଲେରିଆ ଓ ଚିକୁନଗୁନିଆ ଭଳି ମଶାବାହିତ ରୋଗ ବଢ଼ିବାର ଆଶଙ୍କା ରହିଛି ।

ସୀମାନ୍ତ ଅଞ୍ଚଳରେ ଭୂତଳ ଜଳରେ ଆର୍ସେନିକ୍ ଓ ଆଇରନ୍ ପ୍ରଦୂଷଣ ସମସ୍ୟା ଥିବାରୁ ବନ୍ୟା ପରେ ଜଳର ଗୁଣବତ୍ତାକୁ ନେଇ ମଧ୍ୟ ଚିନ୍ତା ବଢ଼ିଛି । ଏଭଳି ସ୍ଥିତିରେ ଲୋକଙ୍କୁ ଅଫବାହ ଉପରେ ବିଶ୍ୱାସ ନକରି କେବଳ ସରକାରୀ ସୂଚନା ଉପରେ ଭରସା କରିବାକୁ ଅପିଲ୍ କରାଯାଇଛି ।