ଛାତ୍ର ଆତ୍ମହତ୍ୟା, ବା ଛାତ୍ରୀ ଆତ୍ମହତ୍ୟା । କିଛି ବର୍ଷ ଧରି ଏହା ରାଜ୍ୟରେ ବଢିବାରେ ଲାଗିଛି । ଯଦି ଏନସିଆରବି ରିପୋର୍ଟକୁ ଦେଖାଯାଏ ତେବେ ରାଜ୍ୟରେ ପ୍ରତିଦିନ ହାରାହାରି ୧୫ରୁ ଅଧିକ ଆତ୍ମହତ୍ୟା କରୁଛନ୍ତି । ସେଥିରେ ୩୦ ବର୍ଷରୁ କମ ବୟସର ପିଲା ଅଧିକ ରହିଛନ୍ତି । ସେହିପରି ପ୍ରତି ଲକ୍ଷେ ଲୋକଙ୍କ ମଧ୍ୟରୁ ବର୍ଷକୁ ୧୨ ଜଣ ଆତ୍ମହତ୍ୟା କରୁଛନ୍ତି ।

ଆତ୍ମହତ୍ୟାର ଏକ ମୁଖ୍ୟ କାରଣ ହେଉଛି ମାନସିକ ଅଶାନ୍ତି । ଯେତେବେଳେ ପିଲାଟି ନିଜ ପରିବାର ତଥା ନିଜର ବନ୍ଧୁ ପରିଜନ କିମ୍ବା ନିଜ ପ୍ରିୟ ଲୋକଙ୍କ ପାଖରୁ ନିରାଶ ହୁଏ, ସେତେବେଳେ ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଥାଏ । କେଉଁ କାରଣ ପାଇଁ ମାନସିକ ଶାନ୍ତି ହରାଇ ବସେ, ଆଉ ଏହାର ବିଶେଷ ନିରାକରଣ କ'ଣ ତାହା ଆସନ୍ତୁ ଜାଣିବା ।

ମାନସିକ ଅଶାନ୍ତି ମୁଖ୍ୟ କାରଣ ଗୁଡିକ ହେଉଛି, ପାଠପଢାରେ ବିଫଳତା, ପରିବାରରେ ଅଶାନ୍ତି, ପ୍ରେମରେ ବିଫଳତା, ଅତ୍ୟଧିକ ନିଶା ଦ୍ରବ୍ୟ, ଅନଲାଇନ ଗେମ୍ , ବୃତ୍ତିଗତ ସମସ୍ୟା ।

ପାଠପଢାରେ କେଉଁ ଛାତ୍ର ଅଧିକ ଆଗ୍ରହୀ ଥାଆନ୍ତି, ତ ପୁଣି କେଉଁ ଛାତ୍ର ଯେତେ ଚେଷ୍ଟା କଲେ ମଧ୍ୟ ସେଥିରେ ସଫଳତା ହାସଲ କରିପାରିନଥାନ୍ତି । ସେହି ସମୟରେ ପରୀକ୍ଷାରେ ନମ୍ବର କମ କାରଣରୁ ପରିବାର ବନ୍ଧୁ ସାଙ୍ଗଙ୍କ ଠାରୁ ଅନେକ ଟାହି ଟାପରା ଶୁଣିବାକୁ ମିଳେ । ସେମାନେ ପିଲାର ମାନସିକ ସ୍ଥିତି ବୁଝିବା ପରିବର୍ତ୍ତେ, କେଉଁ କାରଣରୁ ସେ ପାଠରେ ପଛାଉଛି, ତାର କୌଣସି ନିରାକରଣ ନକରି ତାକୁ ମାନସିକ ଚାପ ଦେଇଥାନ୍ତି ।

ଯେଉଁ କାରଣରୁ ପିଲାଟି ଆଗକୁ ମଦେଇ ପାଠପଢିବାକୁ ଚେଷ୍ଟା କରିବା ପରିବର୍ତ୍ତେ ନିଜର ଖରାପ ନମ୍ବର ପାଇଁ ଅତ୍ୟଧିକ ଅନୁତାପ କରିଥାଏ । ଆଉ ଏହି ବିଫଳତା ଧିରେ ଧିରେ ମନରେ ଏକ ପ୍ରକାର ବିଷାଦ ଚିନ୍ତା ସୃଷ୍ଟି କରିଥାଏ । କାହାକୁ ନିଜ ମନର ଚିନ୍ତା ଜଣାଇ ନପାରି, ଆତ୍ମହତ୍ୟା ଭଳି ଚରମ ନିଷ୍ପତ୍ତି ନେଇଥାଏ ।

ରିପୋର୍ଟରୁ ଜଣା ପଡିଛି, ଆତ୍ମହତ୍ୟା କରୁଥିବା ଛାତ୍ରଛାତ୍ରୀଙ୍କ ମଧ୍ୟରେ ୧.୪ ପ୍ରତିଶତ ପିଲା ପରୀକ୍ଷାରେ ଅକୃତକାର୍ଯ୍ୟ ହେବା ଯୋଗୁଁ ଆତ୍ମହତ୍ୟା କରିଥାନ୍ତି ।

ପରିବାରରେ ଅଶାନ୍ତି ଆତ୍ମହତ୍ୟାର ଏକ ମୁଖ୍ୟ କାରଣ ବୋଲି ପ୍ରମାଣିତ ହୋଇଛି । ମୋଟ ଆତ୍ମହତ୍ୟା ଘଟଣାର ୩୩.୬ ଶତାଂଶ କେବଳ ପାରିବାରିକ ହିଂସା ଓ କନ୍ଦଳ ହେତୁ ଘଟୁଛି । ପରିବାରରେ ସ୍ଵାମୀ , ସ୍ତ୍ରୀ ମଧ୍ୟରେ ଝଗଡା, କିମ୍ବା କୌଣସି ଛୋଟ ରଗ ରୁଷାରୁ ଆରମ୍ଭ ହୋଇଥାଏ ବଡ କଳହ ।

ଆଉ ଏଥିରେ ଧୈର୍ଯ୍ୟହରା ହୋଇ ରାଗରେ ଆତ୍ମହତ୍ୟାର ରାସ୍ତା ଆପଣାଇଥାନ୍ତି । କିମ୍ବା ବିଭିନ୍ନ ପ୍ରକାରର ରୋଗ ବ୍ୟାଧିର ଯନ୍ତ୍ରଣାରୁ ମୁକ୍ତି ପାଇବାକୁ ଏମିତି ୮ ଶତାଂଶ ଆତ୍ମହତ୍ୟା ଘଟୁଥିବା ସୂଚନା ରହିଛି ।

ଅଧିକାଂଶ ଯୁବକ ଯୁବତୀ ପ୍ରେମରେ ବିଫଳତାକୁ ନେଇ ମଧ୍ୟ ଆତ୍ମହତ୍ୟା କରିଥାନ୍ତି । ପ୍ରେମରେ ଜଣେ ଅନ୍ୟ ଜଣଙ୍କ କଥା ବୁଝି ନପାରିଲେ , ଜଣେ ଅନ୍ୟ ଜଣଙ୍କୁ ଧୋକା ଦେଲେ, କିମ୍ବା ଯଦି ପରିବାର ପକ୍ଷରୁ ଅଲଗା କରିବାର ବାଧ୍ୟ ବାଧକତା ଥାଏ, ତେବେ ସେ କ୍ଷେତ୍ରରେ ହଠାତ ଏପରି ନିଷ୍ପତ୍ତି ନିଅନ୍ତି ଯୁବପିଢୀ । ଯାହା ଦେଖାଯାଏ, ପ୍ରେମରେ ବିଫଳତା କାରଣରୁ ୪.୪ ପ୍ରତିଶତ ଯୁବକ ଯୁବତୀ ଆତ୍ମହତ୍ୟା କରିଥାନ୍ତି ।

ସେହିପରି ନିଶା ଦ୍ରବ୍ୟରେ ଆସକ୍ତ ହୋଇ ୬ ପ୍ରତିଶତ ବ୍ୟକ୍ତି ଆତ୍ମହତ୍ୟା କରିଥାନ୍ତି । ବୃତ୍ତିଗତ କାରଣ ମଧ୍ୟ ଆତ୍ମହତ୍ୟାର ଏକ ମୁଖ୍ୟ କାରଣ । ଯେତେବେଳେ ଆୟ କମେ ଆଉ ବ୍ୟୟ ବଢିଯାଏ , ସେତେବେଳେ ବ୍ୟକ୍ତି ମୁଣ୍ଡରେ କିଛି ଏଭଳି ଚିନ୍ତାଧାରା ଜନ୍ମ ନେଇଥାଏ । ବେଳେବେଳେ ଅଫିସ୍‌ରେ ବସ୍‌ର ପ୍ରେସରକୁ ମଧ୍ୟ ସହି ନପାରି ହଠାତ ରାଗ ଏବଂ କ୍ରୋଧରେ କିଛି କର୍ମଚାରୀ ଆତ୍ମହତ୍ୟା ଭଳି ନିଷ୍ପତ୍ତି ନିଅନ୍ତି ।

ଆତ୍ମହତ୍ୟାର ମୁଖ୍ୟ କାରଣ ମନରେ ରାଗ ଏବଂ କ୍ରୋଧ ଅଚାନକ ବଢିଯିବା । କ୍ଷଣିକ ଉତ୍ତେଜନାରେ ବଶୀଭୁତ ହୋଇ ଏପରି ନିଷ୍ପତ୍ତି ନେଉଛନ୍ତି ।

ଯଦି କେହି ଡିପ୍ରେସନରେ ରହୁଥିବା, କିମ୍ବା ଏକୁଟିଆ ରହିବା, କାହାସହ ବିଶେଷ କଥାବାର୍ତ୍ତା ନକରିବାକୁ ପସନ୍ଦ କରୁଛନ୍ତି, ତେବେ ତାଙ୍କ ସହ ପ୍ରଥମେ ପରିବାର କିମ୍ବା ତାଙ୍କର ଆତ୍ମୀୟ ସ୍ବଜନ କଥା ହେବା ଆବଶ୍ୟକ ।

ତାଙ୍କ ସହ ବନ୍ଧୁ ଭଳି ବ୍ୟବହାର କରି , ତାଙ୍କ ମନକଥା ମନ ଖୋଲି ପ୍ରକାଶ କରିବା ପାଇଁ ତାଙ୍କୁ ସାହାସ ଦେବା । ବିଶେଷ ଭାବେ ବ୍ୟକ୍ତିର ମାନସିକ ଚାପର କାରଣ ଜାଣିଲେ ସମସ୍ତ ସମସ୍ୟାର ସମାଧାନ ହୋଇପାରିବ ।

ଏଥିସହ ଡାକ୍ତରଙ୍କ ପରାମର୍ଶ କରିବା ନିହାତି ଦରକାର । ମାନସିକ ସାନ୍ତ୍ଵନା ହିଁ ଆତ୍ମହତ୍ୟା କରୁଥିବା ଲୋକର ମନ ପରିବର୍ତ୍ତନ କରିଥାଏ ।