Husband Builds Temple / ସ୍ୱାମୀଙ୍କ ଜୀବନ ବଞ୍ଚାଇବାକୁ ମାଗିଥିଲେ ଭିକ୍ଷା, ପତ୍ନୀଙ୍କ ପାଇଁ ମନ୍ଦିର ନିର୍ମାଣ କରିଛନ୍ତି ସ୍ୱାମୀ

Key Points
ପତ୍ନୀଙ୍କ ପାଇଁ ମନ୍ଦିର ନିର୍ମାଣ କରୁଛନ୍ତି ସ୍ୱାମୀ
ସ୍ୱାମୀ-ସ୍ତ୍ରୀଙ୍କ ସମ୍ପର୍କ କେବଳ ସାତ ଜନ୍ମର ବନ୍ଧନ ନୁହେଁ, ବରଂ ଏହା ପ୍ରେମ, ତ୍ୟାଗ ଓ ସମର୍ପଣର ଏକ ଅତୁଟ କାହାଣୀ । ଗୁଜରାଟର ପଞ୍ଚମହଲ ଜିଲ୍ଲାର ଗୋଧରାରୁ ଏଭଳି ଏକ ହୃଦୟସ୍ପର୍ଶୀ ଘଟଣା ସାମ୍ନାକୁ ଆସିଛି । ଜଣେ ସ୍ୱାମୀ ନିଜ ଦିବଙ୍ଗତ ପତ୍ନୀଙ୍କ ତ୍ୟାଗ ଓ ଭଲପାଇବାକୁ ଅମର କରି ରଖିବା ପାଇଁ ନିଜ ଚାଷଜମିରେ ତାଙ୍କର ମନ୍ଦିର ନିର୍ମାଣ କରୁଛନ୍ତି ।
୬୫ ବର୍ଷୀୟ ବାବୁଭାଇ ଲିମ୍ବା ନିଜ ପତ୍ନୀ ସୁଂଘାଡ଼ିବେନଙ୍କୁ ଭଗବାନଙ୍କ ସମାନ ମାନନ୍ତି । କାରଣ ଦୀର୍ଘ ୧୯ ବର୍ଷ ପୂର୍ବେ ଏକ ଭୟଙ୍କର ଦୁର୍ଘଟଣାରେ ସ୍ୱାମୀଙ୍କ ଜୀବନ ବିପଦରେ ପଡ଼ିଥିବା ବେଳେ ପତ୍ନୀ ନିଜର ସବୁକିଛି ବାଜି ଲଗାଇ ତାଙ୍କ ଜୀବନ ବଞ୍ଚାଇଥିଲେ ।
ସ୍ୱାମୀଙ୍କ ଚିକିତ୍ସା ପାଇଁ ମାଗିଥିଲେ ଭିକ୍ଷା
୨୦୦୭ ମସିହାରେ ଚାଷଜମିରେ କାମ କରୁଥିବା ସମୟରେ ଏକ ଦୁର୍ଘଟଣାରେ ବାବୁଭାଇଙ୍କ ବାମ ହାତ କଟିଯାଇଥିଲା । ସେତେବେଳେ ୬ ଜଣ ପିଲାଙ୍କ ପରିବାରରେ ସେ ହିଁ ଏକମାତ୍ର ରୋଜଗାର କରୁଥିବା ବ୍ୟକ୍ତି ଥିଲେ । ଏଭଳି ସ୍ଥିତିରେ ପରିବାର ଉପରେ ଦୁଃଖର ପାହାଡ଼ ଭାଙ୍ଗି ପଡ଼ିଥିଲା ।
କିନ୍ତୁ ସୁଂଘାଡ଼ିବେନ ହାର ମାନି ନଥିଲେ । ସ୍ୱାମୀଙ୍କ ଚିକିତ୍ସା ପାଇଁ ପ୍ରଥମେ ଘରର ବାସନକୁସନ ବିକ୍ରି କରିଦେଇଥିଲେ । ଏଥିରେ ମଧ୍ୟ ଟଙ୍କା ନିଅଣ୍ଟ ହେବାରୁ ସେ ଲୋକଙ୍କ ଦୁଆରକୁ ଯାଇ ଭିକ୍ଷା ମାଗିଥିଲେ । ଏପରିକି ସ୍ୱାମୀଙ୍କ ଚିକିତ୍ସା ପାଇଁ ବିଭିନ୍ନ ହସ୍ପିଟାଲ ଦୌଡ଼ିଥିଲେ । ଶେଷରେ ତାଙ୍କର ଅକ୍ଳାନ୍ତ ପରିଶ୍ରମ ଓ ତ୍ୟାଗ ଯୋଗୁଁ ବାବୁଭାଇଙ୍କ ଜୀବନ ବଞ୍ଚିଯାଇଥିଲା ।
ପତ୍ନୀଙ୍କ ସ୍ମୃତିରେ ନିର୍ମାଣ ହେଉଛି ମନ୍ଦିର
ଗତବର୍ଷ ସୁଂଘାଡ଼ିବେନଙ୍କ ଦେହାନ୍ତ ହୋଇଥିଲା । ପତ୍ନୀଙ୍କୁ ହରାଇବା ପରେ ବାବୁଭାଇ ସମ୍ପୂର୍ଣ୍ଣ ଭାଙ୍ଗି ପଡ଼ିଥିଲେ । ତାଙ୍କର ନିଃସ୍ୱାର୍ଥପର ପ୍ରେମ ଓ ତ୍ୟାଗକୁ ଆଗାମୀ ପିଢ଼ି ପାଇଁ ମନେ ରଖିବାକୁ ସେ ନିଜ ଚାଷଜମିରେ ପତ୍ନୀଙ୍କ ମନ୍ଦିର ନିର୍ମାଣ କରିବାକୁ ନିଷ୍ପତ୍ତି ନେଇଛନ୍ତି । ମନ୍ଦିର ନିର୍ମାଣ କାମ ମଧ୍ୟ ଆରମ୍ଭ ହୋଇଛି । ତାଙ୍କର ୧୫ ଜଣିଆ ଯୌଥ ପରିବାର ମଧ୍ୟ ଏହି ମହତ୍ କାର୍ଯ୍ୟରେ ସାଥ୍ ଦେଉଛନ୍ତି ।
'ପତ୍ନୀ ନଥିଲେ ମୁଁ ବଞ୍ଚି ନଥାନ୍ତି'
ପତ୍ନୀଙ୍କ କଥା ମନେ ପଡ଼ିଲେ ବାବୁଭାଇ ଭାବବିହ୍ୱଳ ହୋଇ କାନ୍ଦି ପକାନ୍ତି । ସେ କହନ୍ତି, 'ମୋର ଖରାପ ସମୟରେ ଯଦି ମୋ ପତ୍ନୀ ମୋ ସହିତ ନଥାନ୍ତେ, ତେବେ ମୁଁ କେବେଠାରୁ ମରିସାରନ୍ତି ।' ବାସ୍ତବରେ ଏହି ମନ୍ଦିର କେବଳ ଇଟା ଓ ପଥରର ନିର୍ମାଣ ନୁହେଁ, ଏହା ଜଣେ ନାରୀଙ୍କ ଅସୀମ ତ୍ୟାଗ, ଭଲପାଇବା ଓ ସମର୍ପଣର ଏକ ଅମର ସ୍ମୃତି ହୋଇ ରହିବ ।
📱 Get Argus News App
✨Related Topics
Explore more stories