ଦୀର୍ଘ ୧୮ ବର୍ଷ ପରେ ଗର୍ଭବତୀ ହେଲେ ମହିଳା , ଆଉ ସେ ବି ଆର୍ଟିଫିସିଆଲ ଇଣ୍ଟେଲିଜେନ୍ସ ମାଧ୍ୟମରେ । ଏମିତି ଏକ ଖବର ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି । ଏକ ଦମ୍ପତ୍ତି ପିଲାଟିଏ ପାଇଁ ୧୮ ବର୍ଷ ହେବ ଚେଷ୍ଟା କରି ଆସୁଛନ୍ତି । ସେମାନେ ବିଶ୍ଵର ଅନେକ ସ୍ଥାନରେ ଅନେକ ଥର ଆଇଭିଏଫ (IVF) ପାଇଁ ମଧ୍ୟ ଚେଷ୍ଟା କରିଛନ୍ତି, ହେଲେ କୌଣସି ଥର ସେ ଗର୍ଭଧାରଣ କରି ପାରିନାହାନ୍ତି । ଆଜୋସ୍ପରମିଆ (azoospermia)  ଯୋଗୁଁ ଅନେକ ଥର ତାଙ୍କର ଆଇଭିଏଫ ହୋଇପାରିନାହିଁ । ଏହି ଆଜୋସ୍ପର୍‌ମିଆ ଏମିତି ଏକ ସ୍ଥିତି ଯେଉଁଥିରେ, ପୁରୁଷର ସିମେନ(Semen)ରେ ଉପଯୁକ୍ତ ଶୁକ୍ରାଣୁ ନଥାଏ । କାରଣ ଗୋଟେ ସୁସ୍ଥ ପୁରୁଷର ଗୋଟେ ମିଲିଲିଟର ସିମେନରେ ଲକ୍ଷ ଲକ୍ଷ ଶୁକ୍ରାଣୁ ରହିଥାଏ । ଏପରି ପରିସ୍ଥିତିରେ ପ୍ରଜନନ ହୋଇପାରେ ନାହିଁ । 

ତେବେ ଏହି ଦମ୍ପତ୍ତି ଅନେକ ସ୍ଥାନକୁ ଯାଇ ଏ ସମ୍ପର୍କରେ ବିଫଳ ହେବାପରେ କୋଲୋମ୍ବିଆ ବିଶ୍ଵବିଦ୍ୟାଳୟ ଆଡେ ମୁହାଁଇଥିଲେ । ଯେଉଁଠି AI ର ଷ୍ଟାର ମେଥଡରେ ପରୀକ୍ଷା କରାଯାଇଥିଲା । ସେଠାରେ ଥିବା ପ୍ରଜନନ(Fertility)ଗବେଷଣା କେନ୍ଦ୍ରରେ ସେହି ବ୍ୟକ୍ତିଙ୍କର ସିମେନରେ ଲୁଚି ରହିଥିବା ଶୁକ୍ରାଣୁକୁ ଏଆଇ(AI)ମାଧ୍ୟମରେ ଖୋଜା ଯାଇଥିଲା । ଏବଂ ସିମେନରେ ପାଖାପାଖି ୪୪ଟି ଶୁକ୍ରାଣୁ ଥିବା ଜଣା ପଡିଥିଲା । ଏହାକୁ ସେହି ମହିଳାଙ୍କ ଡିମ୍ବାଣୁ(Egg) ସହ ଆଇଭିଏଫ କରାଯାଇଥିଲା । ଏବଂ ପରେ ମହିଳା ଜଣକ ଗର୍ଭବତୀ ହେଇଥିବା ସେମାନେ ଜଣାଇଥିଲେ । ଏବଂ ଷ୍ଟାର (Star) ପଦ୍ଧତିରେ ପ୍ରଥମ ମହିଳା ଗର୍ଭବତୀ ହୋଇଥିଲେ ସେହି ମହିଳାଜଣକ ।

ଗର୍ଭବତୀ ହେବାପରେ ମହିଳାଜଣକ କହିଥିଲେ, "ମତେ ଏବେ ଯାଏଁ ବିଶ୍ଵାସ ହେଉନି କି ମୁଁ ଗର୍ଭବତୀ ଅଛି । ମୁଁ ପ୍ରତିଦିନ ସକାଳୁ ଉଠୁଛି , ଆଉ ଏକଥା ବିଶ୍ଵାସ କରିପାରୁନି କି ମୁଁ ଗର୍ଭବତୀ ଅଛି ବୋଲି । "

ପାଖାପାଖି ୫ ବର୍ଷ ଗବେଷଣା କରିବା ପରେ ଏହି ଷ୍ଟାର ମେଥଡକୁ ଆବିଷ୍କାର କରିଥିଲେ ଡକ୍ଟର ଜେଭ ୱିଲିୟମସ୍ । ସେ କହିଛନ୍ତି, ଏହି ଦମ୍ପତ୍ତି ଯେତେବେଳେ ପ୍ରଥମେ ନିଜ ସିମେନର ନମୁନା ପରୀକ୍ଷା ପାଇଁ ଦେଇଥିଲେ, ଏହାକୁ ୨ ଦିନ ଧରି ପରୀକ୍ଷା କରାଯାଇଥିଲା । ହେଲେ ସିମେନରେ କୌଣସି ଶୁକ୍ରାଣୁ ମିଳିନଥିଲା । ପରେ ଏହାକୁ AI ଷ୍ଟାର ମେଥଡ ଦ୍ଵାରା ପରୀକ୍ଷା କରିବାରୁ ଜଣା ପଡିଥିଲା, ଏଥିରେ ୪୪ଟି ଶୁକ୍ରାଣୁ ରହିଛି । ପରେ ଏହାକୁ ପ୍ରଜନନ କରିବାରେ ବ୍ୟବହାର କରାଯାଇଥିଲା ।

ମିଷ୍ଟର ୱିଲିୟମସ୍ କହିଛନ୍ତି , ଏହି ଷ୍ଟାର ପଦ୍ଧତିରେ ସିମେନକୁ ପରୀକ୍ଷା କରିବା ପାଇଁ ଅଧିକ ଶକ୍ତିଶାଳୀର ସ୍କାନର ବ୍ୟବହାର କରାଯାଏ । ଯାହା ସିମେନରୁ ଗୋଟେ ଘଣ୍ଟାରେ ୮୦ ଲକ୍ଷରୁ ଅଧିକ ଫଟୋ ଉତ୍ତୋଳନ କରିପାରେ । ଏହା ମାଧ୍ୟମରେ ସିମେନରେ ଥିବା ଶୁକ୍ରାଣୁକୁ ଖୋଜିବାରେ ସହଜ ହୋଇଥାଏ । ପରେ ଏହା ପ୍ରଜନନ କୋଷକୁ ଖୋଜିଥାଏ । ତେବେ ଏହି ପଦ୍ଧତି ଦ୍ଵାରା ସେହି ମହିଳାଜଣକ ପ୍ରଥମେ ଉପକୃତ ହୋଇଛନ୍ତି ।