ଭୁବନେଶ୍ୱର,୧୩/୦୮:  ପ୍ରତିବର୍ଷ ଅଗଷ୍ଟ ୧୩ ତାରିଖକୁ 'ବିଶ୍ୱ ଅଙ୍ଗ ଦାନ ଦିବସ' ଭାବେ ପାଳନ କରାଯାଏ। ଅଙ୍ଗ ଦାନ ମାଧ୍ୟମରେ ଜଣେ ଅଭାବୀ ରୋଗୀଙ୍କୁ ଏକ ନୂତନ ଜୀବନ ଦାନ କରାଯାଇପାରିବ। ସାରା ଦିନରେ ଅନେକ ଲୋକ ଗୁରୁତର ଅଙ୍ଗ ବିଫଳତା ଯୋଗୁଁ ମୃତ୍ୟୁମୁଖକୁ ଠେଲି ହୋଇଯାଉଥିବା ବେଳେ, ଅଙ୍ଗ ଦାନ ସେମାନଙ୍କ ପାଇଁ ଏକ ବଡ଼ ଆଶାର କିରଣ ସାଜିପାରେ।

ଭାରତରେ ଅଙ୍ଗ ଦାନର ସ୍ଥିତି ଏବଂ ଗୁରୁତ୍ୱ

ଭାରତରେ ବର୍ତ୍ତମାନ ସୁଦ୍ଧା ହଜାର ହଜାର ରୋଗୀ ଗୁରୁତର ଅଙ୍ଗ ବିଫଳତା କାରଣରୁ ପ୍ରତିରୋପଣ ଅପେକ୍ଷାରେ ଅଛନ୍ତି। ସଚେତନତାର ଅଭାବ ଏବଂ ଅନେକ ଭ୍ରାନ୍ତ ଧାରଣା ଯୋଗୁଁ ଆଜି ମଧ୍ୟ ଅନେକ ଲୋକ ଅଙ୍ଗ ଦାନ କରିବାକୁ ଆଗେଇ ଆସୁନାହାଁନ୍ତି। କିନ୍ତୁ ବାସ୍ତବତା ହେଉଛି, ଜଣେ ବ୍ୟକ୍ତିଙ୍କ ମୃତ୍ୟୁ ପରେ ତାଙ୍କର ଦାନ କରାଯାଇଥିବା ଅଙ୍ଗଗୁଡ଼ିକ ଅନେକ ନିରୀହ ଜୀବନ ବଞ୍ଚାଇବାରେ ସାହାଯ୍ୟ କରିଥାଏ। ତେବେ ଜଣେ ବ୍ୟକ୍ତି ନିଜ ଜୀବନକାଳରେ କିମ୍ବା ମୃତ୍ୟୁ ପରେ କେଉଁସବୁ ଅଙ୍ଗ ଦାନ କରିପାରିବେ, ସେନେଇ ସଠିକ୍ ଜ୍ଞାନ ରହିବା ନିତାନ୍ତ ଆବଶ୍ୟକ।

ଶରୀରର କେଉଁ ସବୁ ଅଙ୍ଗ ଦାନ କରାଯାଇପାରିବ?

ଜାତୀୟ ଅଙ୍ଗ ଏବଂ ଟିସୁ ପ୍ରତିରୋପଣ ସଂଗଠନର ସୂଚନା ଅନୁଯାୟୀ, ଶରୀରର ପ୍ରମୁଖ ଅଙ୍ଗଗୁଡ଼ିକ ଦାନ କରାଯାଇପାରିବ:
୧. କିଡନୀ: ଜଣେ ମୃତ ଦାତା ନିଜର ଉଭୟ କିଡନୀ ଦାନ କରିପାରିବେ। ଏହାବତୀତ, ଆଇନଗତ ଏବଂ ଚିକିତ୍ସା ନିୟମ ଅନୁଯାୟୀ ଜଣେ ଜୀବିତ ବ୍ୟକ୍ତି ମଧ୍ୟ ଗୋଟିଏ କିଡନୀ ଦାନ କରିପାରିବେ।

୨. ଯକୃତ (Liver): ମୃତ ଦାତାଙ୍କଠାରୁ ସମ୍ପୂର୍ଣ୍ଣ ଯକୃତ ଦାନ କରାଯାଇପାରିବ। ଏହାସହ, ଯକୃତର ଏକ ଅଂଶ ଜଣେ ଜୀବିତ ବ୍ୟକ୍ତି ମଧ୍ୟ ଦାନ କରିପାରନ୍ତି, କାରଣ ପ୍ରାକୃତିକ ଭାବେ ଯକୃତର କିଛି ଅଂଶ ପୁନର୍ଜନ୍ମ ହେବାର କ୍ଷମତା ରଖିଥାଏ।

୩. ହୃଦୟ (Heart): ଗୁରୁତର ହୃଦରୋଗରେ ପୀଡ଼ିତ ରୋଗୀଙ୍କ ଜୀବନ ବଞ୍ଚାଇବା ପାଇଁ ହୃଦୟ ପ୍ରତିରୋପଣ କରାଯାଇଥାଏ। ଏଥିପାଇଁ ଦାତାର ସ୍ୱାସ୍ଥ୍ୟଗତ ସ୍ଥିତି ଏବଂ ଅଙ୍ଗର ଉପଯୁକ୍ତତା ଅତ୍ୟନ୍ତ ଜରୁରୀ।
୪. ଫୁସଫୁସ (Lungs): ମୃତ ଦାତାଙ୍କ ଉଭୟ ଫୁସଫୁସ ଦାନ କରାଯାଇପାରିବ। କିଛି ବିଶେଷ ପରିସ୍ଥିତିରେ ଜୀବିତ ଦାତାଙ୍କ ଫୁସଫୁସର ଏକ ଅଂଶ ମଧ୍ୟ ଦାନ କରାଯାଇଥାଏ।

୫. ଅଗ୍ନାଶୟ (Pancreas): ମଧୁମେହ ଏବଂ ଅନ୍ୟାନ୍ୟ ସମସ୍ୟାର ସମାଧାନ ପାଇଁ ଅଗ୍ନାଶୟ ଏକ ପ୍ରମୁଖ ଅଙ୍ଗ ଭାବେ ଦାନ କରାଯାଇଥାଏ।

୬. ଅନ୍ତନଳୀ (Intestine): କ୍ଷୁଦ୍ର ଅନ୍ତ୍ର କିମ୍ବା ଅନ୍ତନଳୀ ମଧ୍ୟ ପ୍ରତିରୋପଣ ପାଇଁ ଦାନ କରାଯାଇପାରୁଥିବା ଅଙ୍ଗଗୁଡ଼ିକ ମଧ୍ୟରୁ ଅନ୍ୟତମ।

ପଢନ୍ତୁ ଏହି ଖବର: ବ୍ରେନ୍ ଡେଡ୍ ପରେ ଶରୀର କେତେ ସମୟ ପାଇଁ କାର୍ଯ୍ୟ କରେ? ଅଙ୍ଗ ଦାନ କିପରି କରାଯାଏ?

କେବଳ ଅଙ୍ଗ ନୁହେଁ, ଏହିସବୁ ଟିସୁ ମଧ୍ୟ କରାଯାଇପାରିବ

କର୍ଣ୍ଣିଆ (Cornea): ଅନ୍ଧତ୍ୱ ଦୂର କରି ଆଖିର ଦୃଷ୍ଟିଶକ୍ତି ଫେରାଇ ଆଣିବାରେ ସାହାଯ୍ୟ କରେ।
ଚର୍ମ (Skin): ଗୁରୁତର ପୋଡ଼ାଜଳା ଏବଂ ଚର୍ମ ଜନିତ କ୍ଷତର ଚିକିତ୍ସା ପାଇଁ ବ୍ୟବହୃତ ହୁଏ।

ଅନ୍ୟାନ୍ୟ: ହାଡ଼, ହୃଦୟ ଭଲଭ, ରକ୍ତବାହୀ ନଳୀ, ସ୍ନାୟୁ ଏବଂ ଟେଣ୍ଡନ ମଧ୍ୟ ଦାନ କରାଯାଇପାରିବ।

ଜୀବିତ ଥିବା ସମୟରେ କେଉଁ ଅଙ୍ଗ ଦାନ କରାଯାଇପାରିବ?

ଜଣେ ଜୀବିତ ବ୍ୟକ୍ତି ନିଜର ସମସ୍ତ ଅଙ୍ଗ ଦାନ କରିପାରିବେ ନାହିଁ। ସେ କେବଳ ଗୋଟିଏ କିଡନୀ, ଯକୃତର କିଛି ଅଂଶ, ଏବଂ ଅଗ୍ନାଶୟ ବା ଫୁସଫୁସର କିଛି ଅଂଶ ଡାକ୍ତରୀ ପରାମର୍ଶ କ୍ରମେ ଦାନ କରିପାରିବେ।

ପ୍ରତ୍ୟେକ ବ୍ୟକ୍ତି କ'ଣ ଅଙ୍ଗ ଦାନ ପାଇଁ ଯୋଗ୍ୟ?
ଏହା ଜରୁରୀ ନୁହେଁ ଯେ ସମସ୍ତେ ଅଙ୍ଗ ଦାନ କରିପାରିବେ। ଅଙ୍ଗ ଦାନ ପାଇଁ ବୟସଠାରୁ ଅଧିକ ଗୁରୁତ୍ୱପୂର୍ଣ୍ଣ ହେଉଛି ଦାତାର ଚିକିତ୍ସାଗତ ଅବସ୍ଥା ଏବଂ ଅଙ୍ଗଗୁଡ଼ିକର କାର୍ଯ୍ୟକ୍ଷମତା। ମୃତ୍ୟୁ ପରେ ବିଶେଷଜ୍ଞ ଡାକ୍ତରମାନେ ରୋଗୀଙ୍କୁ ପରୀକ୍ଷା କରି କେଉଁ ଅଙ୍ଗ ପ୍ରତିରୋପଣ ପାଇଁ ଉପଯୁକ୍ତ, ତାହା ସ୍ଥିର କରିଥା'ନ୍ତି।