Viral Video / ସୁପରନୋଭା ସୋସାଇଟିର ୪୩ ତମ ମହଲାରୁ ଡେଇଁ ଯୁବକଙ୍କ ଆତ୍ମହତ୍ୟା, ଭିଡିଓ ଭାଇରାଲ

ନୋଏଡାର ସେକ୍ଟର-୯୪ସ୍ଥିତ ସୁପରନୋଭା ସୋସାଇଟିରୁ ଜଣେ ଯୁବକଙ୍କ ମୃତ୍ୟୁ ଘଟଣା ସାମ୍ନାକୁ ଆସିଛି । ସେକ୍ଟର-୧୨୬ ଥାନା ଅଞ୍ଚଳରେ ଅକ୍ଟୋବର ୩ ତାରିଖରେ ଘଟିଥିବା ଏହି ଘଟଣାରେ ଯୁବକ ଜଣକ ବିଲ୍ଡିଂର ଉଚ୍ଚ ମହଲାରୁ ତଳକୁ ପଡ଼ି ପ୍ରାଣ ହରାଇଛନ୍ତି। ଘଟଣା ପରେ ପୋଲିସ ଓ FSL ଟିମ୍ ଘଟଣାସ୍ଥଳରେ ପହଞ୍ଚି ତଦନ୍ତ କରିଛନ୍ତି ।

ମୃତକଙ୍କ ପରିଚୟ ସମ୍ଭବ ଜୈନ ବୋଲି ଜଣାପଡ଼ିଛି । ପୋଲିସ ଅନୁସାରେ, ସମ୍ଭବ ଗୁରୁଗ୍ରାମର ମାନେସର ଅଞ୍ଚଳର ବାସିନ୍ଦା ଥିଲେ । ଘଟଣାର ଗୋଟିଏ ଦିନ ପୂର୍ବରୁ ସେ ଅନଲାଇନ୍ ବୁକିଂ ମାଧ୍ୟମରେ ସୁପରନୋଭା ସୋସାଇଟିରେ ଏକ ରୁମ୍ ନେଇ ଏକାକୀ ରହିବାକୁ ଆସିଥିଲେ ।

ସୂଚନା ଅନୁସାରେ, ଶୁକ୍ରବାର ଦ୍ୱିପ୍ରହର ପ୍ରାୟ ୩ଟା ସମୟରେ ସେ ସେଠାରେ ପହଞ୍ଚିଥିଲେ । ପରଦିନ ତାଙ୍କ ବାଲକୋନିରୁ ତଳକୁ ପଡ଼ିଥିବା ନେଇ ପୋଲିସକୁ ସୂଚନା ମିଳିଥିଲା । ଖବର ପାଇ ସେକ୍ଟର-୧୨୬ ଥାନା ପୋଲିସ ଘଟଣାସ୍ଥଳରେ ପହଞ୍ଚିଥିଲା ।

ଏସି ମେକାନିକ୍ କରିଥିଲେ ରୋକିବାକୁ ଚେଷ୍ଟା
ଘଟଣା ସମୟରେ ସେଠାରେ ଏସି ମରାମତି କାମ କରୁଥିବା ଜଣେ ମେକାନିକ୍ ସମ୍ଭବଙ୍କୁ ରୋକିବାକୁ ଚେଷ୍ଟା କରିଥିବା ଜଣାପଡ଼ିଛି । ମେକାନିକ୍‌ଙ୍କୁ ସମ୍ଭବ ନିଜେ ମାନସିକ ଚାପରେ ଥିବା କଥା କହିଥିବା ସୂଚନା ମିଳିଛି । ତେବେ ତାଙ୍କୁ ରୋକିବାରେ ମେକାନିକ୍ ସଫଳ ହୋଇପାରିନଥିଲେ ।

ପୋଲିସ କହିଛି ଯେ ଘଟଣା ସମୟରେ ଆଖପାଖରେ ଥିବା ଲୋକଙ୍କୁ ପଚରାଉଚରା କରାଯାଇଛି । ସେମାନଙ୍କଠାରୁ ମଧ୍ୟ ସମ୍ଭବ ମାନସିକ ଚାପରେ ଥିବା ସମ୍ପର୍କରେ ସୂଚନା ମିଳିଥିବା କୁହାଯାଉଛି ।

ଋଣ ନେଇ ଚିନ୍ତିତ ଥିବା ସନ୍ଦେହ
ପ୍ରାଥମିକ ତଦନ୍ତରେ ସମ୍ଭବ ଋଣକୁ ନେଇ ଚିନ୍ତିତ ଥିବା ଏବଂ କିଛି ଦିନ ଧରି ଘରୁ ଅନୁପସ୍ଥିତ ଥିବା ନେଇ ସୂଚନା ମିଳିଛି । ତାଙ୍କ ବାପାଙ୍କ ସହ ହୋଇଥିବା କିଛି ଚାଟ୍ ମଧ୍ୟ ପୋଲିସର ହାତରେ ଲାଗିଥିବା ଜଣାପଡ଼ିଛି । ଏହି ଚାଟ୍ ଓ ଅନ୍ୟାନ୍ୟ ତଥ୍ୟକୁ ଆଧାର କରି ପୋଲିସ ଘଟଣାର ପୂର୍ବ ପରିସ୍ଥିତି ଯାଞ୍ଚ କରୁଛି । ପୋଲିସ ଓ FSL ଟିମ୍ ଘଟଣାସ୍ଥଳରୁ ଆବଶ୍ୟକ ପ୍ରମାଣ ସଂଗ୍ରହ କରିଛନ୍ତି । ଏଥିସହ ଘଟଣାସ୍ଥଳ ଓ ଆଖପାଖ ଅଞ୍ଚଳରେ ଲାଗିଥିବା CCTV କ୍ୟାମେରାର ଫୁଟେଜ୍‌ ମଧ୍ୟ ଯାଞ୍ଚ କରାଯାଉଛି ।

ମୃତଦେହର ପଞ୍ଚନାମା ପ୍ରସ୍ତୁତ କରାଯାଇ ପୋଷ୍ଟମର୍ଟମ୍ ପାଇଁ ପଠାଇବାର ପ୍ରକ୍ରିୟା କରାଯାଇଛି । ପୋଲିସ ମୃତକଙ୍କ ପରିବାରକୁ ଘଟଣା ସମ୍ପର୍କରେ ସୂଚନା ଦେଇଛି । ଘଟଣାର ପ୍ରକୃତ ପରିସ୍ଥିତି ଓ କାରଣ ସମ୍ପର୍କରେ ଅଧିକ ତଥ୍ୟ ତଦନ୍ତ ଶେଷ ହେବା ପରେ ସ୍ପଷ୍ଟ ହେବ ।