Free Electricity / ବିନା ଖର୍ଚ୍ଚରେ ବିଜୁଳି... ୨୮୨ କିଲୋୱାଟ୍ ବିଦ୍ୟୁତ୍ ଉତ୍ପାଦନ, ପରିବାରଙ୍କୁ ନାହିଁ କୌଣସି ଖର୍ଚ୍ଚ

ଛତିଶଗଡ଼ର ଏକ ଗାଁ ସୌର ଶକ୍ତି ବ୍ୟବହାର କ୍ଷେତ୍ରରେ ଏକ ନୂଆ ଉଦାହରଣ ସୃଷ୍ଟି କରିଛି । ଏହି ଗାଁର ସମସ୍ତ ପକ୍କା ଘରର ଛାତ ଉପରେ ପ୍ରଧାନମନ୍ତ୍ରୀ ସୂର୍ଯ୍ୟଘର ମଗଣା ବିଜୁଳି ଯୋଜନା ଅଧୀନରେ ସୋଲାର ପ୍ୟାନେଲ୍ ଲଗାଯାଇଛି । ଫଳରେ ବିଜୁଳି ପାଇଁ ପାରମ୍ପରିକ ବିଦ୍ୟୁତ୍ ଗ୍ରିଡ୍ ଉପରେ ନିର୍ଭରଶୀଳତା କମାଇବା ଦିଗରେ ଏହି ଗାଁ ଏକ ମାଇଲଖୁଣ୍ଟ ସ୍ଥାପନ କରିଛି ।

ଏହି ଗାଁଟି ଛତିଶଗଡ଼ର ରାଜନନ୍ଦଗାଓଁ ଜିଲ୍ଲାରେ ଅବସ୍ଥିତ। ଗାଁର ନାଁ ହେଉଛି ଖୈରା । ଏଠାରେ ପ୍ରାୟ ୮୮୯ ଜଣ ଲୋକ ବସବାସ କରନ୍ତି । ଗାଁର ପ୍ରତ୍ୟେକ ଘରେ ୨ କିଲୋୱାଟ୍ କ୍ଷମତା ବିଶିଷ୍ଟ ସୋଲାର ସିଷ୍ଟମ୍ ଲଗାଯାଇଛି । ଏହାଦ୍ୱାରା ସମଗ୍ର ଗାଁରେ ପ୍ରାୟ ୨୮୨ କିଲୋୱାଟ୍ ସୌର ଶକ୍ତି ଉତ୍ପାଦନ ହେଉଛି ।

ସବୁଠାରୁ ବଡ଼ କଥା ହେଉଛି, ଏହି ସୋଲାର ପ୍ୟାନେଲ୍ ଲଗାଇବା ପାଇଁ ଗାଁର କୌଣସି ପରିବାରକୁ ନିଜ ପକେଟରୁ ଟଙ୍କା ଖର୍ଚ୍ଚ କରିବାକୁ ପଡ଼ିନାହିଁ । କେନ୍ଦ୍ର ଓ ରାଜ୍ୟ ସରକାରଙ୍କ ସବସିଡି ପରେ ବଳକା ଖର୍ଚ୍ଚକୁ ଜିଲ୍ଲା ପ୍ରଶାସନ ବିଭିନ୍ନ କମ୍ପାନୀର CSR ଫଣ୍ଡ୍ ମାଧ୍ୟମରେ ପୂରଣ କରିଛି ।

ନେଟ୍ ମିଟରିଂ ଟେକ୍ନୋଲୋଜି ସହ ଯୋଡ଼ା ହୋଇଛି ସୋଲାର ସିଷ୍ଟମ୍
ଖୈରା ଗାଁର ଘରଗୁଡ଼ିକରେ ଲଗାଯାଇଥିବା ସୋଲାର ସିଷ୍ଟମ୍ ନେଟ୍ ମିଟରିଂ ଟେକ୍ନୋଲୋଜି ସହ ଯୋଡ଼ା ହୋଇଛି । ଏହି ବ୍ୟବସ୍ଥା ଅନୁସାରେ ଦିନ ସମୟରେ ସୋଲାର ପ୍ୟାନେଲ୍‌ରୁ ଉତ୍ପାଦିତ ବିଜୁଳି ପ୍ରଥମେ ଘରର ଆବଶ୍ୟକତା ପୂରଣ କରିବ । ଏହାପରେ ଯଦି ବିଜୁଳି ବଳକା ରହେ, ତେବେ ସେହି ବିଜୁଳି ସିଧାସଳଖ ବିଦ୍ୟୁତ୍ ଗ୍ରିଡ୍‌କୁ ପଠାଯିବ । ଏହାଦ୍ୱାରା ବିଜୁଳିର ସଠିକ୍ ବ୍ୟବହାର ସହ ପାରମ୍ପରିକ ବିଦ୍ୟୁତ୍ ବ୍ୟବସ୍ଥା ଉପରେ ନିର୍ଭରଶୀଳତା ମଧ୍ୟ କମିବ । ଏହି ଅଭିଯାନକୁ ସଫଳ କରିବାରେ ପଦ୍ମଶ୍ରୀ ପୁଲବାସନ ବାଇ ଯାଦବ ଏବଂ ସ୍ଥାନୀୟ ମହିଳା ଗୋଷ୍ଠୀଙ୍କର ଗୁରୁତ୍ୱପୂର୍ଣ୍ଣ ଯୋଗଦାନ ରହିଛି ।

PM ଆବାସ ଯୋଜନାରେ ନିର୍ମିତ ଘରକୁ ମଧ୍ୟ ମିଳିଲା ଲାଭ
ଖୈରା ଗାଁରେ ମୋଟ ୧୪୧ଟି ସୋଲାର ସଂଯୁକ୍ତ ଘର ରହିଛି । ସେଥିମଧ୍ୟରୁ ୯୩ଟି ଘର ପ୍ରଧାନମନ୍ତ୍ରୀ ଆବାସ ଯୋଜନା-ଗ୍ରାମୀଣ ଅଧୀନରେ ନିର୍ମାଣ ହୋଇଥିବା ଘର । ଏହି ଘରଗୁଡ଼ିକୁ ମଧ୍ୟ ସୌର ଶକ୍ତି ସହ ଯୋଡ଼ାଯାଇଛି । ଏହା ବ୍ୟତୀତ ଗାଁର ୨୧ଟି ଅନୁସୂଚିତ ଜନଜାତି (ST) ଏବଂ ୪ଟି ଅନୁସୂଚିତ ଜାତି (SC) ପରିବାର ମଧ୍ୟ ଏହି ଯୋଜନାରୁ ଉପକୃତ ହୋଇଛନ୍ତି ।

ମହିଳାଙ୍କ ଉଦ୍ୟମରେ ସଫଳ ହେଲା ଅଭିଯାନ
ଏହି ଅଭିଯାନରେ 'ସୂର୍ଯ୍ୟ ସଖୌ' ଏବଂ 'ସୂର୍ଯ୍ୟ ସଭା' ମାଧ୍ୟମରେ ମହିଳାମାନେ ଘରକୁ ଘର ବୁଲି ଲୋକଙ୍କୁ ସଚେତନ କରିଥିଲେ । ସୋଲାର ପ୍ୟାନେଲ୍ ଲଗାଇବାର ଖର୍ଚ୍ଚ, ରକ୍ଷଣାବେକ୍ଷଣ ଏବଂ ଏହାର ଉପଯୋଗିତାକୁ ନେଇ ଗ୍ରାମବାସୀଙ୍କ ମନରେ ଥିବା ଆଶଙ୍କା ଦୂର କରିବାରେ ମହିଳାମାନେ ସହଯୋଗ କରିଥିଲେ ।

କଲେକ୍ଟର କ'ଣ କହିଛନ୍ତି ?
ମିଡିଆ ରିପୋର୍ଟ ଅନୁସାରେ, ରାଜନନ୍ଦଗାଓଁର କଲେକ୍ଟର ଜିତେନ୍ଦ୍ର ଯାଦବ କହିଛନ୍ତି ଯେ ସୋଲାର ସିଷ୍ଟମ୍ ଲଗାଇବା ପାଇଁ କୌଣସି ପରିବାରକୁ ନିଜ ପକେଟରୁ ଟଙ୍କା ଦେବାକୁ ପଡ଼ିନାହିଁ । ଏହି କାର୍ଯ୍ୟରେ ଗ୍ରାମର ସରପଞ୍ଚ ମଧ୍ୟ ସହଯୋଗ କରିଛନ୍ତି । ଏବେ ଖୈରା ଗାଁର ପ୍ରତ୍ୟେକ ପକ୍କା ଘର ନିଜ ଛାତରୁ ବିଜୁଳି ଉତ୍ପାଦନ କରିବା ଦିଗରେ ଆଗେଇଛି । ସରକାରୀ ଯୋଜନା, ପ୍ରଶାସନର ସହଯୋଗ, କମ୍ପାନୀଗୁଡ଼ିକର CSR ଫଣ୍ଡ୍ ଏବଂ ମହିଳାଙ୍କ ସକ୍ରିୟ ଭାଗିଦାରୀ ଯୋଗୁଁ ଖୈରା ଗାଁ ସୌର ଶକ୍ତି ବ୍ୟବହାର କ୍ଷେତ୍ରରେ ଏକ ଉଦାହରଣ ପାଲଟିଛି ।