୧୯ ତାରିଖରୁ ଚାଷୀ ପଞ୍ଜିକରଣ ଆରମ୍ଭ ହୋଇଥିବା ବେଳେ ୨୦ ଅଗଷ୍ଟ ଯାଏ ଏହା ଚାଲିବ । କିନ୍ତୁ ପଞ୍ଜିକରଣ ବେଳେ ସୃଷ୍ଟି ଚାଷୀଙ୍କ ପାଇଁ ସୃଷ୍ଟି ହୋଇଥିଲା ବଡ଼ ସମସ୍ୟା । ନିଜ ନାମରେ ଜମି ନଥିଲେ ପଞ୍ଜିକରଣ ରୁ ବଞ୍ଚିତ ହେଉଥିଲେ ଚାଷୀ । ଏପରିକି ପଞ୍ଜିକରଣ କରିବା ପାଇଁ ଲିଗାଲ ହେୟାର୍ ସାର୍ଟିଫିକେଟ ସହ ଭାଇ ମାନଙ୍କ ସ୍ୱିକାରୋକ୍ତି ପତ୍ର ଦାଖଲ କରିବାକୁ ଚାଷୀ ହଇରାଣ ହେଉଥିବା ଅଭିଯୋଗ କରିଥିଲେ । ବିଭିନ୍ନ ସ୍ଥାନରେ ଏଭଳି ସମସ୍ୟା ଉପୁଜିବା ପରେ ବୈଠକ ଡାକି ଚାଷୀ ପଞ୍ଜିକରଣକୁ ସରଳିକରଣ କରିଛନ୍ତି ରାଜ୍ୟ ସରକାର । ନୂଆ ନିୟମ ଅନୁଯାୟୀ ବାପା କି ଜେଜେ ବାପା ଙ୍କ ନାମରେ ଜମି ଥିଲେ ବି ପୁଅ ମାନେ କରି ପାରିବେ ପଞ୍ଜିକରଣ ।

ଯେଉଁ ପୁଅ ଯେତେ ଜମି ଚାଷ କରୁଥିବେ ସେତିକି ଜମିର ପଞ୍ଜିକରଣ କରି ପାରିବେ । ଯଦି ଜଣେ ଭାଇ ସବୁ ଜମି ଚାଷ କରୁଛି ତେବେ ତାଙ୍କୁ ଅନ୍ୟ ଭାଇ ମାନଙ୍କର ଲିଖିତ ସ୍ୱୀକୃତି ନାମା ପଞ୍ଜିକରଣ ସମୟରେ ଦାଖଲ କରିବେ ବୋଲି କହିଲେ ଯୋଗାଣ ମନ୍ତ୍ରୀ । ସେପଟେ ନକଲି ଚାଷୀ ଖୋଜିବାକୁ କସରତ ଆରମ୍ଭ କରିଛନ୍ତି ରାଜ୍ୟ ସରକାର । ପଞ୍ଜିକରଣ ସମୟରେ ଚାଷୀ ମାନେ ଆଧାର କାର୍ଡ ଦାଖଲ ସହ ଇ-କେୱାସି କରିବା ବାଧ୍ୟତାମୂଳକ ବୋଲି ମଧ୍ୟ କୁହାଯାଇଛି । ସରକାରଙ୍କ ନିଷ୍ପତ୍ତି ଅନୁଯାୟୀ ୯ ସେପ୍ଟେମ୍ବର ସୁଦ୍ଧା ସରିବ ଚାଷୀଙ୍କ ତଥ୍ୟ ଯାଞ୍ଚ । ୩୦ ସେପ୍ଟେମ୍ବର ସୁଦ୍ଧା ପ୍ରକାଶ ପାଇବ ଯୋଗ୍ୟ ଚାଷୀଙ୍କ ତାଲିକା । ଏହା ମଧ୍ୟରେ ସମସ୍ତ ଚାଷୀ ପଞ୍ଜିକରଣ କରାଇ ନେବାକୁ କହିଛନ୍ତି ଯୋଗାଣ ମନ୍ତ୍ରୀ।