ଅର୍ଗସ ବ୍ୟୁରୋ:   ରାଜ୍ୟରେ କିଛି ଦିନ ପ୍ରବଳ ଥଣ୍ଡା ପରେ ବଦଳିଛି ପାଗର ମିଜାଜ୍ । ଶୀତ ସାଙ୍ଗକୁ ଏବେ ବର୍ଷା ଜନଜୀବନକୁ ଅସ୍ତବ୍ୟସ୍ତ କରି ପକାଇଛି । ବଙ୍ଗୋପସାଗରରେ ସକ୍ରିୟ ଲଘୁଚାପ ଯୋଗୁଁ ରାଜ୍ୟର ବିଭିନ୍ନ ସ୍ଥାନରେ ବର୍ଷା ଜାରି ରହିଛି । 12 ଘଣ୍ଟା ମଧ୍ୟରେ ଲଘୁଚାପ ଅଧିକ ଘନୀଭୂତ ହୋଇ ଅବପାତରେ ପରିଣତ ହେବା ସମ୍ଭାବନା ।.. ପ୍ରଭାବରେ ଉପକୂଳବର୍ତ୍ତୀ ଜିଲ୍ଲା ସହ ଆଭ୍ୟନ୍ତରୀଣ ଓଡ଼ିଶାରେ ବର୍ଷା ହୋଇପାରେ । ପ୍ରବଳ ବର୍ଷା ପାଇଁ ଗଞ୍ଜାମ, ଗଜପତି, ଜଗତସିଂହପୁର, କେନ୍ଦ୍ରାପଡ଼ା 4 ଜିଲ୍ଲାକୁ ୟେଲୋ ୱାର୍ଣ୍ଣିଂ ଜାରି ହୋଇଛି ।.... ଆସନ୍ତାକାଲି ବି ଉପକୂଳବର୍ତ୍ତୀ ଜିଲ୍ଲା ମାନଙ୍କରେ ହାଲୁକାରୁ ମଧ୍ୟମ ଧରଣର ବର୍ଷା ସମ୍ଭାବନା । ମୟୂରଭଞ୍ଜ, କେନ୍ଦୁଝର, ଯାଜପୁର, ଢେଙ୍କାନାଳ ଜିଲ୍ଲାକୁ ବର୍ଷା ପାଇଁ ଆଲର୍ଟ କରିଛି ପାଣିପାଗ କେନ୍ଦ୍ର ।

ସେପଟେ ଅଦିନିଆ ବର୍ଷାକୁ ନେଇ ଚାଷୀ ମନରେ ଛନକା ପଶିଛି । ଗଜପତି ଜିଲ୍ଲାରେ ଝିପି ଝିପି ବର୍ଷା ଲାଗି ରହିଛି । ଅମଳ ଧାନକୁ ଚାଷୀ କାଟି କିଏ ନିଜ ଜମିରେ ତ କିଏ ଘର ଆଗରେ ଆଉ କିଏ ନିଜ ଜମିରେ ରଖିଛନ୍ତି ।.. ପାଚିଲା ଧାନ ଏବେ ବର୍ଷାରେ ଭିଜି ନଷ୍ଟ ହେବାକୁ ବସିଛି। ସେହିପରି ଜଗତସିଂହପୁର, ଯାଜପୁର ଜିଲ୍ଲାରେ ବର୍ଷା ପାଇଁ ବିଲରୁ ତରବରିଆ ଭାବେ ଧାନ କାଟିବାରେ ବ୍ୟସ୍ତ ଚାଷୀ । ଭଦ୍ରକ ଓ ପୁରୀ ଜିଲ୍ଲାର ବିଭିନ୍ନ ସ୍ଥାନରେ ବର୍ଷା ହେବା ଫଳରେ କିଆରୀରେ ଧାନ ଓଦା ହୋଇ ଗଜା ହେବା ଆଶଙ୍କା ଦେଖାଦେଇଛି। ସେପଟେ ବୌଦ୍ଧରେ ମଣ୍ଡି ମାନଙ୍କରେ ଅଦିନିଆ ବର୍ଷାରେ ଭିଜୁଛି ଧାନ ।

ଲଘୁଚାପ ବର୍ଷା ଯୋଗୁଁ ଏବେ ରାତିର ତାପମାତ୍ରା ବଢି ଯାଇଛି । ଆଗାମୀ ଦୁଇରୁ ତିନି ଦିନ ଯାଏଁ ପାଗରେ ବିଶେଷ ପରିବର୍ତ୍ତନ ନାହିଁ । 3 ଦିନ ପରେ ଆଭ୍ୟନ୍ତରୀଣ ଓଡ଼ିଶାର କିଛି ଜିଲ୍ଲାରେ ତାପମାତ୍ରା 2ରୁ 4 ଡିଗ୍ରୀ ହ୍ରାସ ହୋଇପାରେ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।