Argus News - ଚିଟଫଣ୍ଡ ଠକେଇର ଦୁଇ ଦୁଇ ଥର ଶିକାର ହୋଇଥିଲେ ମୁଖ୍ୟମନ୍ତ୍ରୀ ମୋହନ ମାଝୀ

ଚିଟଫଣ୍ଡ ଠକେଇରୁ ବାଦ ପଡିନଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ଦୁଇ ଦୁଇ ଥର ଚିଟଫଣ୍ଡ ଠକେଇର ସାମନା କରିଛନ୍ତି । 1990 ମସିହାରେ ଏବଂ 2002 ମସିହାରେ ଚିଟଫଣ୍ଡ କମ୍ପାନୀ ଠକେଇର ଶିକାର ହୋଇଥିଲେ ମୋହନ । ଜାତୀୟ ଉପଭୋକ୍ତା ଦିବସରେ ନିଜ ଉଦବୋଧନରେ ମୁଖ୍ୟମନ୍ତ୍ରୀ କହିଛନ୍ତି , ଗୋଟିଏ ସରକାରୀ ସଂସ୍ଥା ଏବଂ ଅନ୍ୟ ଗୋଟିଏ ବେସରକାରୀ ସଂସ୍ଥାକୁ ପଇସା ଯୋଗାଡ କରି ଦେଲି ହେଲେ ପରେ ଦେଖିଲା ବେଳକୁ ସଂସ୍ଥା ନାହିଁ । ଏପରିକି 1986 ଆଇନ ଅନୁସାରେ ଅପିଲ ବି କରିଥିଲି ହେଲେ ରାସ୍ତା ଏତେ ଜଟିଳ ଥିଲା ଯେ ପଇସା ଫେରସ୍ତ ହେଲା ନାହିଁ । ତେବେ 1986 ଆଇନକୁ 2019ରେ ସଂଶୋଧନ କରାଯାଇଛି । ପ୍ରଧାନମନ୍ତ୍ରୀ ମୋଦିଙ୍କ ଦିଗଦର୍ଶନରେ ଏହି ସବୁ ଗଳାବାଟ ଏବେ ବନ୍ଦ ହୋଇଛି । 2013ରୁ 2024 ।

ସେତେବେଳର ବିଜେଡି ସରକାର ସମୟରେ ଠକେଇର ଶିକାର ଚିଟଫଣ୍ଡ କ୍ଷତିଗ୍ରସ୍ତକାରୀ ନିରାଶ, ହତାଶ । ରାଜ୍ୟରେ ବିଜେପି ସରକାର ଆସୁଆସୁ ଟଙ୍କା ଫେରସ୍ତ ପାଇଁ ତତ୍ପରତା ଦେଖାଇଛି । ଚିଟଫଣ୍ଡ କ୍ଷତିଗ୍ରସ୍ତଙ୍କ ସମ୍ପୂର୍ଣ୍ଣ ତଥ୍ୟ ମାଗିବା ସହ ପ୍ରଶାସନିକ ସ୍ତରରେ ଜୋରଦାର ପ୍ରକ୍ରିୟା ଜାରି ରହିଛି। ... ଏବେ ବଡ ପ୍ରଶ୍ନ କାହିଁକି ଚୁପ୍ ଥିଲେ ନବୀନ ସରକାର । ଗୁରୁତ୍ବପୂର୍ଣ୍ଣ ଦିଗଟି ହେଲା, ଚିଟଫଣ୍ଡର ପୃଷ୍ଠପୋଷକ ଥିଲା ବିଜେଡି । ତେଣୁ ଚିଟଫଣ୍ଡ ଫାଇଲ୍ ଖୋଲିଥାନ୍ତା କେମିତି ? ଚିଟଫଣ୍ଡ କାରବାରରେ ସେତେବେଳର ବିଜେଡି ବିଧାୟକ ପ୍ରଭାତ ତ୍ରିପାଠୀ, ପ୍ରଭାତ ବିଶ୍ବାଳ, ତତ୍କାଳୀନ ବିଜେଡି ସାଂସଦ ରାମଚନ୍ଦ୍ର ହାଂସଦା ପ୍ରମୁଖ ଗିରଫ ହୋଇଥିଲେ। ତତ୍କାଳୀନ ସାଂସଦ ରବୀନ୍ଦ୍ର ଜେନା ଓ ବିଧାୟକ ପ୍ରଣବ ବଳବନ୍ତରାୟଙ୍କୁ ଜେରା ହୋଇଥିଲା ।

ସେଥିପାଇଁ ବୋଧେ ବିଜେଡିର ଚିଟଫଣ୍ଡ ପାଣ୍ଡୋରା ବକ୍ସ ଖୋଲିଯିବା ଭୟରେ ଚୁପ୍ ଥିଲା ବିଜେଡି । ତା ନ ହୋଇଥିଲେ ୨୦୧୩ ଜୁଲାଇ ୧୩ରେ ଯେଉଁ ୩ ଶହ କୋଟିର କର୍ପସ ଫଣ୍ଡ ଗଠିତ ହୋଇଥିଲା, ତାର ସ୍ଥିତି କଣ ସେନେଇ ବି ଗତ ସରକାର ମୁହଁ ଖୋଲି ନ ଥିଲେ କାହିଁକି ? ପ୍ରଥମେ ଜୁଲାଇ ୯, ୨୦୧୩ରେ ଜଷ୍ଟିସ ଆର.କେ. ପାତ୍ର କମିଶନ ଓ ପରେ ଫେବୃଆରୀ ୫, ୨୦୧୫ରେ ଜଷ୍ଟିସ ଏମଏମ ଦାସଙ୍କ କମିଶନ ରିପୋର୍ଟ କୁଆଡ଼େ ଗଲା, କଣ ଆକ୍ସନ ହେଲା ସେକଥା ବି କାହାକୁ ଜଣା ନାହିଁ । କମିଶନଙ୍କ ପାଖକୁ ଦୁଇଟି ପର୍ଯ୍ୟାୟରେ ଆସିଥିଲା 17 ଲକ୍ଷ ଆବେଦନ । ତେଣୁ ହତାଶରେ ଥିବା ଆବେଦନକାରୀଙ୍କୁ ମନରେ ଆଶା ଜାଗିଛି । ସେପଟେ ନିର୍ବାଚନ ପ୍ରଚାର ବେଳେ ଚିଟଫଣ୍ଡ୍ ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀ । ... ୨୦୧୪ ନିର୍ବାଚନ ବେଳେ ଚିଟଫଣ୍ଡ କ୍ଷତିଗ୍ରସ୍ତଙ୍କୁ ଟଙ୍କା ଫେରାଇବା ପାଇଁ ପ୍ରତିଶ୍ରୁତି ଦେଇଥିଲା ବିଜେଡି । କିନ୍ତୁ ଦଶ ବର୍ଷ ପରେ ଏବେ ବି ଚିନ୍ତାରେ କ୍ଷତିଗ୍ରସ୍ତ । କିନ୍ତୁ ଜାତୀୟ ଉପଭୋକ୍ତା ଦିବସରେ ମୁଖ୍ୟମନ୍ତ୍ରୀ ମୋହନ ମାଝି ପୂର୍ବ ସରକାର ସମୟରେ ଚିଟଫଣ୍ଡ ଠକେଇର ଲୋକେ ଯେଉଁ ଶିକାର ହୋଇଥିଲେ ତାର ଉଦାହରଣ ଦେଇ ନିଜ କଥା କହିଥିଲେ । ଏହା ମଧ୍ୟ କହିଥିଲେ ମୋଦି ସରକାରରେ କିପରି ବନ୍ଦ ହୋଇଛି ଆଇନର ଗଳା ବାଟ।