ଅର୍ଗସ ବ୍ୟୁରୋ: ବିଲରେ ପାଚିଲା ଧାନ କେଣ୍ଡା । ଅମଳକ୍ଷମ ହୋଇଛି ଏକର ଏକର ଫସଲ । ଦିନେ ୨ ଦିନ ଭିତରେ ଚାଷୀ ଧାନ କାଟି ଘରକୁ ନେବାକୁ ସଜବାଜ ହେଉଥିଲା । ଏହି ସମୟରେ ସବୁ କିଛି ଉଜାଡ଼ି ଦେଇଛି ଅଦିନିଆ ବର୍ଷା । କେଉଁଠି ଧାନ କଟା ହୋଇ ବିଲରେ ପଡ଼ିଛି ତ ଆଉ କେଉଁଠି ଖଳାରେ । ଲଘୁଚାପ ଜନିତ ଅଦିନିଆ ଲଗାଣ ବର୍ଷା ଯୋଗୁଁ ବ୍ୟାପକ ଧାନ ଫସଲ ନଷ୍ଟ ହୋଇଛି । ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ଲେଣ୍ଡୋ ପଞ୍ଚାୟତ ଆସେଲି ଗାଁରେ ନଷ୍ଟ ହୋଇଛି ଏକର ଏକର ଫସଲ ।

ଖୋର୍ଦ୍ଧା ଭଳି ଗଞ୍ଜାମ, ଗଜପତିରେ ସ୍ଥିତି । ଦିନକ ପରେ ଗଞ୍ଜାମରେ ମଣ୍ଡି ଖୋଲିଥାଆନ୍ତା । ଧାନବିକ୍ରି କରି ଚାଷୀ ଦୁଇ ପଇସା ପାଇଥାଆନ୍ତା । ହେଲେ ଲଘୁଚାପ ବର୍ଷା ଯୋଗୁ ସବୁ କିଛି ଉଜାଡ଼ି ଦେଇଛି । ସେହିପରି ଗଜପତି ଜିଲ୍ଲାର ବିଭିନ୍ନ ବ୍ଲକରେ ବି ଚାଷୀଙ୍କ ମେରୁଦଣ୍ଡ ଭାଙ୍ଗିଛି ଅଦିନିଆ ବର୍ଷା । ସେହିପରି ରାୟଗଡ଼ା ଜିଲ୍ଲାର ଗୁଣୁପୁର ବ୍ଲକର ଅନେକ ଗାଁରେ ଧାନ ଚାଷ ନଷ୍ଟ ହୋଇଛି । କେହି କେହି ଧାନ ଉଠାଇ ଖଳାରେ ପକାଇ ଥିବା ବେଳେ, ଅନେକଙ୍କ ଧାନ ଚାଷ ଜମିରେ ପଡ଼ିଛି ।

ଭଦ୍ରକ, ଜଗତସିଂହପୁର, ବାଲେଶ୍ବରରେ ବି ଚାଷୀଙ୍କ ମୁଣ୍ଡରେ ଚଡ଼କ ପକାଇଛି ଅଦିନିଆ ବର୍ଷା । ଭଦ୍ରକ ବ୍ଲକର କଲେଇ ପଞ୍ଚାୟତର ବିଭୁତିପୁର ଅଞ୍ଚଳରେ କଟା ଯାଇଥିବା ଧାନ ବିଲରେ ପଡ଼ି ରହିଛି । ଚାଷୀମାନେ ଋଣ କରି ଧାନ ଚାଷ କରିଥିବା ବେଳେ ଏବେ ଅଦିନିଆ ବର୍ଷା ଦାଉ ସାଧୁଛି । ଜଗତସିଂପୁର ଜିଲ୍ଲା ତିର୍ତ୍ତୋଲ ବ୍ଲକର ବିଭିନ୍ନ ଅଞ୍ଚଳରେ ଅଦିନିଆ ବର୍ଷା ଚାଷୀଙ୍କ ଚିନ୍ତା ବଢାଇଛି । ଗତ ଦୁଇଦିନ ଧରି କୋହଲା ପାଗ ସହିତ ଝିପିଝିପି ବର୍ଷା ଲାଗି ରହିଥିବାରୁ, ପାଚିଲା ଧାନକୁ କିଭଳି ଅମଳ କରିବ ସେଥିପାଇଁ ଅଣ୍ଟା ଭିଡ଼ିଛି ଚାଷୀ ।

ସେପଟେ ସମବାୟ ମନ୍ତ୍ରୀ କହିଛନ୍ତି, ଧାନ ନଷ୍ଟ ହେଲେ ଦିଆଯିବ କ୍ଷତିପୂରଣ । ମଣ୍ଡିରେ ଜରିପାଲର ବ୍ୟବସ୍ଥା କରାଯାଇଛି । ମଣ୍ଡିରେ ଧାନ ଓଦା ହେବା ସମ୍ଭାବନା କମ୍‌ । ବର୍ଷା କମିଲେ ଧାନ ଶୁଖିଲା ପରେ ମଣ୍ଡିରେ କିଣାଯିବ ବୋଲି କହିଛନ୍ତି ମନ୍ତ୍ରୀ । ସେପଟେ ଏନେଇ କୃଷି ବିଭାଗ ପକ୍ଷରୁ ଜାରି ହୋଇଛି ମାର୍ଗଦର୍ଶିକା । କିପରି ନିଜର ଅମଳ ଫସଲକୁ ସୁରକ୍ଷିତ ରଖିବେ ସେନେଇ ଚାଷୀଙ୍କୁ ଦିଆଯାଇଛି ପରାମର୍ଶ । ସେପଟେ ୨୪ ଘଣ୍ଟା ଯାଏ ରାଜ୍ୟରେ ବର୍ଷା ଲାଗି ରହିଥିବା ବେଳେ, କାଲିଠାରୁ ପାଗରେ ଆସିବ ପରିବର୍ତ୍ତନ । ଲେଉଟିବ ଶୀତ, କମିବ ରାତିର ତାପମାତ୍ରା ।

Argus News | argus news | -Argusnews Home: Odisha Latest News, Breaking News, Trending News, Live TV and more