ଅର୍ଗସ ବ୍ୟୁରୋ: ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ବ୍ଲକ କପିଲାଭଟା ପଂଚାୟତ ମାଲପଡା ଗାଁ । ଜିଲ୍ଲାର ଶେଷ ସୀମାରେ ଗାଁଟି ରହିଥିବାରୁ ହୁଏତ ବିକାଶର ଆଢୁଆଳରେ ରହି ଯାଇଛି । ଗାଁରେ ୧୯୭୩ ମସିହାରେ ପ୍ରାଥମିକ ବିଦ୍ୟାଳୟ ସ୍ଥାପନ ହୋଇଥିଲା । ହେଲେ ଛାତ୍ରଛାତ୍ରୀ କମ୍ ଥିବାରୁ ସ୍କୁଲକୁ ବନ୍ଦ କରି ଦେଲା ତତ୍କାଳୀନ ବିଜେଡି ସରକାର । ଫଳରେ ପ୍ରଥମ ଶ୍ରେଣୀ ପାଠ ପଢିବା ପାଇଁ ବରତୁଣ୍ଡା ଓ କପିଲାଭଟା ସ୍କୁଲକୁ ଯାଉଛନ୍ତି କୁନି କୁନି ପିଲା । ଯାହାକୁ ନେଇ ଅଭିଭାବକଙ୍କ ମଧ୍ୟରେ ଦେଖା ଦେଇଛି ଅସନ୍ତୋଷ । ଅନ୍ୟପଟେ ଗାଁରେ ଥିବା ନଳକୂପରୁ ବାହାରୁଛି ଫ୍ଲୋରାଇଡ଼ ମିଶା ପାଣି । ପାଣି ପିଇ ଅନେକ ରୋଗର ଶିକାର ହେଉଥିବାରୁ ଶୁଦ୍ଧ ପାନୀୟ ଜଳ ଯୋଗାଇ ଦେବା ପାଇଁ ଦାବି କରିଛନ୍ତି ଗ୍ରାମବାସୀ ।

ମାଲପଡା ଗାଁକୁ ଯିବାକୁ ହେଲେ ଏ ହେଉଛି ଏକ ମାତ୍ର ମୁଖ୍ୟ ରାସ୍ତା । ଗ୍ରୀଷ୍ମ ଋତୁରେ କିଛି ମାସ ଚଳିଯାଏ । ବର୍ଷା ଦିନ ଆସିଲେ କଥା ସରିଲା । ସ୍ବୀଧୀନତାର ଅନେକ ବର୍ଷ ପରେ ମଧ୍ୟ ଗାଁକୁ ପକ୍କା ରାସ୍ତାଟିଏ ନାହିଁ। ଫଳରେ ଏହି ରାସ୍ତାରେ ଦୈନନ୍ଦିନ ଛାତ୍ରଛାତ୍ରୀ, ଲୋକମାନେ ଯିବା ଆସିବା କରିଥିବା ବେଳେ ଦୁର୍ଘଟଣାର ସମ୍ମୁଖୀନ ହେଉଥିବା ମଧ୍ୟ ନଜର ରହିଛି । ଗାଁରେ ଦେଖା ଦେଇଥିବା ବିଭିନ୍ନ ସମସ୍ୟା ନେଇ ଜନପ୍ରତିନିଧିଙ୍କ ଠାରୁ ଆରମ୍ଭ କରି ପ୍ରଶାସନିକ ଅଧିକାରୀଙ୍କୁ ଜଣାଇଛନ୍ତି ହେଲେ ଏଥିପ୍ରତି କେହି ଦୃଷ୍ଟି ଦେଉନଥିବା ଅଭିଯୋଗ କରିଛନ୍ତି ଗ୍ରାମବାସୀ । ସେପଟେ ଆମେ ବଲାଙ୍ଗୀର ଜିଲ୍ଲାପାଳଙ୍କୁ ପଚାରିବାରୁ ବିଭିନ୍ନ ସମସ୍ୟାର ସମାଧାନ ପାଇଁ ଆବଶ୍ୟକ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି ।

ଗ୍ରାମାଂଚଳରେ ଏବେ ବି ଅନେକ ଯୋଜନା ଅପହଂଚ । ଲୋକେ ମୌଳିକ ସୁବିଧାରୁ ବଂଚିତ । 24 ବର୍ଷର ସରକାରରେ ଲୋକଙ୍କ ଭାଗ୍ୟ ସୁଧୁରି ନଥିବା ବେଳେ ନୂଆ ସରକାରରେ ସମସ୍ୟାର ସମାଧାନ ହେବା ନେଇ ଆଶା । ତେବେ କେବେ ମାଲପଡାବାସୀଙ୍କ ସମସ୍ୟାର ସମାଧାନ ହେଉଛି ତା ଉପରେ ନଜର ।

Argus News | argus news | Odisha Latest News, Breaking News, Trending News, Live TV