ଅର୍ଗସ ବ୍ୟୁରୋ: ନୂଆ ବର୍ଷରୁ ଶ୍ରୀମନ୍ଦିରରେ ଲାଗୁ ହେବାକୁ ଯାଉଛି ନୂଆ ଦର୍ଶନ ବ୍ୟବସ୍ଥା । ବାହାର କାଠ ଦର୍ଶନ ଶୃଙ୍ଖଳା ପାଇଁ ନିଆଯାଇଛି ଗୁରୁତ୍ଵପୂର୍ଣ୍ଣ ନିଷ୍ପତ୍ତି । ଗରୁଡ ସ୍ତମ୍ଭ ଠାରୁ ବାହାର କାଠ ପରିସର ୧୬ ପିଲାର ବିଶିଷ୍ଟ ଅଞ୍ଚଳରେ ୬ ଥାକିଆ ଦର୍ଶନ ବ୍ୟବସ୍ଥା ଆପଣାଇବାକୁ ଯାଉଛନ୍ତି ଶ୍ରୀମନ୍ଦିର ପ୍ରଶାସନ ଓ ରାଜ୍ୟ ସରକାର । ଯାହା ଦ୍ଵାରା ଭିତର ଦର୍ଶନ ସମୟରେ ସାତ ପାହାଚ ଦ୍ଵାରରେ ପ୍ରବେଶ କରି ଭକ୍ତ ଶ୍ରଦ୍ଧାଳୁ ମାନେ ଘଣ୍ଟି ଦ୍ଵାର ଓ ଗାରଦ ଦ୍ଵାରରେ ସୁରୁଖୁରୁରେ ବାହାରି ପାରିବେ । ବୃଦ୍ଧ ବୟସ୍କ ,ଶିଶୁ ,ମହିଳା ମାନେ ସୁଉଚ ରାମ୍ପରେ ଯାଇ ଦର୍ଶନ କରି ଆରପଟେ ରାମ୍ପ ସାହାଯ୍ୟରେ ଓହ୍ଲାଇ ପାରିବେ । ଆଇନମନ୍ତ୍ରୀ ପୃଥ୍ବିରାଜ ହରିଚନ୍ଦନ କହିଛନ୍ତି, ଆସନ୍ତା ଜାନୁଆରୀ ୧ ରୁ ଏହି ଦର୍ଶନ ବ୍ୟବସ୍ଥା ନିୟମିତ ଭାବରେ ଲାଗୁହେବ । ଡିସେମ୍ବର ୨୭ ୨୮ ତାରିଖରୁ କ୍ରୀୟାନ୍ଵୟନ ହୋଇ ୩୦ କିମ୍ବା ୩୧ ତାରିଖରେ ପରୀକ୍ଷା ମୂଳକ ଭାବରେ ଲାଗୁ ହେବ।

୬ ଥାକିଆ ଧାଡ଼ି ଦର୍ଶନ ବ୍ୟବସ୍ଥା ରେ ରହିବ ୬ , ୬ ଇଞ୍ଚ ଉଚ୍ଚତା ପାର୍ଥକ୍ୟ ଥିବା ୬ ଟି ଷ୍ଟେପ । ଦୁଇ ପାର୍ଶ୍ଵରେ ଚଢିବା ପାଇଁ ରହିବ ସୁଉଚ୍ଚ ରାମ୍ପ୍ । ଗୋଟିଏ ପାର୍ଶ୍ଵରେ ରାମ୍ପ ରେ ଚଢ଼ି ଧାଡ଼ି ସଦୃଶ ଷ୍ଟେପ୍ ରେ ଦର୍ଶନ କରିବା ସହ ଅନ୍ୟ ପାର୍ଶ୍ବରେ ଥିବା ରାମ୍ପ ରେ ଓହ୍ଲାଇବେ ଭକ୍ତ। ଚାରିଦ୍ବାର ଖୋଲିବା ପରେ ବାହାର ଦର୍ଶନ ଶୃଙ୍ଖଳିତ ହୋଇଛି । ହେଲେ ଶ୍ରୀମନ୍ଦିର ଭିତରେ ସୀମିତ ପରିସର ଏବଂ ଭକ୍ତ ଙ୍କ ସଂଖ୍ୟା ବୃଦ୍ଧି ଯୋଗୁଁ ବାହାର କାଠ ଦର୍ଶନ ରେ ଠେଲା ପେଲା ଲାଗି ରହିଥିଲା । ଅନେକ ଭକ୍ତ ଦର୍ଶନରୁ ବଞ୍ଚିତ ହେଉଥିଲେ। ବିଶେଷ କରି ବୃଦ୍ଧ,ମହିଳା ଓ ଶିଶୁଙ୍କ ପାଇଁ ଦର୍ଶନ ସହଜ ନଥିଲା । ଏଥିପାଇଁ ପୂର୍ବ ପରିଚାଳନା କମିଟିର ପରାମର୍ଶ ନେଇ ଓବିସିସି କୁ ଦିଆଯାଇଥିଲା ନୂଆ ଦର୍ଶନ ଡିଜାଇନ୍ କରିବାର ଦାୟିତ୍ଵ। ଆବଶ୍ୟକ ସଂଶୋଧନ ସହ ଏବେ ଓବିସିସି ର ଡିଜାଇନ୍ କୁ ଅନୁମତି ମିଳିବା ପରେ ପ୍ରକ୍ରିୟା ଆରମ୍ଭ ହୋଇଛି ।ନୂଆବର୍ଷରେ ପୁରୀ ଶ୍ରୀମନ୍ଦିରରେ ବିଶ୍ବର କୋଣଅନୁକୋଣରୁ ଭକ୍ତଙ୍କ ସମାଗମ ହେବାକୁ ଥିବାରୁ ଏହି ଧାଡି ଦର୍ଶନ ବ୍ୟବସ୍ଥା ସହାୟକ ହେବ ବୋଲି ଆଶା କରାଯାଉଛି ।

Argus News | argus news | Odisha Latest News, Breaking News, Trending News, Live TV