ଆଉଟସୋର୍ସିଂ ନିଯୁକ୍ତିକୁ ନେଇ ରାଜ୍ୟ ସରକାରଙ୍କ ବଡ଼ ନିଷ୍ପତ୍ତି । ଆଗକୁ ଅର୍ଥ ବିଭାଗର ଅନୁମତି ବିନା ଆଉଟସୋର୍ସିଂରେ କୌଣସି ନିଯୁକ୍ତି ଦିଆଯିବନି । ସମସ୍ତ ବିଭାଗକୁ ଏନେଇ ଅର୍ଥ ବିଭାଗର ସଚିବ ଚିଠି ଲେଖି ଜଣାଇଛନ୍ତି । ଏହା ସହ ଆହୁରି କୁହାଯାଇଛି ଯେଉଁ ଆଉଟସୋର୍ସିଂ କର୍ମଚାରୀଙ୍କ ଅବଧି ସରିଛି ଅର୍ଥ ବିଭାଗର ବିନା ଅନୁମତିରେ ସେମାନଙ୍କ ଚୁକ୍ତି ନବୀକରଣ କରାଯିବ ନାହିଁ । ଅର୍ଥ ବିଭାଗ ଯେତିକି ସଂଖ୍ୟକ ଆଉଟସୋର୍ସିଂ ନିଯୁକ୍ତି ପାଇଁ ଅନୁମତି ଦେଇଛି ତାହା ଠାରୁ ଅଧିକ ନିଯୁକ୍ତି ହୋଇପାରିବ ନାହିଁ । ଅଧିକ ନିଯୁକ୍ତି ପାଇଁ କାରଣ ଦର୍ଶାଇବା ସହ ଅର୍ଥ ବିଭାଗର ଅନୁମତି ନେବାକୁ ହେବ ବୋଲି ମଧ୍ୟ କୁହାଯାଇଛି । ଶୁଣନ୍ତୁ ସରକାରଙ୍କ ଏହି ନିଷ୍ପତି କୁ ନେଇ କଣ କହୁଛନ୍ତି ଆଉଟସୋର୍ସିଂ କର୍ମଚାରୀ ସଙ୍ଘ ।

ସେପଟେ କାହିଁକି ଆଉଟସୋର୍ସିଂ କାମ ହେଉଛି ବୋଲି ଖୋଦ ମୁଖ୍ୟମନ୍ତ୍ରୀ ମୋହନ ମାଝୀ କିଛି ଦିନ ତଳେ ଉଠାଇଥିଲେ ପ୍ରଶ୍ନ । କହିଥିଲେ ସରକାରୀ ଇଞ୍ଜିନିୟର ଥାଇ କାହିଁକି ଆଉଟସୋର୍ସ ଇଞ୍ଜିନୟର ଉପରେ ସରକାର କରୁଛନ୍ତି ନିର୍ଭର ? କେଉଁ ସଂସ୍ଥାକୁ...କେଉଁ ବିଭାଗ...କେଉଁ କାମ ପାଇଁ କେତେ ଟଙ୍କା ଦେଇଛନ୍ତି ? ସେ ନେଇ ମୁଖ୍ୟ ଶାସନ ସଚିବଙ୍କୁ ଗତ ୧୦ ବର୍ଷର ଫାଇଲ ମାଗିଥିଲେ ମୁଖ୍ୟମନ୍ତ୍ରୀ ।

ଏବେ ରାଜ୍ୟରେ ବିଭିନ୍ନ ବିଭାଗରେ କାମ କରୁଛନ୍ତି ପ୍ରାୟ 40 ହଜାରରୁ ଅଧିକ ଆଉଟ ସୋର୍ସିଂ କର୍ମଚାରୀ । ବିଜେପି ବିରୋଧୀ ଦଳରେ ଥିବାବେଳେ ଅଭିଯୋଗ କରିଥିଲା ବିଜେଡି ସରକାର ଆଉଟସୋର୍ସିଂରେ ଚାଲିଛି । ଆଉ ଏବେ ରାଜ୍ୟରେ ବିଜେପି ସରକାର ଆସିବା ପରେ ଆଉଟସୋର୍ସିଂ କାମକୁ ନେଇ ମୁଖ୍ୟମନ୍ତ୍ରୀ ଖପ୍ପା ହେବା ଓ ଅର୍ଥ ବିଭାଗର ଏହି ଚିଠି କହୁଛି ଖୁବଶୀଘ୍ର ପୂର୍ବ ବିଜେଡି ସରକାର ଆଉଟସୋର୍ସିଂ ମଡେଲର ଗୁମର ଖୋଲିବ ।