ଅର୍ଗସ ବ୍ୟୁରୋ: ପ୍ରହସନ ପାଲଟିଛି ବିରଳ ଅଲିଭ ରିଡଲେ କଇଁଛଙ୍କ ସୁରକ୍ଷା । ନୋ ଫିସିଂ ଜୋନ୍ କଟକଣାକୁ ଉଲଙ୍ଘନ କରି ଦୈନିକ ମାଛ ମାରୁଛନ୍ତି ଶହ ଶହ ଟ୍ରଲର୍ । ପୁରୀ ଜିଲ୍ଲା ଦେବୀ ମୁହାଣଠୁ ପ୍ରାୟ ୨୦ କିମି ବ୍ୟାପ୍ତ ସମୁଦ୍ର ତଟବର୍ତ୍ତୀ ଅଞ୍ଚଳ ଓ ସମୁଦ୍ର ଭିତରକୁ ୫ କିମି ଅଞ୍ଚଳକୁ ନୋ ଫିସିଂ ଜୋନ୍ ଘୋଷଣା କରାଯାଇଛି । ହେଲେ ନିୟମ ନମାନି ବେଆଇନ୍ ଭାବେ ମାଛ ମାରୁଛନ୍ତି ଟ୍ରଲର୍ । ଟ୍ରଲର୍, ଡଙ୍ଗା ସମୁଦ୍ରର ନିଷିଦ୍ଧାଞ୍ଚଳରେ ଅବାଧ ଚଳପ୍ରଚଳ କରୁଥିବାରୁ କଇଁଛ ମାନେ କୂଳରେ ପହଞ୍ଚିବା ଆଗରୁ ଆଘାତ ପାଇ ମୃତ୍ୟୁମୁଖରେ ପଡ଼ୁଛନ୍ତି । ପୁରୀ ଜିଲ୍ଲାର ଅରଖକୁଦା, ଦେବୀ ନଦୀ ମୁହାଣ ସହ ପୁରୀ ଉପକୂଳକୁ ଅସୁରକ୍ଷିତ ହୋଇପଡିଛି କଇଁଛଙ୍କ ଜୀବନ । ଏପରି ହେବା ଦ୍ବାରା ଅଣ୍ଡା ଦେବା ପାଇଁ ଅଲିଭ ରିଡଲେ କଇଁଛ ଆଉ ଆସିବେ ନାହିଁ । ଯାହା ଫଳରେ ବିଗିଡିଯିବ ଜୈବ ବିଭିଧତା ବୋଲି କହିଛନ୍ତି ପରିବେଶବିତ୍ ।

ନିୟମନୁଯାୟୀ, ଯେଉଁମାନେ ନିଷିଦ୍ଧାଞ୍ଚଳରେ ମାଛ ଧରିବେ କି ଯନ୍ତ୍ରଚାଳିତ ବୋଟ୍‌ କି ଟ୍ରଲର୍ ଚଳାଚଳ କରାଇବେ, ସେମାନେ ଓଡ଼ିଶା ମେରାଇନ୍‌ ଫିସିଂ ରେଗୁସେନ୍‌ ଆଇନ-୧୯୮୨ ଓ ବନ୍ୟଜନ୍ତୁ ସୁରକ୍ଷା ଆଇନ-୧୯୭୨ ଅନୁଯାୟୀ ଦଣ୍ଡିତ ହେବେ । ଏଥିସହ ଜବତ ଟ୍ରଲରରୁ ମାଛ ନିଲାମ କରିବ ମତ୍ସ୍ୟ ସଂପଦ ବିଭାଗ । ଆଉ ନିଲାମ ଦର ଯେତିକି ହେବ, ତାର ୫ ଗୁଣା ଜରିମାନା ଆଦାୟ ହେବ । ହେଲେ ଅସ୍ତରଙ୍ଗରେ ଜବତ ହେଉଥିବା ଟ୍ରଲରଠୁ ନିଲାମ ଜାଲିଆତି ସହ କମ୍ ଜରିମାନା ଆଦାୟ କରି ଖସାଇ ଦିଆଯାଉଥିବାର ଅଭିଯୋଗ କରିଛନ୍ତି ପୁରୀ ଜିଲା ପାରମ୍ପରିକ ମତ୍ସ୍ୟଜୀବୀ ସଙ୍ଘ । ତେବେ ଏଯାବତ୍ ୭ରୁ ଅଧିକ ଟ୍ରଲର୍ ଜବତ କରି ସାରିଲାଣି ମତ୍ସ୍ୟ ବିଭାଗ । ଅନ୍ୟପଟେ ନିୟମ ଉଲଙ୍ଘନ କଲେ କାର୍ଯ୍ୟାନୁଷ୍ଠାନ ନିଆଯିବ କହିଛନ୍ତି ପୁରୀ ଜିଲ୍ଲାପାଳ ।