ଅର୍ଗସ ବ୍ୟୁରୋ: କାନ୍ଦୁଛି ଚାଷୀ । ଉଜୁଡି ଯାଇଛି କ୍ଷେତରେ ହସୁଥିବା ସୁନାର ଫସଲ । ଅନ୍ନଦାତାଙ୍କ ଆର୍ଥିକ ମେରୁଦଣ୍ଡକୁ ଦୋହଲାଇ ଦେଇଛି ଅଦିନିଆ ବର୍ଷା । ଏଇ କିଛିଦିନ ତଳେ ହୋଇଥିବା ବର୍ଷା ପାଣି କ୍ଷେତରୁ ଛାଡି ନଥିବାବେଳେ ପୁଣି ବର୍ଷା ମାଡ଼ । ଲଘୁଚାପ ପ୍ରଭାବରେ ଦୁଇ ଦିନ ହେଲା ଲାଗି ରହିଛି ବର୍ଷା। ଫଳରେ ହେକ୍ଟର ହେକ୍ଟର ଚାଷ ଜମିରେ ପାଣି ଲହଡ଼ି ଭାଙ୍ଗୁଛି । ଦକ୍ଷିଣ, ପଶ୍ଚିମ, ପୂର୍ବ, ଉତ୍ତର ସବୁଠି ବର୍ଷା ବିତ୍ପାତର ଚିତ୍ର । ଗଞ୍ଜାମ ଜିଲ୍ଲା ଆସିକା ବ୍ଲକର ଦୃଶ୍ୟ । ବିଲରେ
କଟା ହୋଇଥିବା ଧାନ ବର୍ଷାରେ ଭିଜି ଗଜା ହେବାକୁ ବସିଛି। ସେହିପରି ଦିଗପହଣ୍ଡିରେ ବି ପାଚିଲା ଧାନ ନଷ୍ଟ ହେବା ଦେଖି ଚିନ୍ତାରେ ଚାଷୀ । ଅନ୍ୟପଟେ ରାୟଗଡ଼ାରେ ମଣ୍ଡିରେ ଅବସ୍ଥା ବେହାଲ୍ ହୋଇପଡିଛି ।

ଏପଟେ ଯଦି ପଶ୍ଚିମ ଓଡ଼ିଶା ଉପରେ ନଜର ପକାଇବେ । ଦେଖନ୍ତୁ, କଳାହାଣ୍ଡି ଜିଲ୍ଲାରେ ବି ଚାଷୀ ସ୍ଥିତି ବେହାଲ୍ ହୋଇପଡିଛି । ଜିଲ୍ଲାରେ ୧୫ ଦିନ ପୂର୍ବରୁ ଧାନ ଅମଳ ହୋଇଥିବାବେଳେ ଚାଷୀ ମାନେ କିଏ ଖଳାରେ ଧାନ ଶୁଖାଇ ରଖିଥିଲେ ତ କିଏ ମଣ୍ଡିରେ ନେଇ ସାଇତି ଥିଲା । ହେଲେ ତୁହାକୁ ତୁହା ବର୍ଷା ମାଡ଼ ଖାଇ ଧାନ ସବୁ ନଷ୍ଟ ହେବାକୁ ବସିଲାଣି । ସେହିପରି ଭଦ୍ରକ ଜିଲ୍ଲାରେ ବି ଦୁଇ ଦିନ ହେଲା କୋହଲା ପାଗ ସାଙ୍ଗକୁ ଝିପି ଝିପି ବର୍ଷା ଚାଷୀଙ୍କ ଚିନ୍ତା ବଢାଇ ଦେଇଛି ।  ଅନ୍ୟପଟେ ଆସନ୍ତାକାଲି ବି ରାଜ୍ୟରେ ହାଲୁକା ବର୍ଷା ହୋଇପାରେ । ଦକ୍ଷିଣ ଓଡ଼ିଶାରେ ବର୍ଷା ହେବା ସମ୍ଭାବନା । ପୁଣି ଆସନ୍ତା ୨୮ ତାରିଖରେ ବର୍ଷା ହେବା ନେଇ ଆକଳନ କରିଛି ଆଞ୍ଚଳିକ ପାଣିପାଗ କେନ୍ଦ୍ର ।

ଅଦିନିଆ ବର୍ଷାରେ କେଉଁ ଜିଲ୍ଲାରେ କେତେ ଚାଷ ଜମି କ୍ଷତିଗ୍ରସ୍ତ ହୋଇଛି, ସେନେଇ ଜିଲ୍ଲାପାଳମାନଙ୍କୁ ରିପୋର୍ଟ ମଗାଯାଇଛି। ଖୁବଶୀଘ୍ର ଚାଷୀମାନଙ୍କୁ କ୍ଷତିପୂରଣ ମିଳିବ କହିଛନ୍ତି ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ ।