ଅର୍ଗସ ବ୍ୟୁରୋ: ନୃତ୍ୟରେ ମନ ଜିଣୁଥିଲେ, ହେଲେ ନିଜକୁ ଭଲ ଭାବେ ବୁଝି ପାରିଲେନି । ଆଉ ଶେଷରେ ଅସହାୟ ହୋଇ ନିଜ ଜୀବନ ହାରି ଦେଇଛନ୍ତି । ଉତ୍କଳ ସଙ୍ଗୀତ ମହାବିଦ୍ୟାଳୟ ହଷ୍ଟେଲରୁ ଜଣେ ଛାତ୍ରୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଛି । 

ଉତ୍କଳ ସଙ୍ଗୀତ ମହାବିଦ୍ୟାଳୟ ହଷ୍ଟେଲ ରୁମ୍ ନମ୍ବର ୨୧ରୁ ଛାତ୍ରୀଙ୍କ ମୃତଦେହ ମିଳିଛି । ମୃତ ଛାତ୍ରୀ ଜଣଙ୍କ ଉତ୍କଳିକା ସ୍ଵାଇଁ, ଘର କେନ୍ଦ୍ରାପଡ଼ା ଜିଲ୍ଲାରେ ବୋଲି ସୂଚନା ମିଳିଛି । ଉତ୍କଳିକା ଯୁକ୍ତ ୨ ଦ୍ଵିତୀୟ ବର୍ଷର ନୃତ୍ୟ ଛାତ୍ରୀ ଥିଲେ । ହଷ୍ଟେଲରୁ ଉତ୍କଳିକା ସ୍ୱାଇଁଙ୍କ ଝୁଲନ୍ତା ମୃତଦେହ ଠାବ ହୋଇଛି । ହଷ୍ଟେଲରେ ପହଞ୍ଚି ତଦନ୍ତ ଆରମ୍ଭ କରିଛି କ୍ୟାପିଟାଲ୍ ଥାନା ପୋଲିସ । ତେବେ ଉତ୍କଳିକା କାହିଁକି କେଉଁ ପରିସ୍ଥିତିରେ ଏଭଳି ଚରମ ନିଷ୍ପତ୍ତି ନେଲେ ତାହା ଜଣା ପଡ଼ିନି ।

ହଷ୍ଟେଲ ୱାର୍ଡେନଙ୍କ ସୂଚନା ଅନୁସାରେ, ହଷ୍ଟେଲର ୨୧ ନମ୍ବର ରୁମରେ ୩ ଜଣ ସାଙ୍ଗ ଏକାଠି ରହୁଥିଲେ । ଗତ ୨ ଦିନ ହେଲା ୨ ଜଣ ସାଙ୍ଗ ହଷ୍ଟେଲରେ ନଥିଲେ । ହଷ୍ଟେଲର ଅନ୍ୟ ସାଙ୍ଗମାନେ ସକାଳେ କବାଟ ବାଡ଼େଇବା ସତ୍ତ୍ଵେ ଖୋଲି ନଥିଲେ ଉତ୍କଳିକା । ପରେ କବାଟ ଭାଙ୍ଗିବାରୁ ଉତ୍କଳିକାଙ୍କ ଝୁଲନ୍ତା ମୃତଦେହ ଦେଖିବାକୁ ମିଳିଥିଲା ।

ହଷ୍ଟେଲରୁ କ୍ୟାପିଟାଲ୍ ଥାନା ପୋଲିସ ଉତ୍କଳିକାଙ୍କ ମୋବାଇଲ୍ ଫୋନ୍ ଜବତ କରିଛି । ଫୋନ୍‌ର ଯାଞ୍ଚ କରାଯିବ ବୋଲି କହିଛି ପୋଲିସ । ଉତ୍କଳିକାଙ୍କ ୨ ସାଙ୍ଗକୁ ପଚରାଉଚରା ସହ ସାଇଣ୍ଟିଫିକ୍ ଟିମ୍ ଦ୍ଵାରା ରୁମ୍ ଯାଞ୍ଚ କରାଯିବ ବୋଲି କହିଛନ୍ତି ପୋଲିସ ଅଧିକାରୀ ।