ଓଡିଶାରେ ବଢୁଛି ପୁଞ୍ଜିନିବେଶ । ଏବେ ଦେଶର ବଡ ବଡ କମ୍ପାନୀଙ୍କ ପ୍ରଥମ ପସନ୍ଦ ପାଲଟିଛି ଓଡିଶା । ୪୦ ତମ ହାଇଲେଭଲ କ୍ଲିଅରାନ୍ସ ଅଥରିଟି ମିଟିଂରେ ୧୦ ଶିଳ୍ପକୁ ଅନୁମୋଦନ ମିଳିଛି । ରାୟଗଡ଼ା ଜିଲ୍ଲାରେ ୨ଟି, କେନ୍ଦୁଝରରେ ୨ଟି, ଗଞ୍ଜାମରେ ୨ଟି, ଭଦ୍ରକ, ମୟୂରଭଞ୍ଜ, କଟକ ଓ ଖୋର୍ଦ୍ଧାରେ ଗୋଟିଏ ଲେଖାଏଁ ପ୍ରକଳ୍ପକୁ ମଞ୍ଜୁରୀ ଦେଇଛନ୍ତି ବିଜେପି ସରକାର । ରାୟଗଡ଼ାରେ ବେଦାନ୍ତ କମ୍ପାନୀ ଦୁଇଟି ପ୍ରକଳ୍ପ ପ୍ରତିଷ୍ଠା ପାଇଁ ମଞ୍ଜୁରୀ ପାଇଛି । ରାୟଗଡାରେ ୬ ମିଲିୟନ ଟନ୍ ବିଶିଷ୍ଟ ଉତ୍ପାଦନକ୍ଷମ ଆଲୁମିନା ରିଫାଇନାରି ପ୍ରକଳ୍ପ ଏବଂ ୧.୨ ମିଲିୟନ ଟନର ଆଲୁମିନିୟମ ସ୍ମେଲଟର ପ୍ରତିଷ୍ଠା କରିବ ବେଦାନ୍ତ । ଏଥିରେ ୯୦ ହଜାର କୋଟିରୁ ଅଧିକ ଟଙ୍କା ବିନିଯୋଗ ହେବ ଏବଂ ୧୬ ହଜାର ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ପ୍ରସ୍ତାବ ରହିଛି । ମୁଖ୍ୟମନ୍ତ୍ରୀଙ୍କ ଜିଲ୍ଲା କେନ୍ଦୁଝରରେ ଷ୍ଟିଲ ପ୍ଲାଣ୍ଟ ନିର୍ମାଣ କରିବ ଜେଏସ୍‌ଡବ୍ଲ୍ୟୁ । ବିନିଯୋଗ ହେବ ୩୫ ହଜାର କୋଟି ଏବଂ ୬ ହଜାର ଯୁବକଙ୍କୁ ମିଳିବ ନିଯୁକ୍ତି । ଏହାସହ କେନ୍ଦୁଝର ଜିଲ୍ଲାରେ ଓସିଏଲ ଆଇରନ ଆଣ୍ଡ ଷ୍ଟିଲ ଲିମିଟେଡ ମଧ୍ୟ ୩ ହଜାର କୋଟି ବିନିଯୋଗ କରିବା ପାଇଁ ମଞ୍ଜୁରୀ ପାଇଛି । ଏଥିରେ ୩ ହଜାର ୫୦୦ ନିଯୁକ୍ତି ସୁଯୋଗ ସୃଷ୍ଟି ହେବ ବୋଲି ଲକ୍ଷ୍ୟ ରଖାଯାଇଛି ।

ପୂର୍ବ ବିଜେଡି ସରକାର ସମୟରେ ୨୦୧୬, ୨୦୧୮ ଏବଂ ୨୦୨୨ରେ ତିନିଟି ମେକ୍ ଇନ୍ ଓଡିଶା କନକ୍ଲେଭ ଆୟୋଜନ କରାଯାଇଥିଲା । 3 ଥରରେ ମୋଟ 1047ଟି ଶିଳ୍ପ ପାଇଁ ପ୍ରସ୍ତାବ ଆସିଥିଲା। ସେଥିରୁ ମାତ୍ର 171ଟି ଶିଳ୍ପ ଆଂଶିକ ବା ପୂର୍ଣ୍ଣ ଭାବେ କାର୍ଯ୍ୟକ୍ଷମ ହୋଇପାରିଥିଲା। ଅର୍ଥାତ୍ ପ୍ରାୟ 900ଟି ଶିଳ୍ପ ପ୍ରସ୍ତାବ କେବଳ ପ୍ରସ୍ତାବରେ ହିଁ ରହିଗଲା। ବିଜେଡି ସରକାରର ଅପାରଗତା କାରଣରୁ ଏ ବାବଦକୁ ଲକ୍ଷ ଲକ୍ଷ କୋଟି ଟଙ୍କାର ପୁଞ୍ଜିନିବେଶ ଓ ହଜାର ହଜାର ନିଯୁକ୍ତି ସୁଯୋଗ ସୃଷ୍ଟି ହେବାରୁ ବଞ୍ଚିତ ହୋଇଥିଲା ରାଜ୍ୟ।