କଣ୍ଟାବାଞ୍ଜି: ରେଳ ୱାଗନରୁ ମିଳିଲା ଗୋଳାବାରୁଦ କାରଖାନାର ବୋମା । ବଲାଙ୍ଗିର ଜିଲା କଣ୍ଟାବାଞ୍ଜି ରେଳ ଷ୍ଟେସନର ଏକ ରେଳ ୱାଗନରୁ ୧୨ଟି ବୋମା ଜବତ ହୋଇଛି । ଷ୍ଟେସନକୁ ଆସୁଥିବା ପ୍ରତିଟି ଟ୍ରେନର ୱାଗନ ଯାଞ୍ଚ କରାଯାଏ । ରବିବାର ଆସିଥିବା ଏକ ଟ୍ରେନ୍‌ ତନଖି ବେଳେ ଏକ ୱାଗନରେ ବୋମା ଦେଖିଥିଲେ ଅଧିକାରୀ ।

ୱାଗନରେ ଥିବା ୧୨ଟି ବୋମାକୁ ଅଧିକାରୀ ଜବତ କରିବା ସହ କେଉଁଠୁ, କିଏ ଆଣିଲା ଛାନଭିନ୍ କରିଥିଲେ । ତଦନ୍ତ ବେଳେ ଜଣାପଡ଼ିଥିଲା ୱାଗନରୁ ଜବତ ବୋମା ସଇଁତଳା ବଡ଼ମାଲ ସ୍ଥିତ ବଡ଼ମାଲ ଗୋଳାବାରୁଦ କରାଖାନାର ।

ତେବେ ଗୋଳାବାରୁଦ କାରଖାନାର ଫାଟକ ଡେଇଁ କେମିତି ବୋମା ବାହାରକୁ ଆସିଲା ? ଆଉ କିଏ ଆଣି ଟ୍ରେନ୍ ୱାଗନରେ ରଖିଲା ? ଏଥିରେ ଗୋଳାବାରୁଦ କର୍ମଚାରୀଙ୍କ ସମ୍ପୃକ୍ତି ଅଛି କି ? ଏନେଇ ନାନା ଚର୍ଚ୍ଚା ହେଉଥିବା ବେଳେ କଣ୍ଟାବାଞ୍ଜି ଷ୍ଟେସନ ମ୍ୟାନେଜର ଗୋଳାବାରୁଦ କର୍ତ୍ତୃପକ୍ଷଙ୍କୁ ଜବତ ବୋମା ହସ୍ତାନ୍ତର କରିଛନ୍ତି । ତେବେ ୱାଗନରେ ବୋମା ଆଣି କିଏ, କେଉଁ ପରିସ୍ଥିତିରେ ରଖିଲା ସେ ନେଇ ରେଲୱେ ତଦନ୍ତ କରିବା ଆବଶ୍ୟକ ।