ଓଡ଼ିଶାରେ ବର୍ତ୍ତମାନ ସୁଦ୍ଧା ୧୨ ଜଣ ପାକିସ୍ତାନୀ ଚିହ୍ନଟ କରାଯାଇଛି । ସେମାନଙ୍କୁ ଭାରତ ଛାଡିବାକୁ ନିର୍ଦ୍ଦେଶ ଦିଆଯାଇଛି । ସେମାନଙ୍କ ଉପରେ ନଜର ରଖିଛି ପୋଳିସ । ତାଙ୍କ ମଧ୍ୟରୁ ଜଣେ ରାଜ୍ୟ ଛାଡିଛନ୍ତି । ଯେଉଁମାନେ ଦୀର୍ଘକାଳୀନ ଭିସା ଆବେଦନ କରିଛନ୍ତି ସେମାନଙ୍କ ଉପରେ ପରବର୍ତ୍ତୀ ନିର୍ଦ୍ଦେଶ ଅନୁଯାୟୀ ପଦକ୍ଷେପ ନିଆଯିବ ବୋଲି ପୋଲିସ ଡିଜି ଓ୍ବାଇ. ବି. ଖୁରାନିଆ ସୂଚନା ଦେଇଛନ୍ତି ।

କୁହାଯାଇଛି ଓଡ଼ିଶାରୁ ବିଦା ହେବେ ପାକିସ୍ତାନୀ ଓ ବାଂଲାଦେଶୀ । ପଞ୍ଚାୟତ ସ୍ତରରେ ଚାଲିଛି ଅନୁପ୍ରବେଶକାରୀଙ୍କୁ ଚିହ୍ନଟ କରିବା ପ୍ରକ୍ରିୟା । କିଛି ଲୋକଙ୍କ ତାଲିକା ସରକାର ପ୍ରସ୍ତୁତ କରିଛନ୍ତି । କେଉଁ ଦେଶର କେଉଁଠି ରହି କଣ କାମ କରୁଛନ୍ତି, ସେ ବାବଦରେ ସରକାର ଅବଗତ ଅଛନ୍ତି । ନିକଟରେ ଘଟିଥିବା ପହଲଗାମ ଆତଂକବାଦୀ ଆକ୍ରମଣ ପରେ ଚିନ୍ତିତ ଅଛନ୍ତି ସରକାର । ଯେଉଁମାନେ ଭିସା କିମ୍ବା ବିନା ଭିସାରେ ରହୁଛନ୍ତି, ସେମାନଙ୍କୁ ଚିହ୍ନଟ କରାଯାଇଛି ।

ଯେଉଁ ୧୨ ଜଣ ପାକିସ୍ତାନୀ ଚିହ୍ନଟ ହୋଇଛନ୍ତି, ସେମାନଙ୍କୁ ବି ବାହାର କରିବା ପାଇଁ ନିର୍ଦ୍ଦେଶ ଦିଆଯାଇଛି । ଆଧାର କାର୍ଡ, ଭୋଟର କାର୍ଡ ଯାଞ୍ଚ କରାଯାଉଛି । ସ୍ଥାନୀୟ ପ୍ରତିନିଧି ଓ ଲୋକଙ୍କଠାରୁ ମଧ୍ୟ ପରାମର୍ଶ ନିଆଯାଉଛି । ଖୁବଶୀଘ୍ର ଅନୁପ୍ରବେଶକାରୀଙ୍କ ତାଲିକା ଗୃହ ବିଭାଗ ପାଖକୁ ଆସିବ । ଯେଉଁ ବାଂଲାଦେଶୀ ଓ ପାକିସ୍ତାନୀ ଅନୁପ୍ରବେଶକାରୀ ସେମାନଙ୍କୁ ବିଦା କରାଯିବ ବୋଲି କହିଛନ୍ତି ପଞ୍ଚାୟତିରାଜ ମନ୍ତ୍ରୀ ରବି ନାରାୟଣ ନାଏକ ।

ସେପଟେ ଓଡ଼ିଶାରେ ରାସନ କାର୍ଡ ହାତେଇଛନ୍ତି ପାକିସ୍ତାନୀ, ବାଲାଂଦେଶୀ, ମିଆଁମର ଓ ରୋହିଙ୍ଗ୍ୟା । ଖୁବଶୀଘ୍ର ଏମାନଙ୍କୁ ଚିହ୍ନଟ କରି ନିଆଯିବ ଆକ୍ସନ୍ । ସମସ୍ତଙ୍କର କଟିବ ରାସନକାର୍ଡ । ଓଡ଼ିଶାକୁ ଅନୁପ୍ରବେଶ କରି ରାସନକାର୍ଡ ହାତେଇଥିବା ବିଦେଶୀକୁ ଚିହ୍ନଟ କରାଯିବ । ରାଜ୍ୟ ସାରା ସର୍ଭେ ପାଇଁ ସମସ୍ତ ଜିଲ୍ଲାପାଳଙ୍କୁ ନିର୍ଦ୍ଦେଶ ଦିଆଯାଇଛି । ସେମାନଙ୍କୁ ଚିହ୍ନଟ କରି ରାସନକାର୍ଡରୁ ନାଁ କାଟିବାକୁ କୁହାଯାଇଥିବା କହିଛନ୍ତି ଖାଦ୍ୟ ଓ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ।