ଭୁବନେଶ୍ଵର: ମହିଳାଙ୍କ ଲାଗି ମୋହନ ସରକାରଙ୍କ ଫ୍ଲାଗସିପ୍ ଯୋଜନା 'ସୁଭଦ୍ରା' ପାଇବା ଲାଗି ଆବେଦନ କରିଛନ୍ତି ପୁରୁଷ । 'ସୁଭଦ୍ରା' ଯୋଜନାର ସର୍ଭେ ବେଳେ ଏଭଳି ତଥ୍ୟ ସାମ୍ନାକୁ ଆସିଛି । 'ସୁଭଦ୍ରା' ପାଇବା ଲାଗି ରାଜ୍ୟର ୧୫୭ ଜଣ ପୁରୁଷ ଆବେଦନ କରିଥିବା ଯାଞ୍ଚ ବେଳେ ଧରାପଡ଼ିଥିବା ସୂଚନା ଦେଇଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା । 

ସର୍ଭେ ସମୟରେ ୧୫୭ ଜଣ ପୁରୁଷ 'ସୁଭଦ୍ରା' ଆବେଦନ କରିଥିବା ଜଣାପଡ଼ିଛି । ଆଧାର କାର୍ଡ ଓ ବ୍ୟାଙ୍କ ବିବରଣୀ ଯାଞ୍ଚ ବେଳେ ଏହା ଜଣାପଡ଼ିଛି । ଯାଞ୍ଚ ବେଳେ ସେମାନଙ୍କୁ ବାଦ ଦିଆଯାଇଛି । ଅନେକ ସମୟରେ ପୁଅଝିଅ ନାଁ ଏକ ଥିବାରୁ ଏଭଳି ହୋଇଥିବା ସନ୍ଦେହ କରିଛନ୍ତି ଉପମୁଖ୍ୟମନ୍ତ୍ରୀ ।

ତେବେ ପ୍ରବାସୀ ଭାବେ ରାଜ୍ୟ ବାହାରେ ରହୁଥିବା ଅନେକ ଯୋଗ୍ୟ ମହିଳା ହିତାଧିକାରୀ 'ସୁଭଦ୍ରା'ରୁ ବଞ୍ଚିତ ହୋଇଥିବା କହିଛନ୍ତି ପ୍ରଭାତୀ ପରିଡ଼ା । ସେମାନେ ରାଜ୍ୟ ବହାରେ ଥିବାରୁ ଆବେଦନ କରି ପାରି ନାହାନ୍ତି । ଘରକୁ ଯାଇ ଅଙ୍ଗନବାଡ଼ି ଦିଦି ଫେରୁଛନ୍ତି । ପ୍ରବାସୀ ମହିଳା ମାନେ କିପରି 'ସୁଭଦ୍ରା' ଟଙ୍କା ପାଇବେ ସେ ନେଇ ସରକାର ପ୍ରୟାସ କରୁଛନ୍ତି ।

ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ାଙ୍କ ଅନୁସାରେ, ଗଞ୍ଜାମରେ ସର୍ବାଧିକ ପ୍ରବାସୀ ମହିଳା ଏବେ ଯାଏଁ 'ସୁଭଦ୍ରା'ରେ ଅନ୍ତର୍ଭୁକ୍ତ ହୋଇ ପାରି ନାହାନ୍ତି । ସେହିଭଳି କୋରାପୁଟ, ଅନୁଗୁଳ, ବଲାଙ୍ଗିର, ମୟୂରଭଞ୍ଜ, ସମ୍ବଲପୁର ଓ ଦେବଗଡ଼ ଜିଲ୍ଲାରେ ମଧ୍ୟ ସଂଖ୍ୟା ଅଧିକ ରହିଛି । ସେମାନେ ଯଥାଶୀଘ୍ର ଆବେଦନ କରି ଯୋଜନାର ଲାଭ ଉଠାଇବା ଦରକାର ବୋଲି କହିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।

'ସୁଭଦ୍ରା' ପାଇଁ ଏଯାବତ୍ ୧ କୋଟି ୭ ଲକ୍ଷରୁ ଅଧିକ ଆବେଦନ ହୋଇଛି । ସେଥିରୁ ୧ କୋଟି ୪ ଲକ୍ଷ ମହିଳା ଯୋଗ୍ୟ ହିତାଧିକାରୀଙ୍କୁ ୩ଟି ପର୍ଯ୍ୟାୟରେ ମିଳିଛି 'ସୁଭଦ୍ରା'ର ପ୍ରଥମ କିସ୍ତି । ଜାନୁଆରୀ ଶେଷ ସୁଦ୍ଧା 'ସୁଭଦ୍ରା' ପ୍ରଥମ କିସ୍ତିର ଚତୁର୍ଥ ପର୍ଯ୍ୟାୟ ଟଙ୍କା ମିଳିବ ବୋଲି ପୂର୍ବରୁ ସୂଚନା ଦେଇଥିଲେ ଉପମୁଖ୍ୟମନ୍ତ୍ରୀ ।