ଅର୍ଗସ ବ୍ୟୁରୋ: ଶେଷ ନିଃଶ୍ବାସ ଗଣୁଛି ମାଓବାଦ। ମାଟିରେ ଲୋଟୁଛି ଦୁର୍ଦ୍ଦଶ ନକ୍ସଲଙ୍କ ଶବ । ମାଲକାନଗିରି ସୀମାନ୍ତ ସୁକୁମା-ବିଜାପୁର ସୀମାରେ ଏନକାଉଣ୍ଟରରେ 19 ନକ୍ସଲଙ୍କ ନିପାତ ପରେ ଥରହର ହୋଇଛି ମାଓ ଶିବିର । ଗତ ୨ ଦିନ ଧରି ଦକ୍ଷିଣ ବସ୍ତର ଅନ୍ତର୍ଗତ ସୁକୁମା, ବିଜାପୁର ଓ ତେଲେଙ୍ଗାନାରେ ହୋଇଛି ବଡ଼ ଧରଣର ମାଓ ବିରୋଧୀ ଅପରେସନ । ସୁକୁମା-ବିଜାପୁର ସୀମାବର୍ତ୍ତୀ ତଲପେରୁ ଏ ତୁମରେଲ ନଦୀ ମଝିରେ ମାଓ ସୁଡ଼ଙ୍ଗ ଠାବ କରିଥିଲେ ଯବାନ । ଏଇଠି ନିର୍ମାଣ ହେଉଥିଲା ବନ୍ଧୁକ ଓ ବୋମା । ଲେଥ୍ ମେସିନ ସହ କଟିଂ ମେସିନ, ଡ୍ରିଲ୍ ମେସିନ୍ ସହ ବଣ୍ଡଲ ବଣ୍ଡଲ ବିଦ୍ୟୁତ୍ ତାର, ବନ୍ଧୁକ ତିଆରି ସାମଗ୍ରୀ, ବୋମା ତିଆରି ଲାଗି କାଚ ବୋତଲ ଜବତ କରିବା ସହ କାରଖାନାକୁ ମାଟିରେ ମିଶାଇ ଦେଇଛନ୍ତି DRG ଯବାନ ।

ଦିନେ ନକ୍ସଲଙ୍କ ଗଡ଼ କୁହାଯାଉଥିବା ବିଜାପୁର, ଦାନ୍ତେୱାଡ଼ା ଓ ନାରାୟଣପୁରରେ ନିଜ ଠିକଣା ବଞ୍ଚାଇବାକୁ ଶେଷ ସଂଘର୍ଷ କରୁଛନ୍ତି ନକ୍ସଲ। ମାଓବାଦୀକୁ ସମ୍ପୂର୍ଣ୍ଣ ନିଶ୍ଚିହ୍ନ କରିବାକୁ ଗ୍ରାଉଣ୍ଡ ଜିରୋରେ ଅପରେସନ ହୋଇଛି ଜୋରଦାର । 2026 ମାର୍ଚ୍ଚ ସୁଦ୍ଧା ଦେଶକୁ ନକ୍ସଲ ମୁକ୍ତ କରିବାକୁ ମୋଦି ସରକାରଙ୍କ ମାଷ୍ଟର ପ୍ଲାନ୍ ସଫଳ ହେବାକୁ ଯାଉଛି । ଦେଶରୁ ନକ୍ସଲବାଦର ମୂଳୋତ୍ପାଟନ ପାଇଁ ଆହ୍ବାନ ଦେଇଥିଲେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଯାହାକୁ ନେଇ ବଦଳୁଛି ସ୍ଥିତି । ଏବେ ମାଓପ୍ରବଣ ଅଞ୍ଚଳରେ ବି ଲୋକଙ୍କ ମନରୁ ଦୂର ହୋଇଛି ମାଓଭୟ । ମାଓ ବିରୋଧୀ ଅପରେସନକୁ ମାଲକାନଗିରିବାସୀ କରୁଛନ୍ତି ସ୍ବାଗତ ।

ଆଣ୍ଟି ନକ୍ସଲ ଅପରେସନକୁ ମିଳୁଛି ଗୋଟିଏ ପରେ ଗୋଟିଏ ବଡ଼ ସଫଳତା । 2014-2015 ତୁଳନାରେ ଗତ 10 ବର୍ଷରେ ନକ୍ସଲ ହିଂସା 53 ପ୍ରତିଶତ ହ୍ରାସ ପାଇଛି । ଗ୍ରାଉଣ୍ଡ ଜିରୋରେ ମାଓ ବିରୋଧୀ ରଣନୀତିକୁ ସଫଳ କରୁଥିବା ପ୍ରଶାସନିକ ଅଧିକାରୀଙ୍କୁ ଉତ୍ସାହିତ କରୁଛନ୍ତି କେନ୍ଦ୍ର ସରକାର । ସୁକମାର ପୂର୍ବତନ ଜିଲ୍ଲାପାଳ ହରିଶ ଏସଙ୍କ ସହ ଧମତରୀ ଜିଲ୍ଲାପାଳ ନମ୍ରତା ଗାନ୍ଧିଙ୍କୁ ଆସନ୍ତା ଏପ୍ରିଲ 21ରେ ମିଳିବାକୁ ଯାଉଛି ପିଏମ୍ ପୁରସ୍କାର ।