ବ୍ୟାସନଗର ପୌରାଧ୍ୟକ୍ଷାଙ୍କ ବିରୋଧରେ ଅନାସ୍ଥା ଭୋଟ । ବିଜେଡି ପୌରାଧ୍ୟକ୍ଷାଙ୍କ ବିରୋଧରେ ବିଜେଡି କାଉନସିଲର ଆଣିଛନ୍ତି ଅନାସ୍ଥା । ବ୍ୟାସନଗର ପୌରାଧ୍ୟକ୍ଷା ସଂଗୀତା ପିଙ୍ଗୁଆଙ୍କ ବିରୋଧରେ ହେବ ଅନାସ୍ଥା ଭୋଟ । ଗତ ମାର୍ଚ୍ଚ ୧୨ ତାରିଖରେ ପୌର ପରିଷଦର ମୋଟ ୨୬ ଜଣ ସଦସ୍ୟଙ୍କ ମଧ୍ୟରୁ ୨୦ ଜଣ କାଉନସିଲର ଅଧ୍ୟକ୍ଷାଙ୍କ ବିରୋଧରେ ଜିଲ୍ଲାପାଳଙ୍କ ନିକଟରେ ଅନାସ୍ଥା ପାଇଁ ଫେରାଦ ହୋଇଥିଲେ l ସେପଟେ ସୋସିଆଲ ମିଡିଆରେ ଅନାସ୍ଥାକୁ ନେଇ ମୁହଁ ଖୋଲିଛନ୍ତି ପୌରାଧ୍ୟକ୍ଷା ସଂଗୀତା ପିଙ୍ଗୁଆ l କିଛି ନ୍ୟସ୍ତ ସ୍ବାର୍ଥ ବ୍ୟକ୍ତି ତାଙ୍କ ବିରୋଧରେ ଏକ ସୁପରିକଳ୍ପିତ ଷଡଯନ୍ତ୍ର ରଚିଥିବା ଅଭିଯୋଗ କରିଛନ୍ତି l

ଏଥିରେ କେବଳ ପାରିଷଦମାନଙ୍କୁ ମୋହରା କରାଯାଇଛି l ବିଜେଡି ସୁପ୍ରିମୋ ତାଙ୍କୁ ଅନୁସୂଚିତ ଜନଜାତି ସଂରକ୍ଷଣ ଆସନରେ ପ୍ରାର୍ଥୀ ଭାବରେ ଚୟନ କରିଥିଲେ l ଏବେ କୋରେଇ ନିର୍ବାଚନ ମଣ୍ଡଳୀ ଏକାଧିକ ନେତୃତ୍ୱ ଦ୍ଵାରା ପରିଚାଳିତ ହେତୁ ଏଭଳି ଅସ୍ଥିରତା ପରିସ୍ଥିତି ସୃଷ୍ଟି ହୋଇଛି ବୋଲି କହିଛନ୍ତି ଅଧ୍ୟକ୍ଷା l ସହରର ସ୍ବାର୍ଥ ଦୃଷ୍ଟିରୁ ପ୍ରଭାବିତ ନହୋଇ ପରିଷଦମାନେ ଅନାସ୍ଥା ଭୋଟରେ ଅଧ୍ୟକ୍ଷାଙ୍କୁ ସମର୍ଥନ ଦେବାକୁ ସେ ସୋସିଆଲ ମିଡିଆରେ ନିବେଦନ କରିଛନ୍ତି l