ରାତି ପାହିଲେ ପାଣି ପାଇଁ ସଂଘର୍ଷ । ଗାଁକୁ ନାଁ ରାସ୍ତା, ମିଳୁନି ମୌଳିକୁ ସୁବିଧା । କଳାହାଣ୍ଡି ଜୁନାଗଡ଼ ଦେଦର ପଞ୍ଚାୟତରେ ଦୁର୍ଗମ ଜଙ୍ଗଲ ପାହାଡ଼ ଭିତରେ ରହିଛି ହରଡାଗୁଡା ଗାଁ । ୨୫ ବର୍ଷର ଜନବସତି ପାଇ ନାହାନ୍ତି ରାଜସ୍ୱ ଗ୍ରାମର ମାନ୍ୟତା । ୨୦୦୦ ମସିହାରୁ ୨୨ଟି ଆଦିବାସୀ ପରିବାର ଏଠାରେ ଜନବସତି କରି ରହିଆସୁଛନ୍ତି । ରାଜସ୍ୱ ଗ୍ରାମର ମାନ୍ୟତା ପାଇନ ଥିବା ଯୋଗୁଁ ସରକାରଙ୍କ ମୌଳିକ ଅଧିକାରରୁ ବଞ୍ଚିତ ହୋଇଛନ୍ତି ଗ୍ରାମବାସୀ । ଗାଁରେ ପାଣି ପାଇଁ ହାହାକାର ପରିସ୍ଥିତି । ଗାଁରେ ୩ଟି ନଳକୂପ ଥିବା ବେଳେ ୨ଟି ନଳକୂପ ହିଁ ଖରାପ । ଫଳରେ ଶଗଡା ନଦୀର ଚୁଆପାଣି ଭରଷାରେ ପୁରା ଗାଁ ।

ଅଭିଶପ୍ତ ଜୀଵନ ଯାପନ କରୁଛନ୍ତି ନିରିହ ଆଦିବାସୀ ପରିବାର । ଗ୍ରାମବାସୀ ୨୦ କିଲୋମିଟର ଜଙ୍ଗଲୀ ପାଦଚଲା ରାସ୍ତାରେ ଦେଦର ପଞ୍ଚାୟତକୁ ଯାଇ ଚାଉଳ କିମ୍ବା ଭତ୍ତା ଆଣିଥାନ୍ତି । ଗାଁରେ ବିଜୁଳି ଆଲୁଅ ସାତ ସପନ । କିଛି ଲୋକଙ୍କୁ ସୋଲାର ଲାଇଟ ଦିଆ ଯାଇଥିଲା ବେଳେ ମାସେ ନ ପୁରୁଣୁ ତାହା ଖରାପ ହୋଇଯାଇଛି । ଗାଁକୁ ରାସ୍ତା ନ ଥିବା ବେଳେ ଆସିପାରୁନି ଆମ୍ବୁଲାନ୍ସ । ପ୍ରାୟ ୩ କିଲୋମିଟର ଜଙ୍ଗଲୀ ପାଦଚଲା ରାସ୍ତାରେ ରୋଗୀ କିମ୍ବା ଗର୍ଭବତୀଙ୍କୁ ଖାଟିଆରେ ବୋହି ଆଣିବାକୁ ପଡିଥାଏ । ଦିନରେ ସୂର୍ଯ୍ୟ ଏବଂ ରାତିରେ ତାରା ହିଁ ଗ୍ରାମବାସୀଙ୍କ ଭରଷା ।

ରାଜସ୍ୱ ଗ୍ରାମ ପାଇଁ ପୂର୍ବ ବିଜେଡି ସରକାରଙ୍କୁ ଗ୍ରାମବାସୀ ଅନେକଥର ଗୁହାରୀ କରିଛନ୍ତି । ହେଲେ ଆଦିବାସୀଙ୍କ ଗୁହାରୀକୁ ବିଜେଡି ସରକାର ଅଣଦେଖା କରିଥିବା ଅଭିଯୋଗ ହୁଏ । ବର୍ତ୍ତମାନ ରାଜ୍ୟରେ ବିଜେପି ସରକାର ଆସିଛି । ମୋହନ ସରକାରଙ୍କ ଉପରେ ଭରଷା କରିଛନ୍ତି ଅଞ୍ଚଳବାସୀ । କେବେ ମିଳୁଛି ହରଡାଗୁଡାକୁ ରାଜସ୍ୱ ଗ୍ରାମର ମାନ୍ୟତା ତାହା ଦେଖିବାକୁ ବାକି ।

Argus News | argus news | -Argusnews Home: Odisha Latest News, Breaking News, Trending News, Live TV and more