ପୁରୀ: ପୁରୀ ଶ୍ରୀମନ୍ଦିର ପ୍ରଶାସନ କାର୍ଯ୍ୟଳାୟ ଥଇଥାନ କେନ୍ଦ୍ର ପାଲଟିଥିବା ପ୍ରସଙ୍ଗକୁ ନେଇ ବାରମ୍ବାର ଖବର ପ୍ରସାରଣ ପରେ ଆକ୍ସନ ମୋଡ୍ ରେ ଶ୍ରୀମନ୍ଦିର ପ୍ରଶାସନ । ଶ୍ରୀମନ୍ଦିରରେ ଥଇଥାନ ହୋଇଥିବା 32 ଜଣ ଅବସରପ୍ରାପ୍ତ ଅଧିକାରୀ ଓ କର୍ମଚାରୀଙ୍କୁ କାର୍ଯ୍ୟରୁ ବିଦା କରିଛି ଶ୍ରୀମନ୍ଦିର ପ୍ରଶାସନ । ଏନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସୂଚନା ଦେଇଛନ୍ତି।

ଯେଉଁଥିରେ ରହିଛନ୍ତି ରାଜସ୍ୱ ବିଭାଗର ସର୍ବାଧିକ ଅଧିକାରୀ ଓ କର୍ମଚାରୀ । ଶ୍ରୀମମନ୍ଦିରରେ ଅବସରପ୍ରାପ୍ତ ଅଧିକାରୀଙ୍କୁ ଥଇଥାନ କରାଯାଉଥିବା ନେଇ ବାରମ୍ବାର ଅଭିଯୋଗ ହୋଇଆସୁଥିଲା । ସରକାରୀ ଚାକିରି ସର୍ତ୍ତାବଳୀର ଉଲ୍ଲଂଘନ କରି 70 ବର୍ଷ ପରେ ବି ଏମାନଙ୍କୁ ଚାକିରିରେ ରଖାଯାଇଥିଲା ଓ ବର୍ଷ ବର୍ଷ ଧରି ଏମାନଙ୍କ ଚାକିରି ଅବଧି ବି ବଢାଇ ଦିଆଯାଇଥିଲା । 

32 ଜଣଙ୍କୁ କାର୍ଯ୍ୟରୁ ଅବସର ଦିଆଯାଇଥିବା ବେଳେ ସେଥିରେ ଶ୍ରୀମନ୍ଦିର କାର୍ଯ୍ୟାଳୟର 12ରୁ ଅଧିକ ଅଧିକାରୀ ଓ କର୍ମଚାରୀ ରହିଛନ୍ତି । ବାକି ବିଭିନ୍ନ ଜିଲ୍ଲାର ଅମିନ ଓ ସମନ୍ୱୟ ଅଧିକାରୀ ରହିଛନ୍ତି । ଅବସରପ୍ରାପ୍ତଙ୍କ ଭିତରେ ଶ୍ରୀମନ୍ଦିର ଉନ୍ନୟନ ବିଭାଗ ଅଜୟ କୁମାର ଜେନା, ରାଜସ୍ୱ ବିଭାଗ ଭୂମି ଅଧିକାରୀ ଲକ୍ଷ୍ମଣ କୁମାର ସ୍ୱାଇଁ ପ୍ରମୁଖ ରହିଛନ୍ତି । 

ପୂର୍ବ ସରକାରରେ ବାରମ୍ବାର ପୁନଃ ନିଯୁକ୍ତି ହେବା ଫଳରେ ଶ୍ରୀମନ୍ଦିର କାର୍ଯ୍ୟାଳୟରେ ନିଯୁକ୍ତି ସୁଯୋଗ ମଧ୍ୟ ଠପ୍‌ ହୋଇଯାଇଥିଲା । ଏବେ ଭାଜପା ସରକାର ଏ ନିଯୁକ୍ତି ପ୍ରକ୍ରିୟାରେ ପୂର୍ଣ୍ଣଚ୍ଛେଦ ଟାଣିଛନ୍ତି ବୋଲି କହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ । ଗତ ୧୦ ବର୍ଷରେ ଅନେକ ଅଧିକାରୀ ଅବସର ନେବା ପରେ ଓଏସଡି ଭାବେ ମିଳିଥିଲା ପୁନଃ ନିଯୁକ୍ତି । ଏବେ ଖାଲି ହେବାକୁ ଥିବା ପଦବୀକୁ ଓଡ଼ିଶା ସବୋର୍ଡିନେଟ ଷ୍ଟାଫ କମିଶନ ଜରିଆରେ ପୂରା କରିବାକୁ ସରକାରଙ୍କୁ ସୁପାରିସ ହୋଇଛି । 

ପୂର୍ବରୁ ଯେଉଁ ଶ୍ରୀମନ୍ଦିର ମୁଖ୍ୟ ପ୍ରଶାସନ ଆସୁଥିଲେ, ସେମାନେ ଏମାନଙ୍କ କାର୍ଯ୍ୟକାଳ ବୃଦ୍ଧି କରିଚାଲିଥିଲେ । ତେବେ ଡ. ଅରବିନ୍ଦ ପାଢୀ ମୁଖ୍ୟ ପ୍ରଶାସକ ଭାବରେ ଦାୟିତ୍ୱ ନେବା ପରେ ଏହି କଡା ପଦକ୍ଷେପ ନେଇଛନ୍ତି । ସେପଟେ ଆହୁରି ବି ଅନେକ ଅବସରପ୍ରାପ୍ତ ଶ୍ରୀମନ୍ଦିରରେ କାର୍ଯ୍ୟାଳୟରେ ଚାକିରି କରିଛନ୍ତି । ଅବସର ପରେ ମଧ୍ୟ ଶ୍ରୀମନ୍ଦିର କାର୍ଯ୍ୟାଳୟରେ ନିଯୁକ୍ତି ପାଇ ବହୁ ବର୍ଷ ହେବ କାର୍ଯ୍ୟ କରି ଆସୁଛନ୍ତି ଅଧିକାରୀମାନେ ।