ଖଳାରେ ନିଆଁଲାଗି ଜଳିଗଲା ୧୦ ଲକ୍ଷ ଟଙ୍କାର ଧାନ

ଆଳି : ଜଳିଗଲା ୫୦ ଏକର ଧାନ । ଧାନରେ ନିଆଁ ଲାଗିଥିବା ଦେଖି ବେହୋସ ହେଲେ ଚାଷୀ । ଏପରି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡା ଜିଲ୍ଲା ଆଳି ବ୍ଲକ ମେଣ୍ଢପୁର ପଞ୍ଚାୟତ ପଦନପୁର ମିଲତନଗର ଗାଁରେ । ପ୍ରାୟ ୧୦ ଲକ୍ଷ ଟଙ୍କାର ଧାନ ଖଳାରେ ଜଳିଯାଇଛି । ଗାଁରେ ପ୍ରାୟ ୮ ଜଣ ଚାଷୀ ଧାନ ଅମଳ କରି ୧୫ ରୁ ଉର୍ଦ୍ଧ୍ବ ଧାନ ଗଦା କରି ଖଳାରେ ରଖିଥିବା ବେଳେ ଆଜି ଦିନ ପ୍ରାୟ ୨ ଟା ସମୟରେ ହଠାତ ଖଳାରେ ନିଆଁ ଲାଗି ଯାଇଥିଲା l ଗୋଟିଏ ପରେ ଗୋଟିଏ ଧାନ ଗଦାରେ ନିଆଁ ଲାଗି ଯାଇଥିଲାl ପ୍ରାୟ ୧୫ ରୁ ଉର୍ଦ୍ଧ୍ବ ଧାନ ଗଦା ଏହି ନିଆଁରେ ଜଳି ପାଉଁଶ ହୋଇଯାଇଛି l

ଅଗ୍ନିଶମ ବାହିନୀ ପହଞ୍ଚି ପ୍ରାୟ ତିନି ଘଣ୍ଟା ପରେ ନିଆଁକୁ ଆୟତ କରିଥିଲେ l ଖବର ପାଇ ଘଟଣା ସ୍ଥଳରେ ଆଳି ତହସିଲଦାର ପହଞ୍ଚି ଥିଲେ l କ୍ଷତିଗ୍ରସ୍ତ ଚାଷୀ ମାନେ ଫସଲ ଅମଳ କରି ଘରକୁ ନେବା ପୂର୍ବରୁ ନିଆଁରେ ଜଳି ଯାଇଥିବା ଫସଲକୁ ଦେଖି ଚେତା ହରାଇ ବସିବା ସହ କାନ୍ଦିକାନ୍ଦି ଭୂଇଁରେ ଗଡି ପଡୁଥିବା ଦୃଶ୍ୟ ଦେଖିବାକୁ ମିଳିଥିଲା l କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି l