ଆଜିଠାରୁ ଆରମ୍ଭ ହୋଇଛି ମହାପ୍ରଭୁଙ୍କ ରଥଯାତ୍ରା ପାଇଁ ରଥ କାଠ ଚିରଟ ପକ୍ରିୟା । ପବିତ୍ର ରାମନବମୀ ଅବସରରେ ଆଜି ଠାରୁ ଅନୁକୂଳ ହୋଇଥାଏ ରଥକାଠ ଚିରଟ । ଅନୁକୂଳ ପୂର୍ବରୁ ଝାଞ୍ଜ ସଂକୀର୍ତ୍ତନ ଆଧ୍ୟାତ୍ମିକ ପରିବେଶ ଭିତରେ ପହଞ୍ଚିଥିଲା ମହାପ୍ରଭୁଙ୍କ ଅଜ୍ଞା ମାଳ ।

ରଥ ନିର୍ମାଣ ପାଇଁ ଖପୁରିଆଠାରେ ଥିବା ସରକାରୀ କରତ କଳରେ କାଠଚିରା କାମ ଆରମ୍ଭ ହୋଇଛି । ପ୍ରଥମ ପର୍ଯ୍ୟାୟରେ 12 ଫୁଟ ଲମ୍ବ ଥିବା ତିନୋଟି ଧଉରା କାଠକୁ ନୀତିକାନ୍ତି ଅନୁଯାୟୀ ପୂଜାର୍ଚ୍ଚନା କରା ଯାଇ ମେସିନ ସାହାଯ୍ୟରେ ଚିରଟ ହୋଇଥିଲା । ଏହି ସମସ୍ତ କାଠ ନୟାଗଡ ବନଖଣ୍ଡରୁ ଆସିଛି ଏବଂ ବଳକା କାଠ ପରେ ଅନ୍ୟାନ ବନଖଣ୍ଡରୁ ଆସିବ । ଏବଂ ପର୍ଯ୍ୟାୟ ଅନୁସାରେ ଏଠାକୁ କାଠ ଆସିବ ଏବଂ ରଥ ନିର୍ମାଣ ସମସ୍ତ କାଠ ଚିରଟ କରାଯିବ ବୋଲି କହିଛନ୍ତି ମିଲ ପରିଚାଳକ ।

ତେବେ ରଥ ନିର୍ମାଣ ପାଇଁ ମୋଟ 818 ଖଣ୍ଡ କାଠ ଆବଶ୍ୟକ ଥିବାବେଳେ ଏବେ ସୁଦ୍ଧା 500 ଖଣ୍ଡ କାଠ ସରକାରୀ ସ ମିଲ ରେ ପହଞ୍ଚି ସାରିଛି । ବଳକା କାଠ ଧୀରେ ଧୀରେ ବିଭିନ୍ନ ବନ ଖଣ୍ଡରୁ ଆସି ପହଞ୍ଚିବ । ତା' ପରେ ପର୍ଯ୍ୟାୟ କ୍ରମେ ଚିରଟ କରି ପୁରୀ ପଠାଯିବ । କାଠ ମଧ୍ୟରେ ଫାଶି, ଶିମିଳି, ଅଶନ, ଧଉରା ଆଦି କାଠ ସାମିଲ ରହିଛି ।

ଆଜି ପ୍ରଥମ ପର୍ଯ୍ୟାୟରେ ତିନି ଖଣ୍ଡ ଧଉରା କାଠରୁ ରଥ ଅଖରେ ଲାଗୁଥିବା ଅର ପାଇଁ ଚିରଟ କରାଯାଇଛି । ରଥ କାଠ ଅନୁକୂଳ ସମୟରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ,ମହାରଣା ସେବାୟତ ମନ୍ଦିର ପ୍ରଶାସନିକ ଅଧିକାରୀ ଉପସ୍ଥିତ ଥିଲେ ।

ଜୁନ 27 ତାରିଖରେ ମହାପ୍ରଭୂଙ୍କର ବିଶ୍ୱ ପ୍ରସିଦ୍ଧ ରଥଯାତ୍ରା ଥିବାବେଳେ ଆଜିଠାରୁ ଆରମ୍ଭ ହୋଇଛି ରଥ ନିର୍ମାଣ ପାଇଁ କାଠ ଚିରଟ ପକ୍ରିୟା । ବିଧି ଓ ପାରମ୍ପରା ଅନୁସାରେ ଅକ୍ଷୟ ତୃତୀୟାଠାରୁ ପୁରୀରେ ଆରମ୍ଭ ହେବ ଚତୁର୍ଦ୍ଧାମୂର୍ତ୍ତିଙ୍କ ରଥ ନିର୍ମାଣ କାର୍ଯ୍ୟ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV