SI ଚାକିରି କେଳେଙ୍କାରୀର ମାଷ୍ଟରମାଇଣ୍ଡ ଶଙ୍କର ପୃଷ୍ଟିର ବଡ଼ ଖୁଲାସା । ଭୁବନେଶ୍ୱରରେ ପହଞ୍ଚିବା ପରେ ଦେଇଛି ଚାଞ୍ଚଲ୍ୟକର ବୟାନ । କହିଲା ବିଜେଡି ସରକାର ସମୟରେ ହୋଇଥିଲା ବଡ଼ ଷଡ୍‌ଯନ୍ତ୍ର । ବିଜେଡି ଶାସନରେ ହୋଇଥିଲା ୧୦୦୦ କୋଟିର ଡିଲ । ଖାଲି ସେତିକି ନୁହେଁ, ଶଙ୍କର ନିଜକୁ ନିର୍ଦ୍ଦୋଷ ବୋଲି କହିବା ସହ ଆହୁରି କହିଛି, 'ମୁଁ ଲୁଚିନଥିଲି, ଆଇନଗତ ଭାବେ ଲଢ଼ୁଥିଲି । ଆଗୁଆ ବେଲ ପାଇଁ ହାଇକୋର୍ଟରେ ଫାଇଲ୍ କରାଯାଇଥିଲା, ସୁପ୍ରିମକୋର୍ଟରେ ବି ଫାଇଲ୍ କରିଥିଲି । ଗୋଟିଏ ମାସ ସମୟ ଦେଇଥିଲେ ମୁଁ ନିଜେ ସରେଣ୍ଡର କରିଥାନ୍ତି । ମୋ ପତ୍ନୀଙ୍କ ନାଁରେ କୌଣସି କେସ୍‌ ନାହିଁ । ଗିରଫ ହୋଇଥିବା ଆଶୟୀଙ୍କ ସହ ମୋର କିଛି ଯୋଗାଯୋଗ ନାହିଁ' ।

ଶଙ୍କର ପୃଷ୍ଟିର ଏଭଳି ବୟାନ ପରେ, ଏବେ ପ୍ରଶ୍ନ ଉଠୁଛି ବିଜେଡି ଶାସନରେ କିଏ କରିଥିଲା ହଜାରେ କୋଟିର ଡିଲ୍ ? ଏସଆଇ ପରୀକ୍ଷା କେଳେଙ୍କାରୀ ପଛରେ ବଡ଼ ବିଜେଡି ଲିଙ୍କ୍ ଥିବା ସନ୍ଦେହ । ଏବେ ସମସ୍ତଙ୍କ ନଜର, କି ପଦକ୍ଷେପ ନେବେ ସରକାର ? କ'ଣ କରିବ କ୍ରାଇମବ୍ରାଞ୍ଚ ?

ଗତକାଲି ନେପାଳ ସୀମା ଉତ୍ତରାଖଣ୍ଡ ଅଞ୍ଚଳରୁ ଶଙ୍କରକୁ ଗିରଫ କରିଥିଲା କ୍ରାଇମବ୍ରାଞ୍ଚର ସ୍ବତନ୍ତ୍ର ଟିମ୍ । ଘଟଣା ସାମ୍ନାକୁ ଆସିବା ପରଠାରୁ ଆତ୍ମଗୋପନ କରିଥିଲା ଶଙ୍କର ପୃଷ୍ଟି । ଶଙ୍କର ପୃଷ୍ଟି ସହ ତା'ର ସ୍ତ୍ରୀ ଦୀପ୍ତିମୟୀଙ୍କୁ ବି ଗିରଫ କରିଛି କ୍ରାଇମବ୍ରାଞ୍ଚ । ପୋଲିସ SI ପରୀକ୍ଷା ଘୋଟାଲାର ମାଷ୍ଟରମାଇଣ୍ଡ ହେଉଛି ଶଙ୍କର ପୃଷ୍ଟି । ତାର କଳା କାରନାମାର ପର୍ଦ୍ଦାଫାସ୍ କରିଥିଲା ଅର୍ଗସ । ପରୀକ୍ଷାର୍ଥୀଙ୍କ ଟଙ୍କାରେ ଅୟସ କରୁଥିଲା ଶଙ୍କର ପୃଷ୍ଟି । ବିଭିନ୍ନ ଜାଗାରେ ସେ କିଣିଛି ଦାମୀ ଜମି, ଅର୍ଗସ ହାତରେ ଲାଗିଥିଲା ଏକ୍ସକ୍ଲୁସିଭ୍ ଦସ୍ତାବିଜ୍।

ଦିନ ମଜୁରିଆଙ୍କ ପୁଅ କେମିତି ଶହେ କୋଟିର ମାଲିକ ହେଲା ? ଗାଁରେ ଟାଉଟରୀ କରୁଥିବା ଶଙ୍କର କେମିତି ବନିଗଲା ପ୍ରଶ୍ନପତ୍ର କେଳେଙ୍କାରୀର ସର୍ଦ୍ଦାର। ପଞ୍ଚସଫ୍ଟ ସିଲିକନ୍ ନେକ୍ସସର ବଡ଼ ପ୍ରମାଣ ଅର୍ଗସରେ ହାତରେ ଲାଗିଥିଲା । ଏସଆଇ ନିଯୁକ୍ତି କେଳେଙ୍କାରୀରେ କ୍ରାଇମବ୍ରାଞ୍ଚ ୧୨୩ ଜଣଙ୍କୁ ଗିରଫ କରିଥିଲା । ମାସକ ପରେ ଗତ ୩୦ ତାରିଖରେ ଜାମିନରେ ଜେଲରୁ ବାହାରିଥିଲେ ୧୧୪ ଜଣ ପରୀକ୍ଷାର୍ଥୀ । ତେବେ ଶଙ୍କରର ସହଯୋଗୀ ମୁନା ମହାନ୍ତି ସହ ୯ ଦଲାଲ ଜେଲରେ ଅଛନ୍ତି ।

ସେପ୍ଟେମ୍ବର ୨୯ ତାରିଖରେ ଭୁବନେଶ୍ୱରରୁ ଶ୍ରୀକାକୁଲମ ଅଭିମୁଖେ ଯାଉଥିବା ତିନିଟି ବସକୁ ଅଟକାଇ ଏସଆର ପରୀକ୍ଷାର ଆଶାୟୀଙ୍କୁ ଧରି କେଳେଙ୍କୀରୀର ଗୁମର ଖୋଲିଥିଲା ପୋଲିସ। ଅକ୍ଟୋବର ୧ରେ ଏମାନେ ଗିରଫ ହୋଇ କୋର୍ଟ ଫରୱାର୍ଡ ହୋଇଥିଲେ । ପ୍ରଥମେ ତଦନ୍ତ ଭାର କ୍ରାଇମବ୍ରାଞ୍ଚକୁ ଦେଇଥିଲେ ସରକାର । ପରେ ମାମଲାର ତଦନ୍ତ ଭାର ସିବିଆଇକୁ ଦିଆଯିବାକୁ ନିଷ୍ପତ୍ତି ହୋଇଛି ।

ଏବେ ମାଷ୍ଟରମାଇଣ୍ଡ ଶଙ୍କର ପୃଷ୍ଟି ଗିରଫ ହୋଇଥିବାବେଳେ ଶ୍ରୀକାକୁଲମ ମଡ୍ୟୁଲର ମୁଖ୍ୟ ଅଭିଯୁକ୍ତ ମୁନା ମହାନ୍ତି, ଦୀଘା ମଡ୍ୟୁଲ ଅଭିଯୁକ୍ତି ଅରବିନ୍ଦ ଦାସ, ମୁନା ମହାନ୍ତିଙ୍କୁ ନିଜ ଫାର୍ମହାଉସରେ ଆଶ୍ରୟ ଦେଇଥିବା ବିଜେଡି ନେତା ଅଭିମନ୍ୟୁ ଦୋରା । ଶ୍ରୀକାନ୍ତ ମହାରଣା, ବିଶ୍ବରଂଜନ ବେହେରା, ପ୍ରିୟଦର୍ଶନୀ ସାମଲ ପ୍ରମୁଖ ଜେଲରେ ଅଛନ୍ତି ।