ଅର୍ଗସ ବ୍ୟୁରୋ: ଝାଡ଼ଖଣ୍ଡରେ ଚାଇବସା ସ୍ଥିତ କୋଲହାନ ବିଶ୍ବବିଦ୍ୟାଳୟରେ ଓଡ଼ିଆ ସ୍ନାତକୋତ୍ତର ବିଭାଗର ବିଦ୍ୟାର୍ଥୀଙ୍କୁ ଧମକ ଦେଇ ଫେଲ୍ କରାଯାଇଥିବା ଅଭିଯୋଗ । ପ୍ରଥମ ସେମିଷ୍ଟାରରେ ୩୫ ଜଣ ପିଲାଙ୍କ ମଧ୍ୟରୁ ୨୧ ଜଣ ପିଲାଙ୍କୁ ଜାଣିଶୁଣି ଫେଲ୍ କରାଯାଇଛି । ପ୍ରତ୍ୟେକ ସେମିଷ୍ଟାରରେ ଛାତ୍ରଛାତ୍ରୀ ଫେଲ୍ ପାଇଁ ଓଡ଼ିଆ ବିଭାଗର ପ୍ରଫେସରମାନେ ଧମକ ଦେଉଥିବା ଅଭିଯୋଗ ହୋଇଛି ।

ବିଚ୍ଛିନ୍ନାଞ୍ଚଳ ଭଳି ସ୍ଥାନରେ ଓଡ଼ିଆ ଭାଷାକୁ ବଞ୍ଚାଇବା ପରିବର୍ତ୍ତେ ବିଲୋପ କରିଦେବା ପାଇଁ ଓଡ଼ିଆ ବିଭାଗର ପ୍ରଫେସରମାନେ ଶତ ପ୍ରତିଶତ ଚେଷ୍ଟା କରୁଛନ୍ତି ବୋଲି ପୂର୍ବତନ ଛାତ୍ରଛାତ୍ରୀ ଅଭିଯୋଗ ଆଣିଛନ୍ତି । ଏନେଇ ଓଡ଼ିଶାର ରାଜ୍ୟପାଳ, ମୁଖ୍ୟମନ୍ତ୍ରୀଙ୍କ ସହ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ହସ୍ତକ୍ଷେପ କରିବା ପାଇଁ ଅନୁରୋଧ କରିଛନ୍ତି ଛାତ୍ରଛାତ୍ରୀ । ସେପଟେ ଘଟଣାକୁ ସମ୍ପୂର୍ଣ୍ଣ ଭିତ୍ତିହୀନ କହିଛନ୍ତି କୋହ୍ଲାନ ବିଶ୍ବବିଦ୍ୟାଳୟର ଓଡ଼ିଆ ବିଭାଗର ମୁଖ୍ୟ ଡକ୍ଟର ମନୋଜ ମହାପାତ୍ର ।

ତେବେ ପ୍ରଶ୍ନ ଉଠୁଛି ରାଜ୍ୟ ସରକାର କରୁଛନ୍ତି କ’ଣ ? କାହିଁକି ଆଖି ବନ୍ଦ କରିଛନ୍ତି ରାଜ୍ୟ ସରକାର ? ଓଡ଼ିଆ ପିଲାଙ୍କ ଭବିଷ୍ୟତ ସହ କାହିଁକି ଖେଳୁଛନ୍ତି ? ଆଞ୍ଚଳିକ ଦଳ ଭାବେ ଓଡ଼ିଆ ଭାଷା ଓ ସଂସ୍କୃତି ପ୍ରତି ନାହିଁ ଦରଦ । ପୂର୍ବରୁ ମଧ୍ୟ ଓଡ଼ିଶା ସରକାରଙ୍କ ଆର୍ଥିକ ଅନୁଦାନରେ ନିଯୁକ୍ତ ଓଡିଆ ଶିକ୍ଷକଙ୍କୁ ଷଡ଼େଇକଳା ଓ ଖରସୁଆଁରେ ଦରମା ମିଳୁ ନ ଥିବା ନେଇ ଖବର ପ୍ରସାରଣ କରିଥିଲା ଅର୍ଗସ । ଦୀର୍ଘ ୨୨ ମାସ ଧରି ବିଚ୍ଛିନାଞ୍ଚଳରେ ଭୋକିଲା ଶିକ୍ଷକଙ୍କ ପଟେରେ ଓଦାକନା ନେଇ ଖବର ବାଜିବା ପରେ ବର୍ଷକର ଦରମା ମିଳିଥିଲା । ହେଲେ ସେବେଠୁ ପୁଣି ଦରମା ବନ୍ଦ ।

ଗୋଟିଏ ପଟେ ରାଜ୍ୟ ସରକାରଙ୍କ ଲୋକ ଦେଖାଣିଆ ଭାଷା ପ୍ରୀତି ଅନ୍ୟପଟେ ସୀମା ଆରପଟେ ସଙ୍କଟରେ ଓଡ଼ିଆ ଭାଷା ଓ ସଂସ୍କୃତି । ଏପଟେ ଓଡ଼ିଆ ବିଶ୍ବବିଦ୍ୟାଳୟ ପ୍ରତିଷ୍ଠା ପ୍ରସ୍ତୁତି ଓ ବିଶ୍ବସ୍ତରୀୟ ଆନ୍ତର୍ଜାତୀୟ ଓଡ଼ିଆ ସମ୍ମିଳନୀ ହେବାକୁ ଆୟୋଜନ ହେଉଛି । ଅନ୍ୟପଟେ ପଡୋଶୀ ରାଜ୍ୟ ଝାଡ଼ଖଣ୍ଡରେ ଓଡ଼ିଆ ପିଲାଙ୍କ ଭବିଷ୍ୟତ ସହ ଖେଳ ଖେଳାଯାଉଛି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV