ଏଇତ ଆସିବୁ ବୋଲି ଘରକୁ କହୁଥିଲୁ । ମତେ ଫୋନ କଲୁ ବୋଲି ମୁଁ ତରତର ହୋଇ ବାହାରି ପଡିଲି ତତେ ଆଣିବା ପାଇଁ । କିନ୍ତୁ ମୁଁ ଆସିବା ଭିତରେ ତୁ କୁଆଡେ ଚାଲିଗଲୁ ମାମୁନି । କାହାକୁ କିଛି ନଜଣେଇ ତୁ ଆମକୁ ଛାଡି ଏମିତି କାହିଁକି ଚାଲିଗଲୁ । କେଉଁଥିରେ ଅଭାବ ଥିଲା ତୋର । ମତେ କହିଥାନ୍ତୁ, ବାପାଙ୍କୁ କହିଥାନ୍ତୁ, ସବୁ ବୁଝିଥାଆନ୍ତି । ହେଲେ ଆଉ ବିଶ୍ଵାସ ହେଉନି ଯେ ତୁ ଚାଲିଗଲୁ ବୋଲି । ତୋ ଭାଇ ଡାକୁଛି ତତେ ... ଫେରିଆ

କେନ୍ଦ୍ରାପଡ଼ା ଜିଲ୍ଲା ଆଳି ଥାନା ଗୋବିନ୍ଦପୁରସ୍ଥିତ କେନ୍ଦ୍ରାପଡ଼ା ଓ ଯାଜପୁର ଜିଲ୍ଲାକୁ ସଂଯୋଗ କରୁଥିବା ଗୋବିନ୍ଦପୁର-ସିଙ୍ଘପୁର ସେତୁ ଉପରୁ ଜଣେ ଯୁବତୀ ଭରା ନଦୀକୁ ଡେଇଁ ପଡିଛନ୍ତି । ଗୋବିନ୍ଦପୁର ପଞ୍ଚାୟତର ମିଶ୍ରସାହିର ସୁଧାଂଶୁ ଶେଖର ମିଶ୍ରଙ୍କ ଝିଅ ମଧୁସ୍ମିତା ଓରଫ ମାମୁନି ।

ସବୁଦିନ ଭଳି ସେଦିନ ବି ସକାଳ ୭ଟାରେ ଜଳଖିଆ ଖାଇ କମ୍ପ୍ୟୁଟର କ୍ଲାସକୁ ବାହାରି ପଡିଥିଲା ମାମୁନି ସାଇକେଲଟିଏ ଧରି । ଆଉ ସରିବା ପରେ ଭାଇକୁ ଫୋନ କରି କୁହେ, ଭାଇ ମୋର ସାଇକେଲଟା ନାହିଁ, ଟିକେ ଆସିବୁ ମତେ ଟିକେ ଗାଡିରେ ନେଇଯିବୁ । ଭାଇ ବାହାରିପ଼ଡେ ମାମୁନିକୁ ଆଣିବା ପାଇଁ । ଆଉ ଆସିବା ପରେ ଦେଖେ କିଛି ଏମିତି ଘଟଣା । ଭାଇ ପହଞ୍ଚିବା ପୂର୍ବରୁ ହିଁ ମାମୁନି ସାଇକେଲରେ ଆସି , ସାଇକେଲଟିକୁ ବ୍ରିଜ ଉପରେ ଥୋଇଦେଇ, ଖରସ୍ରୋତା ନଦୀର ଗଭୀରକୁ ଡେଇଁ ପଡିଥିଲେ । ଆଉ ମାତ୍ର କିଛି ସମୟ ମଧ୍ୟରେ ହିଁ ନଦୀର ପ୍ରବଳ ସ୍ରୋତ ଯୋଗୁଁ ବୋହୁଦୂରକୁ ଭାସିଗଲେ । ଯାହା ନିଜେ ପ୍ରତ୍ୟେକ୍ଷଦର୍ଶୀ ଦେଖିଥିବା କହିଛନ୍ତି ।

ଏଯାଏଁ ଗୋଟେ ଝିଅର ଆତ୍ମାହୂତି ଦେବାକୁ ସହଜରେ ଗ୍ରହଣ କରି ହେଉନାହିଁ । ନ୍ୟାୟ ପାଇବା ପାଇଁ ଲଢେଇ କରି ଶେଷରେ ନିଜେ ଜୀବନ ଦେଇ ଦେଇଥିଲେ ବାଲେଶ୍ଵର ପୀଡିତା । ପୁଣି ଆଉ ଏକ ଖବର ଯାହା ଆଉ ଏକ ପରିବାରକୁ ସ୍ବଧ କରିଦେଇଛି । ଘଟଣାର ପ୍ରକୃତ କାରଣ ଏବେଯାଏଁ ଜଣା ପଡିନାହିଁ । ହେଲେ ସବୁବେଳେ ଚୁପଚାପ ରହୁଥିବା ଝିଅଟାର ହଠାତ ଏପରି ନିଷ୍ପତ୍ତିକୁ କେହି ସହଜରେ ଗ୍ରହଣ କରିପାରୁନାହାନ୍ତି । ଘଟଣାରେ ଏକପ୍ରକାର ଗମ୍ଭୀର ହୋଇପଡିଛନ୍ତି ମଧୁସ୍ମିତାଙ୍କ ବାପା । ଅଗ୍ନିଶମ ବାହିନୀ ପହଞ୍ଚି ଝିଅକୁ ଖୋଜାଖୋଜି ଆରମ୍ଭ କରିଛି । ଏବେ ଯାଏଁ ଝିଅର କୌଣସି ପତ୍ତା ମିଳିପାରିନାହିଁ ।