ଅର୍ଗସ ବ୍ୟୁରୋ: ଓଡିଶା ରାଜ୍ୟ ଓଡିଆ ଆମ ମାତୃଭାଷା । ଯାହାକୁ କହିବାକୁ ଅନେକ ଓଡିଆ କୁଣ୍ଠାବୋଧ କରନ୍ତି । ଏମିତି କି ମୁଁ ଓଡିଆ ମିଡିୟମରେ ପାଠ ପଢୁଥିଲି ବୋଲି କହିବାକୁ ମଧ୍ୟ ଅନେକ ନିଜକୁ ଛୋଟ ଭାବନ୍ତି । ବାହାର ରାଜ୍ୟରେ କାମ କରୁଥିଲେ ଓଡିଆ ହୋଇ ବି ଓଡିଆଙ୍କ ସହ ଅନ୍ୟ ଭାଷାରେ କଥା ହେବାକୁ ଖୁସି ହୁଅନ୍ତି । ହେଲେ ଓଡିଆ ବୋଲି ପରିଚୟ ଦିଅନ୍ତିନି ।

ସେହି ମାତୃଭାଷା...ଓଡିଆ ଭାଷାର ସୁରକ୍ଷା, ପ୍ରଚାର, ପ୍ରସାର ପାଇଁ ଏହି ଭବ୍ୟ ଆୟୋଜନ । ବିଶ୍ୱ ଓଡିଆ ଭାଷା ସମ୍ମିଳନୀ । କେମିତି ଆମ ଓଡିଆ ଭାଷାର ଗୌରବ ବୃଦ୍ଧି ହେବ, ଜୟଗାନ ହେବ, ଓଡିଆ ଭାଷାର ବିଭିନ୍ନ ଦିଗ ଉପରେ ଆଲୋଚନା ହେବ, ଭଲ ସାହିତ୍ୟ ଉପରେ ଆଲୋଚନା ହେବ । ସେଥିପାଇଁ ସାରା ଓଡିଶା ଏକାଠି ହେଲା । ଓଡିଆ ଭାଷା, ଓଡିଆ ସାଜସଜ୍ଜା, ସବୁଥିରେ ଭରିଗଲା ଓଡିଆପଣ ।

ହେଲେ ଦଦରା ଖଣ୍ଡିଆ ଓଡିଆ କହିକି ସବୁ ସାରିଦେଲେ ଏହି ଉପସ୍ଥାପିକା ମ୍ୟାଡମ୍...

ଭାଷା ସମ୍ମିଳନୀରେ ମୁଖ୍ୟମନ୍ତ୍ରୀଙ୍କର ଉଚ୍ଚାରଣ ଆଉ ଏହି ଉପସ୍ଥାପିକା ମ୍ୟାଡମ୍ ଙ୍କ ଉଚ୍ଚାରଣ ନେଇ ଏବେ ସବୁଠି ଚର୍ଚ୍ଚା । କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ କହିଲେ ଯେ ନୂଆ ସଂସ୍କୃତି ଓ ବୈଷୟିକ ଜ୍ଞାନର ପ୍ରଭାବ ଭାଷା ଉପରେ ରହୁଛି । ତେଣୁ ଭାଷାର ସବୁ ଦିଗ ଉପରେ ଆଲୋଚନା ହେଉ। ଭଲ ସାହିତ୍ୟ ସୃଷ୍ଟି ଉପରେ ଓ ଓଡିଆ ଭାଷାର ଅଧିକ ବ୍ୟବହାର ଉପରେ ଆଲୋଚନା ହେଉ ।

ହେଲେ ସଭାରେ କାନ୍ତକବିଙ୍କ ନାଁ ଉଚ୍ଚାରଣ ଯେଉଁଭଳି ଭାବରେ ହେଲା ତାହାକୁ ନେଇ ଏବେ ସବୁ ମହଲରେ ଅସନ୍ତୋଷ । ସୋସିଆଲ ମିଡିଆରେ ଏହାକୁ ନେଇ ଅନେକ ଟାହି ଟାପରା କରାଯାଉଛି ।

ଏଠି ପ୍ରଶ୍ନ ଉଠୁଛି

ଓଡିଆ ଭାଷା ସମ୍ମିଳନୀରେ କଣ ଓଡିଆ ପଢିପାରୁଥିବା ଉପସ୍ଥାପିକା ମିଳିଲେନି ?
ଉପସ୍ଥାପିକା ମ୍ୟାଡମ୍ ସମ୍ମିଳନୀର ମୂଳ ଉଦେଶ୍ୟ କେମିତି ଭୂଲିଗଲେ ?
ଏହି ଭିଡିଓ ଏବେ ସୋସିଆଲ ମିଡିଆରେ ଏତେ ମାତ୍ରାରେ ଭାଇରାଲ୍ ହେଉଛି ଯେ ଲୋକେ କହିଲେଣି ଉପସ୍ଥାପିକା ବି କଣ ତାମିଲ ରୁ ଆସିଛନ୍ତି କି...

ସେପଟେ କାର୍ଯ୍ୟକ୍ରମରେ ଓଡ଼ିଆ ଭାଷାର ବିକୃତ ଉଚ୍ଚାରଣ ନେଇ ଭାଷା ପ୍ରେମୀ କ୍ଷୁବ୍ଧ । କାନ୍ତ କବିଙ୍କୁ ଅପମାନ ପରେ ଉଠିଲା ମୁଖ୍ୟମନ୍ତ୍ରୀଙ୍କ କ୍ଷମା ପ୍ରାର୍ଥନା ଦାବି । ଏଭଳି ସମ୍ମିଳନୀ କିପରି ବିଶ୍ବରେ ଚମକାଇବ ଓଡ଼ିଆ ଭାଷାର ଛବି ?

ଆଉ ସବୁଠୁ ବମ୍ବନାର ବିଷୟ ହେଉଛି ଶହ ଶହ ଖ୍ୟାତିସମ୍ପନ୍ନ ଭାଷାବିତ୍‌, ବୁଦ୍ଧିଜୀବୀ ଓ ବିଦ୍ବାନଙ୍କ ଉପସ୍ଥିତିରେ ବିଶ୍ବ ଓଡ଼ିଆ ଭାଷା ସମ୍ମିଳନୀରେ ଓଡ଼ିଆ ଭାଷାର ବିକୃତ ଉଚ୍ଚାରଣ ହେଲା । ମଞ୍ଚରେ ମୁଖ୍ୟମନ୍ତ୍ରୀ ଓ ସଂସ୍କୃତି ମନ୍ତ୍ରୀ ବି ଆସୀନ ହୋଇଥିଲେ । କିନ୍ତୁ କେହି ବି ବିକୃତ ଓଡ଼ିଆ ଉଚ୍ଚାରଣର ସଂଶୋଧନ କରିବାକୁ ସାମନାକୁ ଆସିଲେନି ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV