ପୁରୀ ସହରର ବିକାଶ ଲାଗି ପ୍ରକଳ୍ପର ଲମ୍ବା ତାଲିକା । ହେଲେ କାମର ନାହିଁ ଠିକଣା। ଏକଥା ଆମେ କହୁନୁ ପୁରୀ ପୌରସଂସ୍ଥା ପକ୍ଷରୁ ହସ୍ତଗତ ଏହି ତଥ୍ୟ ତାର ପ୍ରମାଣ । ଦସ୍ତାବିଜ୍ କହୁଛି, ୮୬୮ଟି ପ୍ରକଳ୍ପ ଅଧପନ୍ତରିଆ ରହିଛି । ୪୦ ପ୍ରତିଶତ କାମର ସମୀକ୍ଷା ହୋଇଛି ଓ ୩୦ ପ୍ରତିଶତ କାମ ଅର୍ଥ ଅଭାବରୁ ଆରମ୍ଭ ହୋଇନି । ଆଉ ୩୦ ପ୍ରତିଶତ ଅଧାରେ ଅଟକିଛି। ରାଜନୈତିକ ବିବାଦ, ଠିକାଦାର ଓ ଅଧିକାରୀଙ୍କ ମଧୁଚନ୍ଦ୍ରିକାରୁ ପରିତ୍ୟକ୍ତ ଜାଗା ପୋଖରୀର ପୁନଃରୁଦ୍ଧାର, ଭଙ୍ଗାରାସ୍ତାର ମରାମତି, କମ୍ୟୁନିଟି ହଲ, ପାର୍କ, ଡ୍ରେନ୍ ସମସ୍ୟା, ନୂତନ ରାସ୍ତା ନିର୍ମାଣ ଭଳି ଅନେକ ପ୍ରକଳ୍ପ ଏବେବି ଆରମ୍ଭ ହୋଇନାହିଁ ଓ ଆଉ କିଛି ଅଧପନ୍ତରିଆ ରହିଛି । ଯାହାକୁ ନେଇ ସହର ବାସିନ୍ଦା ଅସନ୍ତୋଷ ପ୍ରକାଶ କରିବା ସହ ପୁରୀ ପୌରସଂସ୍ଥାକୁ ଭିଜିଲାନ୍ସ ପରିସରଭୁକ୍ତ କରାଯାଇ ତଦନ୍ତ କରିବାକୁ ଦାବି ହୋଇଛି ।

ନିର୍ବାଚନ ପୂର୍ବରୁ ବିଭିନ୍ନ ୱାର୍ଡରେ ରହିଥିବା ସମସ୍ୟାକୁ ଦେଖି ପ୍ରକଳ୍ପ ତାଲିକା ପ୍ରସ୍ତୁତ ହୋଇଥିଲା । ୨୦୨୪ ମାର୍ଚ୍ଚରେ ୩୨ଟି ୱାର୍ଡରେ ୯୧୧ଟି ପ୍ରକଳ୍ପକୁ ପୁରୀ ପୌରସଂସ୍ଥାର ଅନୁମୋଦନ ଓ ଆର୍ଥିକ ଅନୁଦାନ ମିଳିଛି । ପୌର କର୍ତ୍ତୃପକ୍ଷଙ୍କ କାର୍ଯ୍ୟାଦେଶ ତାଲିକାରେ ୮୬୮ଟି କାର୍ଯ୍ୟ ଆରମ୍ଭ ପାଇଁ ନିର୍ଦ୍ଦେଶ ଦିଆଯାଇଥିଲା । ଅନେକ ପ୍ରକଳ୍ପ କାମ ଅଧାବିଧା ଓ ଆରମ୍ଭ ହୋଇନଥିବା ସ୍ବୀକାର କରିଛନ୍ତି ପୌରନିର୍ବାହୀ ଅଧିକାରୀ ।

ସେପଟେ ଜିଲ୍ଲାପାଳ କହିଛନ୍ତି, କ୍ଷେତ୍ର ପରିଦର୍ଶନ ପରେ ପ୍ରକଳ୍ପର ଏକ ଷ୍ଟାଟସ ରିପୋର୍ଟ ପ୍ରସ୍ତୁତ କରାଯିବ। ଯେଉଁମାନେ ଅବହେଳା କରିଥିବେ ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ । ଗତ ସରକାରର ଅଣଦେଖା, ରାଜନୈତିକ ବିବାଦ ଓ ପ୍ରଶାସନିକ ଉଦାସୀନତା ଭିତରେ ଫସିଛି ପୁରୀ ସହର ଉନ୍ନତି। ବିଜେପି ସରକାର ପଦକ୍ଷେପ ନେଇ ପ୍ରକଳ୍ପ ଗୁଡ଼ିକ କାମ ସାରିବାକୁ ଆଶା ପ୍ରକଟ କରିଛନ୍ତି ପୁରୀ ସହରା ବାସିନ୍ଦା ।