ରାଜ୍ୟରେ ଶିକ୍ଷା ବିକାଶ ନେଇ ଡିଣ୍ଡିମ ପିଟୁଥିଲା ପୂର୍ବ ସରକାର। କିନ୍ତୁ ବାସ୍ତବ ଚିତ୍ର ଥିଲା ଭିନ୍ନ। ରାଜକନିକାରୁ ସାମ୍ନାକୁ ଆସିଛି ଶିକ୍ଷା ବ୍ୟବସ୍ଥାର ବିକଳ ଚିତ୍ର । ପିଲାଙ୍କ ଜୀବନ ସହ ଖେଳ ଖେଳୁଛି ପ୍ରଶାସନ। ଏ ଦୃଶ୍ୟ କେନ୍ଦ୍ରାପଡ଼ା ଜିଲ୍ଲା ରାଜକନିକା ବ୍ଲକ ଆଖୁଳିପଡା ପଞ୍ଚାୟତ ଅନ୍ତର୍ଗତ ମଲ୍କିସାହାଡ଼ା ସରକାରୀ ପ୍ରାଥମିକ ବିଦ୍ୟାଳୟର । ୨୦ବର୍ଷର ପୁରୁଣା ବିଦ୍ୟାଳୟର କାନ୍ଥ ଫାଟି ଆଁ କରିଛି । ସ୍କୁଲ କାନ୍ଥରୁ କଂକ୍ରିଟ ଖସି ଲୁହା ରଡ ଦିଶୁଛି। କିନ୍ତୁ ଉନ୍ନତିକରଣ ନାଁରେ ଏଭଳି ଭଙ୍ଗାଦଦରା ଘର ଉପରେ ନୂତନ ଶ୍ରେଣୀଗୃହ ନିର୍ମାଣ ହେଉଥିବା ଅଭିଯୋଗ କରିଛନ୍ତି ଗ୍ରାମବାସୀ l

ବିଦ୍ୟାଳୟରେ ପ୍ରଥମରୁ ପଞ୍ଚମ ଶ୍ରେଣୀ ପର୍ଯ୍ୟନ୍ତ ୭୩ ଛାତ୍ରଛାତ୍ରୀ ପାଠ ପଢୁଛନ୍ତି l ସେମାନଙ୍କ ପାଇଁ ରହିଛି ମାତ୍ର ୨ଟି ଶ୍ରେଣୀ ଗୃହ। ଆବଶ୍ୟକ ସଂଖ୍ୟା ଠାରୁ କମ ଗୃହ ଥିବାରୁ ସରକାରଙ୍କ ପକ୍ଷରୁ ୫ଲକ୍ଷ ଟଙ୍କା ଅନୁଦାନ ଦିଆଯାଇଥିଲା l ଟଙ୍କା ହରିଲୁଟ ପାଇଁ ଭଙ୍ଗା ଘର ଉପରେ ନିର୍ମାଣ କାର୍ଯ୍ୟ ଚାଲୁଥିବା ଅଭିଯୋଗ ଆଣିଛନ୍ତି ଗ୍ରାମବାସୀ l ୨୦ବର୍ଷର ଭଙ୍ଗା ଘର ଉପରେ ସ୍କୁଲ ନିର୍ମାଣ ହେଉଥିବାରୁ ଯେ କୌଣସି ସମୟରେ ଅଘଟଣ ଘଟିବା ନେଇ ଆଶଙ୍କା ଦେଖାଦେଇଛି। କେବଳ ସେତିକି ନୁହେଁ ନିର୍ମାଣରେ ବ୍ୟବହୃତ ସାମଗ୍ରୀ ନିମ୍ନମାନର ଅଭିଯୋଗ କରି ଉଚ୍ଚସ୍ତରୀୟ ତଦନ୍ତ ଦାବୀ କରିଛନ୍ତି ଗ୍ରାମବାସୀ l ଏନେଇ ଆମେ ରାଜକନିକା ବିଡିଓଙ୍କୁ ପଚରିବାରୁ ତଦନ୍ତ କରାଯାଇ କାର୍ଯ୍ୟନୁଷ୍ଠାନ ହେବ ବୋଲି କହିଛନ୍ତି l ତେବେ ତୁରନ୍ତ ନିର୍ମାଣ କାର୍ଯ୍ୟ ବନ୍ଦ ନକରାଗଲେ ଆନ୍ଦୋଳନକୁ ଓଲ୍ହାଇବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ।