ସମୟର ଚକାଭଉଁରୀ । କେତେବେଳେ ଆଣେ ଖୁସି ଅସୁମାରୀ ତ ଆଉ କେତେବେଳେ ଦିଏ ସବୁ ସାରି । ଏଇ ଦେଖୁନାହାନ୍ତି ସେହି ସମୟ କେମିତି ବଇରି ସାଜିଛି ଭଦ୍ରକ ଭଣ୍ଡାରିପୋଖରୀ ଜଳ ମଣ୍ଡୁଆ ପଞ୍ଚାୟତ ମଙ୍ଗିଳିଆ ସାହିର ଭରତ ସାହୁଙ୍କ ପୁଅ ଘନଶ୍ୟାମ ସାହୁଙ୍କ ସହ । ଘରକୁ କୁନି ଅତିଥି ଆସିବାର ଆଗମନରେ ମନର ଅଗଣାରେ ଯେତେବେଳେ ଖୁସିର ଫୁଆରା ଖେଳୁଥିଲା ଠିକ ସେହି ସମୟରେ କାଳ ସାଜି ମାଡି ଆସିଥିଲା ବୋଲେରୋ ଗାଡି । ଡାକ୍ତରଖାନା ଯାଇ ପତ୍ନୀଙ୍କ ଡେଲିଭରି କଣ ବୁଝିବେ, ସାଥିରେ କଣ ଛିଡା ହେବେ ଓଲଟା ନିଜେ ପେସେଣ୍ଟ ସାଜିଗଲେ । ଦୁର୍ଘଟଣା ପରେ ଦାର୍ଘଦିନ କୋମାରେ ରହିବା ପରେ ଏବେ ସଂପୂର୍ଣ୍ଣ ଶଯ୍ୟାଶାୟୀ ।

ସେପଟେ ନିଜର ଏକମାତ୍ର ରୋଜଗାରିଆ ପୁଅର ଏଭଳି ଅବସ୍ଥା ଦେଖି ନିଜର କୋହ ସମ୍ଭାଳି ପାରୁନାହାନ୍ତି ମାଆ ବାପା । ଚିକିତ୍ସାରେ ଅର୍ଥ ସାଜିଛି ବାଧକ। ପୁଅର ମେଡିସିନ କେମିତି ଆଣିବେ, ତିନି ନାତୁଣୀ ସହ ପୁରା ପରିବାରର କେମିତି ପ୍ରତିପୋଷଣ କରିବେ ସେଇ ଚିନ୍ତାରେ ଘନଶ୍ୟାମଙ୍କ ବାପା ଭରତ । ତେବେ ଘନଶ୍ୟାମଙ୍କ ଏଭଳି ଅବସ୍ଥା ନେଇ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରିବାରୁ ଘନଶ୍ୟାମଙ୍କୁ ମାଗଣା ମେଡିସିନ, ଦିବ୍ୟାଙ୍ଗ ଭତ୍ତା, ଲେବର କାର୍ଡର ପୁନଃପଂଜିକରଣ ସହ ବିଦ୍ୟାଳୟ ପକ୍ଷରୁ ଦୁଇ ନାତୁଣୀଙ୍କ ପାଠପଢାର ସ୍ପନସର କରାଯିବ ବୋଲି କହିଛନ୍ତି ଭଦ୍ରକ ଜିଲ୍ଲାପାଳ ।

ସେପଟେ ଅର୍ଥ ଅଭାବରୁ ବାପାଙ୍କର ଚିକିତ୍ସା କରାଇ ପାରୁନାହିଁ ପୁଅ । କିଡିନୀ ପରି ରୋଗରେ ପଡି ଜୀବନ ସହ ସଂଘର୍ଷ କରୁଛନ୍ତି ଧାମନଗରର ବୀରଭଦ୍ର ନାୟକ । ଯେଉଁଠି ଦୁଇ ଓଳି ଦୁଇ ମୁଠା ଖାଦ୍ୟ ଯୋଗାଡ କରିବା କଷ୍ଟକର ସେଠି କିଡିନୀ ଚିକିତ୍ସା ପାଇଁ ଅର୍ଥ କୁଆଡୁ ଆଣିବେ ସେଇ ଚିନ୍ତାରେ ବୀରଭଦ୍ରଙ୍କ ପୁଅ ଅଶ୍ବିନୀ । ମୁଲ ଲାଗିଲେ ଚୁଲି ଜଳେ । ନ ହେଲେ ପେଟରେ ଓଦାକନା ପକାଇ ଦିନ କଟେ । ଟିକେ ଭଲକରି ଦେଖନ୍ତୁ କେମିତି ଆଉ କେଉଁ ପରିସ୍ଥିରେ ରହୁଛନ୍ତି ବୀରଭଦ୍ରଙ୍କ ପରିବାର । ମୁଣ୍ଡ ଉପରେ ପକା ଘରଟିଏ ନାହିଁ । ଅତି ଦୟନୀୟ ଅବସ୍ଥାରେ ବିତୁଛି ଜୀବନ । ଗାଁ ଲୋକଙ୍କ ଠାରୁ ମାଗି ଯାଚି ଯେହା ଯେମିତି କଷ୍ଟେ ମଷ୍ଟେ ବାପାଙ୍କ ଚିକିତ୍ସା କରାଇବା ପରେ ଏବେ ସରକାରୀ ସହାୟତା ହିଁ ଏକମାତ୍ର ଭରଷା । ବୀରଭଦ୍ରଙ୍କ ପରିବାରକୁ ପ୍ରଶାସନ ପକ୍ଷରୁ ଆର୍ଥିକ ସହଯୋଗ ଯୋଗାଇ ଦେବାକୁ ଦାବି କରିଛନ୍ତି ଗ୍ରାମବାସୀ ।

ତେବେ ଯଦି କୌଣସି ସହୃଦୟ ବ୍ୟକ୍ତି ବୀରଭଦ୍ରଙ୍କୁ ସାହାଯ୍ୟ କରିବା ପାଇଁ ଚାହୁଁଥିବେ ତେବେ ଏହି ନମ୍ବରରେ ଯୋଗାଯୋଗ କରିବା ସହ ଆର୍ଥିକ ସହାୟତା କରିପାରିବେ ।

Argus News | argus news | -Argusnews Home: Odisha Latest News, Breaking News, Trending News, Live TV and more