ଆଜିଠୁ ଭକ୍ତଙ୍କୁ ମିଳିବ ଆଡପ ମଣ୍ଡପ ଦର୍ଶନ... ଜନ୍ମବେଦୀରେ ଦର୍ଶନ ଦେବେ ଚତୁର୍ଦ୍ଧାମୂର୍ତ୍ତି । ଗତକାଲି ଗୋଟି ପହଣ୍ଡିରେ ଶ୍ରୀଗୁଣ୍ଡିଚା ମନ୍ଦିର ଯାଇଛନ୍ତି ବ୍ରହ୍ମାଣ୍ଡ ଠାକୁର । ଆଜି ଦୁର୍ଲଭ ଆଡପ ଅବଢା ମହାପ୍ରସାଦ ପାଇବାର ସୁଯୋଗ ପାଇବେ ଶ୍ରଦ୍ଧାଳୁ । ସନ୍ଧ୍ୟାରେ ବନକଲାଗି ନୀତି ଯୋଗୁଁ ୩ ରୁ ୪ ଘଣ୍ଟା ବନ୍ଦ ରହିବ ଦର୍ଶନ ।

ଗତକାଲି ରାତିରେ ଗୋଟି ପହଣ୍ଡିରେ ଶ୍ରୀଗୁଣ୍ଡିଚା ମନ୍ଦିର ବିଜେ ହୋଇଥିଲେ ବ୍ରହ୍ମାଣ୍ଡ ଠାକୁର । ମହାପ୍ରଭୁଙ୍କ ସନ୍ଧ୍ୟା ଧୂପ ନୀତି ଶେଷ ହେବାପରେ ପ୍ରାୟ ସନ୍ଧ୍ୟା ୭ ଟା ୪୩ ବେଳକୁ ପହଣ୍ଡି ଆରମ୍ଭ ହୋଇଥିଲା । ପ୍ରଥମେ କୃଷ୍ଣ ,ମଦନମୋହନ,ପରେ ବଳଭଦ୍ର,ସୁଭଦ୍ରା ଓ ଶେଷରେ ମହାପ୍ରଭୁ ଶ୍ରୀଜଗନ୍ନାଥଙ୍କ ପହଣ୍ଡି ବିଜେ ନୀତି ହୋଇଥିଲା ।

ଆଜି ଭକ୍ତଙ୍କୁ ମିଳିବ ଦୁର୍ଲଭ ଆଡପ ଅବଢା ମହାପ୍ରସାଦ । ଅପରାହ୍ନ ୧୨ ଟା ୩୦ ରୁ ୧ ଟା ୩୦ ମଧ୍ୟରେ ଭୋଗ ମଣ୍ଡପ ପାଇଁ ନୀତି ନିର୍ଘଣ୍ଟ ହୋଇଛି । ଅପରାହ୍ନ ୪ ଟା ୫ଟା ପର୍ଯ୍ୟନ୍ତ ମଧ୍ୟାହ୍ନ ଧୂପ ଓ ୫ ଟା ରୁ ୬ ଟା ୩୦ ମଧ୍ୟରେ ଦ୍ୱିତୀୟ ଭୋଗ ମଣ୍ଡପ ହେବା ନେଇ ପୂର୍ବରୁ ନୀତି ନିର୍ଘଣ୍ଟ ହୋଇଛି । ତେବେ ଅପରାହ୍ନ ୨ ଟା ସୁଦ୍ଧା ଚଳିତ ବର୍ଷର ପ୍ରଥମ ଆଡ଼ପ ଅବଢ଼ା ବାହାରିବା ନେଇ ଆକଳନ କରାଯାଉଛି ବୋଲି କହିଛନ୍ତି ସେବାୟତ । ଆଜି ବନକଲାଗି ନୀତି ହେବା ନେଇ ମଧ୍ୟ ସୂଚନା ରହିଛି । ଯେଉଁଥି ପାଇଁ ପ୍ରାୟ ୩ରୁ ୪ ଘଣ୍ଟା ଦର୍ଶନ ବନ୍ଦ ରହିବା ନେଇ ସୂଚନା ଦେଇଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ।

ସେପଟେ ଆସନ୍ତାକାଲି ସକାଳ ୫ ଟାରୁ ଦ୍ଵାରଫିଟା ହୋଇ ୬ ଟା ୩୦ ସୁଦ୍ଧା ମଙ୍ଗଳ ଆଳତୀ ପାଇଁ ନୀତି ନିର୍ଘଣ୍ଟ ହୋଇଛି । ୨୦ ଜୁଲାଇ ରେ ସୋମବାର ହେବ ହେରା ପଞ୍ଚମୀ ନୀତି । ୨୧ ତାରିଖ ମଙ୍ଗଳ ବାର ହେବ ତିନିରଥର ଦକ୍ଷିଣୀ ମୋଡ । ୨୩ ତାରିଖ ଗୁରୁବାର ହେବ ସନ୍ଧ୍ୟା ଦର୍ଶନ । ୨୩ ତାରିଖ ସନ୍ଧ୍ୟା ୭ ଟା ପର୍ଯ୍ୟନ୍ତ ଦର୍ଶନ ହୋଇ ବନ୍ଦ୍ ରହିବ ଦର୍ଶନ । ୨୪ ତାରିଖ ବାହୁଡା ବିଜେ ପାଇଁ ଆରମ୍ଭ ହେବ ପ୍ରସ୍ତୁତି ।

ଆଡ଼ପ ମଣ୍ଡପ, ଦର୍ଶନ, ହେରାପଞ୍ଚମୀ, ବାହୁଡା ବିଜେ, ପାଇଁ ହୋଇଛି ସ୍ୱତନ୍ତ୍ର ପ୍ରସ୍ତୁତି । ଟାହିଆକୁ ନେଇ ପ୍ରତିକ୍ରିୟା ରଖି ଆଇନ ମନ୍ତ୍ରୀ କହିଛନ୍ତି ମହାପ୍ରଭୁଙ୍କ ନୀତିକୁ ନେଇ କୌଣସି ତଥ୍ୟ ବିହୀନ ପ୍ରଚାରର ଆବଶ୍ୟକତା ନାହିଁ । ସେପଟେ ଝଲସୁଛି ଶ୍ରୀଗୁଣ୍ଡିଚା ମନ୍ଦିର । ନୂଆକରି ଏହାର ସୋନ୍ଦର୍ଯ୍ୟକରଣ କରାଯାଇଛି । ନାଟମଣ୍ଡପ ଏସି ବ୍ୟବସ୍ଥା ସହ ଜର୍ମାନ ହ୍ୟାଙ୍ଗର ବ୍ୟବସ୍ଥା ମଧ୍ୟ କରାଯାଇଛି ।