ବ୍ରହ୍ମଗିରି: ମଟନ୍ ନାଁରେ ହୋଟେଲ୍‌ରେ ଦିଆ ଯାଉଥିଲା ଗୋ-ମାଂସ । ଏମିତି ସଙ୍ଗୀନ ଅଭିଯୋଗ ଆସିଛି ପୁରୀ-ଭୁବନେଶ୍ଵର ଜାତୀୟ ରାଜପଥ କଡ଼ ସାକ୍ଷୀଗୋପାଳ ନିକଟ ଜୟା ହୋଟେଲ୍ ନାଁରେ । ଜୟା ହୋଟେଲ୍ ନାଁରେ ଏତେ ବଡ଼ ଅଭିଯୋଗ ଆସିବା ପରେ ପ୍ରଶାସନ ହୋଟେଲକୁ ସିଲ୍ କରିଛି । ହୋଟେଲର ମଟନ ନମୁନା ପରୀକ୍ଷା ଲାଗି ରାଜ୍ୟ ପରୀକ୍ଷାଗାରକୁ ନିଆ ଯାଇଛି ।

ଅଭିଯୋଗ ଅନୁସାରେ, ଶୁକଳ ସହ ବିଭିନ୍ନ ଅଞ୍ଚଳରୁ ଗୋ ମାତାଙ୍କୁ କିଣା ଯାଉଥିଲା । ସତ୍ୟବାଦୀର ଅହମ୍ମଦପୁର ଅଞ୍ଚଳରେ ଗାଈଗୋରୁଙ୍କୁ କଟା ଯାଇଛି ମାଂସ ଚାଲାଣ ହେଉଥିଲା । ଏପରିକି ପୁରୀ ଅଞ୍ଚଳରୁ କଟକକୁ ମଧ୍ୟ ଗାଈଗୋରୁ ଚାଲାଣ ହେଉଛି ।

ଦୀର୍ଘ ଦିନ ଧରି ସତ୍ୟବାଦୀ ପୋଲିସ ଚାନ୍ଦା ନେଇ ଗୋ ମାଫିଆଙ୍କୁ ସୁରକ୍ଷା ଦେଉଥିବା ଅଭିଯୋଗ ହୋଇଛି । ଅଭିଯୋଗ ଆସିବା ପରେ ସତ୍ୟବାଦୀ ଥାନାର ସବ-ଇନ୍ସପେକ୍ଟରଙ୍କୁ ହେଡକ୍ଵାର୍ଟରକୁ ବଦଳି କରାଯାଇଛି । ଜାତୀୟ ରାଜପଥ କଡ଼ ସାକ୍ଷୀଗୋପାଳ ନିକଟରେ ରହିଛି ଜୟା ହୋଟେଲ । ପୁରୀ ଯିବା ରାସ୍ତାରେ ଏହି ହୋଟେଲ୍‌ରେ ରହିଥିବା ବେଳେ ଏଠାରେ ପ୍ରତିଦିନ କ୍ଵିଣ୍ଟାଲ୍ କ୍ଵିଣ୍ଟାଲ୍ ମଟନ ରୋଷେଇ ହୋଇଥାଏ ।

ଜୟା ହୋଟେଲର ଏକ ଭିଡିଓ ଭାଇରାଲ୍ ହେଉଥିବା ବେଳେ ପୋଲିସ ତଦନ୍ତ ଆରମ୍ଭ କରିଛି । ଭାଇରାଲ୍ ଭିଡିଓରେ ଥିବା ଯୁବକ ଜଣଙ୍କ ଗୋ-ଚାଲାଣ ରାକେଟ୍‌ରେ ସମ୍ପୃକ୍ତ ଥିବା କୁହାଯାଉଛି । ତେବେ ଗ୍ରାହାକଙ୍କ ଭାବାବେଗ ସହ ଖେଳି ମଟନ୍ ନାଁରେ ଦିଆ ଯାଉଥିଲା କି ଗୋ-ମାଂସ ? ସବୁ ଜାଣିଶୁଣି କାହିଁକି ଚୁପ୍ ଥିଲା ସତ୍ୟବାଦୀ ପୋଲିସ ? ଯଦି ଘଟଣା ସତ ନୁହେଁ ତାହେଲେ କାହିଁକି ପୋଲିସ ମୁହଁ ଖୋଲୁ ନାହିଁ । ଏସ୍‌ଆଇଙ୍କୁ ହେଡକ୍ଵାର୍ଟରକୁ ବଦଳି କରିବା ପଛର କାରଣ କଣ ?

ଏହା ପୂର୍ବରୁ କଟକ ଆଠଗଡ଼ ତିଗିରିଆ ଅଞ୍ଚଳରେ ହଜାର ହଜାର ଗୋରୁଙ୍କ କଙ୍କାଳ ଦେଖିବାକୁ ମିଳିଥିଲା । ଅର୍ଗସ୍ ନ୍ୟୁଜ୍‌ରେ ଏ ଖବର ପ୍ରସାରଣ ପରେ ଲୋକଙ୍କ ଆକ୍ରୋଶ ବଢ଼ିଥିବା ବେଳେ ଏବେ ପୁଣି ପୁରୀ ଜାତୀୟ ରାଜପଥରେ ମଟନ୍ ନାଁରେ ଲୋକଙ୍କୁ ଗୋ-ମାଂସ ଖାଇବାକୁ ଦିଆ ଯାଉଥିବା ଅଭିଯୋଗ ହୋଇଛି । ପୋଲିସ ଅଭିଯୋଗର ତଦନ୍ତ କରୁଥିବା ବେଳେ ମଟନ ନମୁନା ପରୀକ୍ଷା ରିପୋର୍ଟ ଆସିବା ପରେ ହିଁ ସବୁକିଛି ସ୍ପଷ୍ଟ ହେବ ।